დავით ლაგვილავა გათავისუფლების დღიდან უკანონოდ სცნობდა მიღებულ გადაწყვეტილებას და როგორც თავად აღნიშნავს, არ წყვეტდა ბრძოლას სიმართლის დადგენამდე.
“ეს ფაქტი მაშინაც და დღესაც საზოგადოების ინტერესთა სფეროშია, უფრო მეტიც, ჩემს უფლებამოსილების შეწყვეტას პროტესტიც მოჰყვა. სწორედ ამიტომ, მოვალედ ვთვლი თავს, გარკვეული განმარტებები გავაკეთო ამ საკითხთან დაკავშირებით. გადაწყვეტილება იყო არაობიექტური, მიკერძოებული და არაკომპეტენტურ დასკვნაზე დაფუძნებული. პირველად 20 თებერვალს შევიტანე განცხადება საქალაქო სასამართლოში და 17 ივლისამდე მიმდინარეობდა საქმის განხილვა, ნამდვილად იყო იმისი განცდა, რომ სასამართლო გამოიტანდა პოზიტიურ გადაწყვეტილებას, მაგრამ მას შემდეგ, რაც გიორგი მარგველაშვილი დასახელდა პრეზიდენტობის ერთ-ერთ კანდიდატად, სასამართლომ გამოიტანა აბსოლუტურად ზედაპირული გადაწყვეტილება, რაც პირველივე სხდომაზეც შეეძლო გაეკეთებინა, მაგრამ ვფიქრობ, ვერ გარისკა. ახლა სააპელაციო სასამართლომ გააუქმა ეს გადაწყვეტილება და გაუქმდა აუდიტის დასკვნაც, რომლის აპელირებასაც ვცდილობდი ამ თვეების განმავლობაში”.
ლაგვილავას განცხადებით, აუდიტის სამსახურის დასკვნაზე სამინისტროს მიერ ბრძანება დაიწერა 17 იანვარს, სკოლას მიეცა გაფრთხილება და დაევალა სამეურვეო საბჭოს ერთი კვირის ვადაში, 25 იანვრამდე განეხილა საკითხი დირექტორის უფლებამოსილების ვადამდე ადრე შეწყვეტის თაობაზე. საბჭომ განიხილა ეს საკითხი და 25 იანვარს, ზუსტად 6 საათზე 13 გვერდიანი დასკვნა გადაეგზავნა როგორც აუდიტის სამსახურს, ასევე სამინისტროს.
“გადაგზავნიდან 15 წუთში ელექტრონულ ბაზაში აიტვირთა ეს დასკვდა და ისევ 15 წუთში მინისტრის ბრძანება ჩემი გათავისუფლების შესახებ. ლოგიკურია ვივარაუდოთ, რომ მათ არც განუხილიათ ეს დასკვნა და საერთოდაც არ აინტერესებდათ რა გადაწყვეტილებას მიიღებდა სამეურვეო საბჭო. წეღანაც აღვნიშნე, რომ გადაწყვეტილება იყო მიკერძოებული, ეს უგულვებელყოფა იყო დემოკრატიულად არჩეულ საბჭოზე საკმაოდ ძლიერი დარტყმა”.
აუდიტის თანამშრომლებმა ნოდარ წამალაშვილმა და თენგიზ წურწუმიამ არაკომპეტენტური დასკვნით შეცდომაში შეიყვანეს როგორც აუდიტის სამსახურის ხელმძღვანელობა, ასევე განათლების მინისტრი, თუმცა, იქვე დასძენს, რომ ეს არაფრით ამართლებს მინისტრის მიერ უკანანოდ მიღებულ, გადაუმოწმებელ გადაწყვეტილებას.
