როგორც ყოფა-ცხოვრება გვიჩვენებს, ბევრი დაეძებს და ინიშნავს ახალ თუ განახლებულ რეცეპტს.
გთავაზობთ დიდ-პატარასთვის საყვარელი ფუნთუშას (“ბულკი”) დამზადების რეცეპტს, რომელიც ადვილად გამოსაცხობი, ყველასთვის ხელმისაწვდომი და გემრიელია.
ერთ ულუფაში საკმაოდ ბევრი _ 25 ცალი ფუნთუშა გამოდის. განსაკუთრებით კარგია მისი გამოცხობა ზაფხულსა და შემოდგომაზე, როცა კრემიანი ნამცხვარი ნაკლებად სასურველია და ცხელ ღუმელთანაც ხანგრძლივი ტრიალი ყველა დიასახლისს აწუხებს, გარეთაც ბევრი საქმეა და სამზარეულოსთვის დროს ეკონომიურად ხარჯავენ.
საჭირო მასალა: ერთი ლიტრი გადადუღებული წყალი (უკეთესია რძე თუ გვექნება). ერთი კგ. შაქარი, ორი სუფრის კოვზი საფუარი, 400 გრამი ქიშმიში, სამი პაკეტი ვანილი, ცოტა მარილი, ორ კილოგრამამდე უმაღლესი ხარისხის ფქვილი. ქიშმიში წინასწარ დავალბოთ ცივ წყალში.
მომზადების წესი: მოზრდილ გობზე დავასხათ წყალი, ჩავყაროთ შაქარი, ვურიოთ და კარგად გავადნოთ. დავამატოთ საფუარი, ვანილი, მარილი და ქიშმიში, რომელიც დალბობის შემდეგ კარგად იქნება გაწურული. ყოველივე ამას ნელ-ნელა დავუმატოთ პურის ფქვილი. თვალით შევატყობთ, როცა საშუალო სისქის ცომი იქნება, ზელა შევწყვიტოთ, დავახუროთ და დავდგათ ასაფუებლად. ცალკე მოვამზადოთ ცხიმწასმული “ჟარონა”. ცომი როცა კარგად აფუვდება, ფქვილში მოვაგუნდაოთ საშუალო ზომის პატარა ბურთულები და “ჟარონაზე” მიჯრით დავაწყოთ. სტანდარტულ “ჟარონაზე” 16 ცალი ასეთი ფუნთუშა ცხვება. თუ მჭიდროდ არ დავაწყობთ და შუაში ან “ჟარონის” კიდეებთან არეს დავუტოვებთ, ცომი გაიშლება და მიიღებთ ბრტყლად გამომცხვარ მასას, რომელსაც ფუნთუშას შესახედაობა ნაკლებად ექნება. ასე გამზადებულს, ღუმელში შედგმამდე, ზედაპირზე სველი ხელი მოვუსვათ. გამოვაცხოთ საშუალო ტემპერატურაზე. გამოცხობის შემდეგ კი, როცა ღუმელიდან გამოვიღებთ, თითოეულ ფუნთუშას ზედაპირზე მოვუსვათ სიროფი, რომელიც ასე მზადდება: ერთი ჭიქა შაქარი გავხსნათ ორ ჭიქა წყალში და წამოვადუღოთ. შემდეგ დავამატოთ ვანილი და გავაგრილოთ. ფუნთუშას ზედაპირი პრიალა და რბილი იქნება. გახსოვდეთ, აუცილებლად იხმარეთ უმაღლესი ხარისხის ფქვილი.
