ხათუნა სურგულაძე:
_ ჩემი პრენტეზია იმაში გამოიხატება, როდესაც მივედი განცხადების დასატოვებლად, აქედან დაიწყო ყველაფერი, რადგან ცოტა გართულდა განცხადების დატოვება. შემდეგ დამიკავშირდნენ და მითხრეს, რომ 22 იანვარს იქნებოდა გასაუბრება და მეც გამოვცხადდი. წინა დღეებში მოვიკითხე თუ რა თემებზე იქნებოდა საუბარი, ეს მოხდა პირად საუბარში მაკა ჭყონიასთან და მისგან მივიღე ასეთი პასუხი: იქნება კრიტიკულ სიტუაციებზე საუბარიო, კონკრეტულად, არ მიუთითებია საიტი, არც არაფერი უთქვამს, რაიმე დებულებისთვის რომ გადამეხედა. პრეტენზია მაქვს იმასთან დაკავშირებით, რომ ძალიან დიდი დროით ვიყავი შესული გასაუბრებაზე, სხვა კანდიდატები კი უფრო ადრე გამოდიოდნენ. შეგნებულად დავრჩი გასაუბრების ბოლომდე და გასაუბრების დრო არ იყო გადანაწილებული. ეს შეიძლება მათი კომპეტენციაა, მაგრამ ნამდვილად ასე იყო. კომისიამ, ალბათ, დადო დადგენილება, რომელიც ჩემთვის ამ ეტაპზე უცნობია, იმედია ეს დადგენილება მიეცემა კონკურსში მონაწილე კონკურსანტებს. ჩემი კანდიდატურა არ იქნა მიღებული, რომ წავსულიყავი ანასეულის ბაგა-ბაღის მენეჯერად, მაგრამ მე, საზოგადოების წევრს, მიჩნდება ეჭვი – რატომ დაინიშნა რაღაც შემთხვევაში ეჭვმიტანილი კადრი, ექთანი, საბავშვო ბაღის მენეჯერად.
_ იქნებ, კონკრეტულად გვითხრათ.
_ მონიტორინგი ჩატარდა 2013 წლის ნოემბრის თვეში, რომლის შედეგად ბაღში ორი ადამიანი გათავისუფლდა სამსახურიდან. მე შემიძლია, გაჩვენოთ მენიუები, სადაც ხელს აწერს ოთხი ადამიანი. ამ ოთხი ადამიანიდან ორი გათავისუფლდა სამსახურიდან, ერთს გამოეცხადა სასტიკი საყვედური, ექთანს კი, ჩემი აზრით, უნდა ჰქონდეს საყვედური. შეიძლებოდა კი ასეთი კანდიდატისთვის დაეჭირათ მხარი? გასაგებია, რომ დაიბლოკა ჩემი კანდიდატურა, მაგრამ კადრების მეტი რა არის. ჩემთვის, საზოგადოების რიგითი წევრისთვის, გაუგებარია, რატომ შეირჩა ის კანდიდატურა, რომელსაც ჰქონდა პრობლემები. მას დაუმტკიცდება თუ არა ეს ამბავი, უკვე სხვა თემაა, მაგრამ ხომ არის ამ საქმეში ეჭვმიტანილი.
_ კონკრეტულად შეგიძლიათ, გვითხრათ, რა მოხდა ანასეულის ბაგა-ბაღში? “გურია ნიუსისთვის” ცნობილია, რომ ხდებოდა საკვების მითვისება.
_ მე კონკრეტულად ამ საკითხთან დაკავშირებით ვერაფერს გეტყვით. ეს უნდა გითხრათ აიპ-ის წარმომადგენლებმა, რომლებმაც ჩაატარეს მონიტორინგი. მე ვიცი, რაც მოხდა კულუარულად. ერთი შემიძლია ვთქვა, რომ გადავხედე ნოემბრის თვის მენიუს.
ჩემი პოზიცია ასეთია, რომ ამ პოზიციაზე არ ვაპირებ დაბრუნებას, უბრალოდ, ძალიან შეურაცხყოფილი დავრჩი. 40 წელია, ანასეულში ვცხოვრობ, იქ დავიბადე და გავიზარდე, ანასეულის ყველა პრობლემას ვიცნობ. ჩემს გარდა ანასეულში ბევრი კადრია, მე ვარ ერთ-ერთი რიგითი, ანასეული მდიდარია კადრებით და ეს გასაუბრებაც ღიად უნდა გამოცხადებულიყო. ბევრს არც გაუგია, თორემ უფრო მეტი განცხადება შევიდოდა. ამის გაგება ჩემთვისაც შემთხვევით მოხდა.
მაკა ჭყონია, ოზურგეთის სკოლამდელი აღზრდის ცენტრის ხელმძღვანელი:
_ ვიცოდი, რომ ძალიან დიდი იყო კონკურენცია. ჩვენი წესდებიდან გამომდინარე, შემიძლია ამა თუ იმ ვაკანსიაზე დავნიშნო ესა თუ ის ადამიანი. მხოლოდ ხელმძღვანელებს ვნიშნავ წესდებიდან გამომდინარე, საკრებულოს თავმჯდომარესთან შეთანხმებით, მაგრამ დანარჩენი თანამშრომელი შემიძლია, დავნიშნო. რადგან დიდი იყო დაინტერესება, მე ვთხოვე საკრებულოს, წერილით მივმართე, რომ ჩაგვეტარებინა გასაუბრება და შეგვერჩია, ვინ იქნებოდა საუკეთესო.
_ ქალბატონო მაკა, დამკვირვებლებს შორის ვერ მოხვდნენ ჟურნალისტები, არადა თქვენ საკრებულოს სხდომაზე განაცხადეთ, რომ მედიის წარმომადგენლებიც დაესწრებოდნენ გასაუბრებას.
_ გასაუბრების დროს ისედაც დაძაბული არიან ადამიანები და ნერვიულობენ. დამკვირვებელი ძალიან ბევრი იყო, 11 ადამიანი. გადაღებები და ჩანაწერების გაკეთება გამოიწვევდა დაძაბულობას.
_ აქ არ არის საუბარი გადაღებაზე და ჩაწერაზე. ჩემს მიერ მოპოვებული ინფორმაციით, ქობულეთშიც ჩატარდა მსგავსი გასაუბრება და იქ მაგალითად ვიდეო კამერა იღებდა თითოეულ გამომსვლელს. აქ რატომ არ მოხდა თუნდაც ვიდეო ფირით გადაღება?
_ არ გვიფიქრია ამაზე, რომ ეს ჩაგვეწერა. 11 ადამიანი იყო და ყველას შერჩევის დროს გვქონდა ერთი აზრი.
_ 2013 წლის ნოემბერში მონიტორინგი ჩაატარეთ ანასეულის ბაღში, რის შემდეგაც გათავისუფლებული იქნა ორი ადამიანი, ერთი გააფრთხილეს. რაც შეეხება მეოთხე ადამიანს, ექთან ფიქრია თავართქილაძეს, გააფრთხილეს თუ არა? ეს ადამიანი გასაუბრების შედეგად დანიშნული იქნა ანასეულის ბაგა-ბაღის მენეჯერად.
_ ჩვენ მხოლოდ 2013 წელს არ ვატარებდით მონიტორინგს, ეს სხვა დროსაც ტარდებოდა და რამდენჯერმე მივეცით ამ ბაღის მენეჯერს და მნეს გაფრთხილება. ფიქრია თავართქილაძე იყო ექთანი ამ საბავშვო ბაღში. ფიქრია მხოლოდ მენიუს წერდა, შინაგანაწესიდან გამომდინარე. მენიუ როგორ მომზადდება, ეს უკვე არის მენეჯერის და მნეს პასუხისმგებლობა.
_ თუმცა, მას მენიუს დოკუმენტზე აქვს ხელი მოწერილი. მენიუს დოკუმენტზე კი ხშირად არის გადასწორებული ციფრები.
_ ეს არის საწყობის წიგნი, რომელიც არასწორად იყო ნაწარმოები, არასწორი ხარჯვა იყო. ხან ზედმეტი იყო პროდუქტი, ხან კიდევ ნაკლები. რაც უნდა ყოფილიყო, პასუხისმგებელი ამ ყველაფერზე მნე და მენეჯერი იყო და არა ექთანი.
რაც შეეხება ხათუნა სურგულაძეს, ჩვენ ყველა კანდიდატის მოსმენის შემდეგ ვაკეთებდით ჩვენს ჩანაწერებს. საერთოდ, ანასეულის ბაგა-ბაღის მენეჯერის პოსტზე სამ ადამიანს ჰქონდა პრეტენზია. სკოლამდელი აღზრდის გადამზადების ცენტრის დირექტორი, თეონა ქიმაშვილი, მან დაგვიტოვა ჩანაწერი, სადაც წერია, ის არის მენეჯერის პოზიციაზე, უმაღლესი განათლებით, სისტემის შესახებ ინფორმაციას ფლობს, კომუნიკაბელურობა აკლია, საკუთარი სუსტი მხარეების დასახელებისას გამოყოფს აფექტურობას (“გურია ნიუსი” დაუკავშირდა ხათუნა სურგულაძეს და მან გვითხრა, რომ მის სუსტ მხარეზე გასაუბრების დროს იხუმრა, რასაც მოყვა კომისიის წევრების გაღიმება. ავტ). ჩვენ მხოლოდ თეონას არ ვეთანხმებით.
_ ანუ, თქვენი თქმით, თერთმეტივე ადამიანმა ერთ ადამიანზე გააკეთა არჩევანი.
_ დიახ. თუ ვინმე არ ეთანხმებოდა ამ გადაწყვეტილებას, შეეძლოთ ამის შესახებ დაეფიქსირებინათ პოზიცია. ფიქრიას უპირატესობა ის იყო, რომ 2010 წლიდან მუშაობდა ბაღში და სამი წელი ექთნის პოზიცია ეკავა.
_ მენიუში რატომ არის შეცდომები?
_ რა შეცდომებია, მაჩვენეთ.
_ ჩვენ გაქვს ეს დოკუმენტები, სადაც ციფრების გადასწორება დასტურდება. აქ საუბარია 2013 წლის ნოემბრის დოკუმენტზე.
_ ის არის ყოველდღიური მენიუ, რაშიც გადასწორებები არის, რომელსაც ადგენდა მნე და აკონტროლებდა მენეჯერი. ვთქვათ ის, რომ იქ ციფრი გადაასწორო, შეიძლება გაასწორო, მაგრამ მთავარია, სწორად გახარჯო მენიუ. დარღვევა იყო და ამიტომაც მოხდა ის, რაც მოხდა.
_ აქედან გამომდინარე, თქვენ რით ამტკიცებთ, რომ ამ დარღვევის შესახებ მეოთხე ადამიანმა არაფერი იცოდა?
_ რის შესახებ უნდა სცოდნოდა?
_ ბაგა-ბაღში პრობლემა რომ იყო.
_ ექთანი აქ არაფერ შუაში იყო. რა პრობლემები იყო?
_ თქვენ ხომ გვითხარით, დარღვევები აღმოჩნდა საწყობში და გათავისუფლდა ორი ადამიანი.
_ კი, ასე იყო.
_ ამას გეკითხებით, რომ ბაღში არსებული პრობლემის შესახებ ხომ შეიძლებოდა ინფორმირებული ასევე ექთანიც ყოფილიყო.
_ მე რომ მეფიქრა, რომ ექთანს ამ ყველაფერში ცოტათი მაინც წვლილი ექნებოდა შეტანილი, რა თქმა უნდა, მოხდებოდა რეაგირება. მაგალითად, მზარეულს მივეცით სასტიკი საყვედური და მას ახლა ვაკვირდებით, ასევე ორი თვის განმავლობაში იმ ადამიანებსაც დავაკვირდებით, რომლებიც გასაუბრების შედეგად იქნა შერჩეული. თუ ვერ გაართმევენ თავს, ყველა ადამიანი შეიცვლება.
_ ჩვენს მიერ მოპოვებული ინფორმაციით, ვაკიჯვრის საბავშვო ბაღის მენეჯერად ოზურგეთის მუნიციპალიტეტის გამგებლის მოვალეობის შემსრულებლის, კონსტანტინე შარაშენიძის მეუღლის ძმის ცოლი დაინიშნა. ერთ-ერთი კონკურსანტი გასაუბრებრამდე ამბობდა ჩვენთან საუბრის დროს, რომ ეს ადგილი ამ ქალბატონისთვის იყო განკუთვნილი.
_ არ შეიძლება ასე, ადამიანი არის ვიღაცის ნათესავი და ის არის კარგი სპეციალისტი, კარგად ერკვევა მის საქმეში და ამის გამო არ უნდა დაინიშნოს თანამდებობაზე? ამის გამო არ უნდა დაიჩაგროს ადამიანი, ნამდვილად შემიძლია ვთქვა, რომ კარგი კანდიდატურა იქნა შერჩეული.
“გურია ნიუსისთვის” ცნობილი ხდება, რომ ოზურგეთის მუნიციპალიტეტის საკრებულო აპირებს ცვლილებებს, რის განხორციელების შედეგად, აიპ-ში ნებისმიერ ვაკანტური ადგილის შესავსებად კონკურსი ჩატარდება.
გამოცემა ამ საკითხთან დაკავშირებით მუშაობას აგრძელებს.
