“მე ახლა ვსაუბრობ არა როგორც ჟურნალისტი, არამედ როგორც ბადრი პატარკაციშვილის საარჩევნო შტაბის წარმომადგენელი. არანაირ სახელმწიფო გადატრიალებას არ ვაწყობდით, ეს იყო სააკაშვილის მორიგი შავი პიარ-კამპანია ღირსეული ოპონენტის წინააღმდეგ. იმის მერე, რაც ეს ბრალდება წამოვიდა, იდევნებიან შტაბის თავმჯდომარე და წევრები. ჩვენ უკვე ერთი წელია ამ საქმის განხილვას ვითხოვთ და ახლა იმედი გვაქვს, ივანიშვილის განცხადების შემდეგ, რამაც ბოლო მოუღო ივანიშვილსა და პატარკაციშვილს შორის ვითომდა დაპირისპირების არსებობას, საქმე დაიძვრება და ყველაფერს ნათელი მოეფინება,” _ აცხადებს ელისო კილაძე.
ბადრი პატარკაციშვილის საარჩევნო შტაბის ხელმძღვანელმა ვალერი გელბახიანმა განაცხადა, რომ სააკაშვილმა საპრეზიდენტო ვადის ამოწურვამდე ერთი კვირით ადრეც გაიმეორა, თითქოს პატარკაციშვილი ამზადებდა სახელმწიფო გადატრიალებას და დამნაშავე იყო. გელბახიანი ამბობს, რომ კარგია სიმართლის გაცხადება, მაგრამ საქმე ბოლომდე უნდა მივიდეს და დადასტურდეს ეს სიმართლე. მან იმედი გამოთქვა, რომ პროკრატურა დააჩქარებს საქმის განხილვას და საზოგადოებაში აღარ დარჩევა ეჭვის ნატამალიც კი.
“ბიძინა ივანიშვილის განცხადება იყო უმნიშვნელოვანესი, რადგან ის არის “მშვიდობიანი რევოლუციის” ავტორი, მან ერთადერთმა შეძლო ხელისუფლების არჩევნების გზით შეცვლა. 2007 წელს ჩვენც ვიდექით მშვიდობიანი ცვლილების სათავეში, მაგრამ ხელისუფლებამ იგრძნო რეალური საფრთხე და პირველი შემხვევა იყო, როცა საარჩევნო კამპანია სახელმწიფო გადატრიალებად იქნა მონათლული. ამის მერე 40-მდე წევრი პატიმრობაში მოხვდა, ბევრმა დაკარგა სამსახური, იყო დევნაში. ადამიანები დაზარალდნენ შეთხზული ტყუილის გამო. ივანიშვილი ინფორმირებული იყო თუ რა ხდებოდა იმ დროს მთავრობის წრეებში, კულისებში და ახლა გააჟღერა სიმართლე, რომელმაც საერთაშორისო საზოგადოებას და რაც მთავარია ჩვენს ხალხს დაანახა, რაში იყო რეალურად საქმე. ჩვენ ამისთვის დიდ მადლობას ვუხდით მას, მაგრამ გაცხადებული სიმართლე ბოლომდე უნდა მივიდეს. თუ ივანიშვილი ფიქრობდა, რომ ეს არ იყო დანაშაული, მაშინ პროკურატურამ რატომ გადასცა სისხლის სამართლის სასამართლოს საქმე? ან პროკურატურას არ მიუღია დირექტივა, ან ისევ აღასრულა სააკაშვილის ნება,” _ ამბობს ვალერი გელბახიანი.
იგი აცხადებს, რომ ბიძინა ივანიშვილის მიერ გაკეთებულმა განმარტებამ დიდი ტვირთი და ლაქა ჩამოაშორა მას და შტაბის ყველა წევრს. მისი თქმით, ისინი არ აკეთებენ არანაირ პლიტიკურ განცხადებას, მაგრამ მაინც გამოდიან იმ დროინდელი პოლიტიკური მოპასუხის როლში. გელბახიანის თქმით, თუ ყველა ბინძურ საქმეს მოეფინება ნათელი და სიმართლე არასდროს დაიმალება, ქვეყანა უკეთესი გზით ივლის.
“დღემდე ისეთი ტაბუ ედო ამ საქმეს, რომ თითქოსდა დირექტივა მოდიოდა ივანიშვილისგან, ჩემამდეც არა ერთხელ მოსულა ეს ჭორი, რაც პირიქით აღმოჩნდა”.
გელბახიანი აცხადებს, რომ მიუხედავად ბადრი პატარკაციშვილის გარდაცვალებისა, საქმე არ შეწყვეტილა, რასაც პარადოქსად აფასებს.
