პირველი ტესტი მან “წარმატებით” ჩააბარა და ქალაქის ცენტრში შეკრებილ საზოგადოებას დაუმტკიცა, რომ წარმოდგენა არ აქვს საჯარო სივრცეში ქცევისა და კანონით დადგენილი წესების შესახებ.
რაც შეეხება ჟურნალისტებთან ურთიერთობის ფორმებსა და ეთიკის ნორმებს, ამაზე ის აუდიოჩანაწერი მოწმობს, რომელსაც ამ მასალაში წარმოგიდგენთ.
კახა ვადაჭკორიას პროტესტი “გურია ნიუსის” ოზურგეთის ბიუროს ჟურნალისტის, გიორგი გირკელიძის მიერ ფოტოს გადაღებამ გამოიწვია. ჟურნალისტმა მას, იქვე მდგომ შსს-ს გურიის სამხარეო მთავარი სამმართველოს უფროსს გოჩა ფერსაშვილს და მის მოადგილეს გურამ ასათიანს ფოტო გადაუღო. ფოტოს გადაღება მხოლოდ ახლად დანიშნულმა მაღალჩინოსანმა კახა ვადაჭკორიამ გააპროტესტა. სხვა მაღალჩინოსნებს მისი ხმამაღალი საუბარი ჟურნალისტებთან არც გაუპროტესტებიათ და არც ის აუხსნიათ, რომ საჯარო სივრცეში ფოტოს გადაღება არ გვეკრძალებოდა – იდგნენ და და მშვიდად უყურებდნენ ამ პროცესს.
_ რა არის ახლა, რა წესია ეგ? _ ასე დაიწყო ჩვენთან საუბარი ვადაჭკორიამ.
_ მე ვარ გიორგი გირკელიძე, “გურია ნიუსის” ჟურნალისტი…
_ მერე?
_ მაქვს უფლება, რომ ფოტო გადაგიღოთ. შემიძლია გადაგიღოთ ფოტო საჯარო სივრცეში.
_ რატომ მომნახე და გადამიღე?
_ ეს არ არის საჯარო სივრცე?
_ საჯარო სივრცეს გააჩნია. რა წესია, არ უნდა მკითხო?
_ მე ვარ ჟურნალისტი და ჩემი პროფესიით ვმუშაობ…
_ მერე რა, რომ ჟურნალისტი ხარ? ხარ უბრალო ადამიანი, უნდა მოსულიყავი და გეთქვა, გადაგეღო თუ არა…
_ რატომ, რა პრობლემაა?
_ ძალიან ცუდად მოიქეცი, გადამიღე ფოტო, მასე ნუ გააკეთებთ-მეთქი გეუბნები!
_ ბატონო კახა, მე ცუდად არაფერი გამიკეთებია..
_ აბა გადამიღე, – მიმართა ამის შემდეგ კახა ვადაჭკორიამ “გურია ნიუსის” მეორე ჟურნალისტს ჟანა მეგრელიშვილს.
_ და რომ გადაგიღოთ, მერე რა?
_ ვერ გადამიღებთ.
_ რატომ?
_ ვერ გადამიღებთ და იმიტომ. არ მაქვს სურვილი და იმიტომ, აღიარე, რომ ცუდად გააკეთე
_ მე ფოტო გადავიღე, ცუდად არ მოვქცეულვარ…. ბატონო კახა, თუ შეიძლება თქვენი თავი წარმოგვიდგინეთ..
_ არა.
_ თქვენ კონტრდაზვერვის დეპარტამენტის გურიის სამსახურის უფროსი ბრძანდებით, გუშინ მოხდა თქვენი წარდგენა ოფიციალურად, ძალიან ცუდია, რომ ასეთი ურთიერთობით დაიწყეთ ჟურნალისტებთან.
_ თქვენ ძალიან ბევრი რამ გცოდნიათ.
_ თქვენი საქმიანობის შესახებ, დიახ. ბატონო კახა, თქვენ ადრე კარგი ურთიერთობა გქონდათ ჟურნალისტებთან; ეტყობა, ახლა შეცვლილია სიტუაცია? რატომ მიიღეთ ცუდად ფოტოს გადაღება?
_ თქვი ახლა, აღიარე, რომ მოხვედი, შემხედე და ფოტო გადამიღე.
ვადაჭკორიას ჟურნალისტებმა იქვე შეახსენეს, რომ საჯარო სივრცეში, საჯარო პირისთვის ფოტოს გადასაღებად მისი საგანგებო თანხმობა სულაც არაა საჭირო, რადგან ჟურნალისტები პროფესიულ მოვალეობას ასრულებენ და ამგვარი თავდასხმა საქმიანობაში ხელშეშლად შეიძლება იქნას მიჩნეული, რაც, საქართველოს კანონმდებლობით დასჯადი ქმედებაა.
ვადაჭკორიას ჟურნალისტებმ იქვე სულ ცოტა ხნის წინანდელი დროც შეახსენეს, როცა საჯარო მოხელეები და ვადაჭკორიას კოლეგები რეპორტიორებს კამერებიდან გადაღებულ ფოტო და ვიდეოკადრებს უშლიდნენ. თუმცა, თუ ვადაჭკორიას პოლიტიკურ ღირებულებებს გავიხსენებთ, ამგვარი ქმედება მისგან სულაც არაა გასაკვირი. გასაკვირი ისაა, თუ როგორ ხვდებიან ამგვარი პოლიტიკურ-საარჩევნო წარსულის მქონე პირები ახალი ხელისუფლების პირობებში თანამდებობებზე.
შსს კონტრდაზვერვის დეპარტამენტის გურიის სამსახურის უფროსად ოზურგეთელი კახა ვადაჭკორია ოფიციალურად 9 მაისს დაინიშნა.
“გურია ნიუსის” ინფორმაციით, ის ძალოვან სტრუქტურაში საკმაოდ მაღალ თანამდებობებზე მუშაობდა. იყო უშიშროების თანამშრომელი ჩოხატაურსა და ოზურგეთში, მოკლე დროით ოზურგეთის პოლიციის უფროსი, იყო ასევე ფოთის უშიშროებაში უფროსის მოადგილე, მუშაობდა გორის საფინანსო პოლიციის სამმართველოს უფროსის მოადგილედ, ბოლოს კი ფოთის საფინანსო პოლიციის უფროსი იყო. აღსანიშნავია, რომ კახა ვადაჭკორია, ჩვენი წყაროს ინფორმაციით, ბოლო წლებში აქტიურად ხელმძღვანელობდა და ერეოდა წინასაარჩევნო პერიოდში, წინა ხელისუფლებისთვის ხმების შესაგროვებლად. ამ ინფორმაციას თავად ვადაჭკორია “გურია ნიუსთან” არ ურყოფს და აღნიშნავს, რომ მისი მეუღლე იყო სახელმწიფო მოხელე და საპარლამენტო არჩევნებში მიკროკოორდინატორად მუშაობდა.
_ ბატონო კახა, როგორც ვიცით, დაინიშნეთ კონტრდაზვერვის გურიის სამსახურის უფროსად…
_ დიახ.
_ ბატონო კახა, თუ შეიძლება გვითხრათ, თქვენი საქმიანობის შესახებ, სად მუშაობდით აქამდე?
_ბოლოს ვმუშაობდი ფინანსთა სამინისტროს საგამოძიებო სამსახურში, სამეგრელო-ზემო სვანეთში..
_ ასევე მუშაობით რამდენიმე წლის წინ ოზურგეთში უშიშროებაში, პოლიციაში…
_დიახ, დიახ. რა არის იცი, ჩემო კარგო? მე ვარ სპეცსამსახურის თანამშრომელი და ძალიან გთხოვთ რა, არ მაქვს არანაირი საუბრის უფლება და მეტს ვერაფერს გეტყვით..
_ მაშინ ერთ რამესაც გკითხავთ: ჩვენი ინფორმაციით, თქვენ კარგა ხნის განმავლობაში აქტიურად იყავით ჩართული “ნაციონალური მოძრაობის” მხარდასაჭერად არჩევნებში; ასევე აქტიური მხარდამჭერი იყო თქვენი მეუღლეც, რომელიც ბაღის გამგეა… უფრო მეტიც, ბოლოს საპარლამენტო არჩევნებისთვის სახლში “ნაციონალების“ შტაბი გქონდათ გახსნილი…
_ როგორც ასეთი შტაბი გახსნილი ნამდვილად არ მქონდა, როგორ გეკადრებათ. ჩემი მეუღლე, კი ბატონო, იყო სახელმწიფო მოხელე და იყო მიკროკოორდინატორი საპარლამენტო არჩევნებში; ისეთი რომ შტაბი ყოფილიყო, ეს არ ყოფილა ნამდვილად. სხვათაშორის, არც გვიაქტიურია არჩევნების ბოლო თვეს, ვერავინ იტყვის იმას, რომ კახა ვადაჭკორია უხეშად ჩაერია არჩევნებში ან ვინმეს ძალა დავატანე. მითუმეტეს იმ გავრცელებული ციხის კადრების შემდეგ, რატომ მეკითხებით ასეთ რაღაცას, რას ნიშნავს ეგ თქვენი მხრიდან? _ ასე უპასუხა “გურია ნიუსის“ კითხვებს ვადაჭკორიამ რამდენიმე დღის წინ.
