შეგახსენებთ, რომ გუშინ “სამოქალაქო პრესამ” გაავრცელა ვიდეომასალა, რომელშიც ვანო მერაბიშვილი, დათა ახალაია, ირაკლი კოდუა, შსს-ს ყოფილი მაღალი თანამდებობის პირები და მათი დაჯგუფების წევრები სპეცოპერაციას გეგმავენ. კადრებში ასევე ჩანს საქართველოს ყოფილი პრეზიდენტი მიხეილ სააკაშვილი, ყოფილი იუსტიციის მინისტრი ზურაბ ადეიშვილი, უფლებაშეჩერებული მერი გიგი უგულავა. ასევე, გადაუმოწმებელი ინფორმაციით, გენერალი ნაირაშვილი და სხვა მაღალი ჩინის სამხედრო პირები, რომლებიც დღესაც მაღალ პოსტებზე არიან. კადრები მუხროვანის საქმეს უკავშირდება.
ცნობისთვის, მუხროვანის მოვლენები 2009 წელს განვითარდა, რის შედეგადაც გარდაიცვალა გია კრიალაშვილი და მძიმედ დაიჭრა ორი ადამიანი. სისხლის სამართლებრივ პასუხისგებაში იქნენ მიცემული და გამამტყუნებელი განაჩენები დადგა მუხროვანის მოვლენებში მონაწილე რამდენიმე პირის მიმართ.
ზემოთ ხსენებული კადრების გავრცელების შემდგომ, მოგვიანებით, მთავარმა პროკურატურამ განაცხადა, რომ გავრცელებულ სპეცოპერაციის დაგეგმვის ამსახველ კადრებთან დაკავშირებით გამოძიება დაიწყო, რასაც მიესალმება საქართველოს ახალგაზრდა იურისტთა ასოციაციას.
ორგანიზაციაში აცხადებენ, რომ მერაბიშვილის მიერ სპეცრაზმელებისათვის მიცემული დავალება აშკარად შეიცავს დანაშაულის ნიშნებს.
“ვიდეო მასალის ავთენტურობის გარკვევის შემდეგ გამოძიებამ უნდა დაადგინოს, თუ როგორ დაიგეგმა მუხროვანის სპეცოპერაცია, როგორ მოხდა მისი განხორციელება და წინასწარ იქნა თუ არა მიზნად დასახული რომელიმე ადამიანის სიცოცხლის მოსპობა. გამოძიება უნდა წარიმართოს ყოველმხრივ და გაირკვეს არა მხოლოდ ივანე მერაბიშვილის ბრალეულობის საკითხი, არამედ ვიდეომასალაში ასახული სხვა პირების ქმედებაში არის თუ არა დანაშაულის ნიშნები.”
გავრცელებული ვიდეომასალის შემდეგ, დღეს ყოფილმა შს მინისტრმა განცხადება გააკეთა, სადაც აღნიშნა, რომ როცა ის ორ გვამზე საუბრობდა, მუხროვანის ამბოხში მონაწილე ორ რუს მრჩეველს გულისხმობდა.
“მე ის ჩანაწერი მახსოვს. კადრებში ეტყობა, რომ განცხადება ღია კამერების წინ კეთდებოდა. მე არ მრცხვენია, რომ ის განცხადება გავაკეთე. ეს იყო ჩემი მოვალეობა. მინდა მცირე დეტალს მივაქციო ყურადღება. ჩვენი ინფორმაციით მუხრავანის აჯანყებაში ორი რუსი მრჩეველი მონაწილეობდა და ასევე ჩვენივე ინფორმაციით შეთქმულების ორგანიზატორებმა კვალის დაკარგვის მიზნით მათი ლიკვიდაცია მოახდინეს. სწორედ ამ ორი ადამიანის გვამის პოვნის შესახებ ვამბობ კადრებში. ამით ვცდილობდით დაგვედგინა, რა კავშირი იყო ამბოხებულებსა და ორ რუს შორის”, _ განმარტავს მერაბიშვილმა.
ვანო მერაბიშვილმა ასევე პროკურატურას მოუწოდა, რომ გავრცელებული კადრები ნახონ და ობიექტურად გამოიძიონ საქმე.
“მე ვარ ცამდე მართალი. მე არასდროს არ გამიცია ბრძანება მკვლელობაზე”, _ განაცხადა მერაბიშვილმა.
შესაძლოა, თუ არა, რუსეთი დაინტერესებული ყოფილიყო საქართველოში სამხედრო ამბოხით და მასში თავისი წარმომადგენლები ჩაერთო? ასევე, სცენარის ასეთი განვითარების შემთხვევაში რამდენად რეალურია მოსაზრება, რომ კვალის დაფარვის მიზნით რუსეთს თავისი ინსტრუქტორების ლიკვიდაცია მოეხდინა, როცა მიხვდნენ, რომ ამბოხი ვერ შედგა?
არასამთავრობო ორგანიზაცია “სპეცსამსახურის საქმიანობაზე საზოგადოებრივი კონტროლი – საქართველოს ცენტრის” თავმჯდომარე ბესო ალადაშვილი “გურია ნისუთან” ამბობს რომ ცალსახად, ნაწილობრივ, შესაძლებელია მართლაც ასე ყოფილიყო.
“საქართველოში ეკონომიკური თუ პოლიტიკური სიტუაციის დალაგება რომელ ქვეყანას არ აწყობს? პასუხი გასაგებია, ძირითადი ქვეყანა ესაა ჩვენი ჩრდილოელი მეზობელი. მიმართავს თუ არა ის ამისთვის რაიმე ზომებს? რა თქმა უნდა, მას აქვს ძალიან ბევრი და მძლავრი ბერკეტი არა მხოლოდ ხელისუფლებაზე, არამედ ეკონომიკურ-პოლიტიკურ ცხოვრებაზე ზემოქმედების და იყენებს კიდეც. მაგრამ აქ არის ერთი მომენტი, რუსეთმა ღიად თავისი ძალისმიერი მეთოდი რაც უნდოდა 2008 წლის აგვისტოში გააკეთა, ამის შემდეგ რუსეთი თავის გეოპოლიტიკურ მიზანს აღწევს თავისი გავლენის აგენტების მეშვეობით, რომელიც საკმაოდ ჰყავს. მათ შორის საქართველოშიც”, _ ამბობს ალადაშვილი და დასძენს, რომ სიტუაცია მართლაც ასეთი სცენარით რომ განვითარებულიყო, გვამებზე ლაპარაკის მომენტში საკამათოა ვინმეს სცოდნოდა ეს რუსეთის მიერ იყო დაგეგმილი თუ არა.
“ძნელია პასუხი კითხვაზე – ვინ იყო დაინტერესებული ამით. ჩემი აზრით, დაწყებლი თუნდაც იგივე რუსეთის სპეცსამსაუხრებიდან, დამთავრებული ნაცმოძრობის ხელისუფლებიდან რომელიმე პიროვნებთ, რომელსაც პიროვნული უკმაყოფილება ჰქონდა და ამგვარად შურს იძიებდა.
ვფიქრობ, დაზუსტებით არაფრის თქმა შეიძლება, ეს გამოძიების საქმეა და მათ უნდა დაადგინონ რა კონკრეტული ოპერატიული მონაცემები ჰქონდათ”, _ ამბობს “გურია ნიუსთან” საუბრისას ალადაშვილი.
“სპეცსამსახურის საქმიანობაზე საზოგადოებრივი კონტროლი – საქართველოს ცენტრის” თავმჯდომარის თქმით, ზოგადად ამ ვიდეოკადრებმა აჩვენა, როგორ სასაცილო დონეზე იყო საქართველოში ოპერატიული მოქმედებების დაგეგმვა და განხორციელება.
“შეიძლება ასე ქუჩაში ამდენ ხალხთან ბრძანების გაცემა?! სამწუხაროდ ეს ნაციონალების ხელწერა იყო. სამწუხაროდ ბევრი დოკუმენტი ოპერაციების არ არსებობს”.
