“უგულავას დაწყებული პიარ-აქციები მერიაში გრძელდება. აღნიშნული პროექტი იყო როგორც საგანმანათლებლო, ასევე პროპაგანდისტული. თავის დროზე ათასობით ადამიანი ჩაეწერა უფასო კურსებზე, თბილისის სკოლებში გაიხსნა სპეციალური კაბინეტები, სადაც მიმდინარეობდა სწავლა. წელს ქალაქის მერიამ გადაწყვიტა ამ პროექტის ფორმატის შეცვლა. იმისათვის, რომ აღნიშნული პროექტი იყოს პროპაგანდის უფრო ეფექტური იარაღი, განხორციელდება მუნიციპალიტეტებში. ეს ნიშნავს, რომ სწორედ მუნიციპალიტეტებში გაიხსნება კლასები და იქ იქნება კურსის გავლა შესაძლებელი”.
სამუშიას განცხადებით, ეს ერთ-ერთი ნათელი მაგალითია იმისა, თუ როგორ ცდილობს ადგილობრივი არჩევნების წინ მერია გამოიყენოს სახელმწიფო სახსრები.
“თბილისის მუნიციპალიტეტები მთლიანად არის დაკომპლექტებული ნაციონალებით, აქედან გამომდინარე მუნიციპალიტეტებში აღნიშნული პროექტის განხორციელება არის პირდაპირი ქმედება ხალხის მოსყიდვის და თვალის ახვევის”.
საკრებულოს წევრი მიმართავს მერის მოვალეობის შემსრულებელს დაინტერესდეს აღნიშნული პროექტით.
“მერია ავრცელებს ინფორმაციას, რომ აღნიშნულ პროექტს ფორმატი შეეცვალა მხოლოდ იმის გამო, რომ განათლების სამინისტრო არ იყო მომხრე აღნიშნული პროექტი გაგრძელებულიყო სკოლებში, ჩვენ გადავამოწმეთ ეს ინფორმაცია და ვაცხადებთ, რომ განათლების სამინისტროსთვის არც არავის უკითხია და არც ეს სამინისტრო არ ყოფილა ამ პროექტის წინააღმდეგი. პირიქით, მუნიციპალიტეტი არ არის საგანმანათლებლო დაწესებულება და ნუ დააკისრებს მერია მუნიციპალიტეტებს იმ ფუუნქციებს, რაც არც ერთ ქვეყანაში არ არსებობს. მოვუწოდებ სევდია უგრეხელიძეს დაინტერესდეს და გაერკვეს ამ საქმეში. ამ პროგრამის პოლიტიკური მიზნებისთვის გამოყენება არის დანაშაული და უზნეობა”.
სამუშია აცხადებს, რომ ქალაქის მთავრობამ აუცილებლად უნდა მიმართოს განათლების სამინისტროს, რომელიც დაადასტურებს მზადყოფნას ამ პროექტის სკოლებში გასაგრძელებლად. სამუშია მიიჩნევს, რომ ეს პროექტი ნამდვილად არის სოციალურად დაუცველთათვის საკმაოდ კარგი პროექტი, მაგრამ არ უნდა გასცდეს საგანმანათლებლო ჩარჩოებს. მისი განცხადებით “თვითმმართველობა მოკლულია, ბალანსი დარღვეულია” და სწორედ ამის გამო არ ხდება მნიშვნელოვანი საკითხების საკრებულოსთან შეთანხმება.
“არ შეიძლება იმას, რაც თბილისის ბიუჯეტიდან ფინანსდება შენი პოლიტიკური შეხედულებისამებრ შეუცვალო კურსი და ფორმატი. არის თემები, რომელიც საკრებულოსთან უნდა შეთანხმდეს, ეს არის კლასიკური ფორმა და ასე უნდა იყოს წლების შემდეგაც”.
სამუშია აცხადებს, რომ ქალაქის მერიის მხრიდან ბევრ შემთხვევაში საქმე გვაქვს „კანონიერებით ჩადენილ უკანონობასთან“ და ეს უნდა აღმოიფხვრას.
