“მაგ საკითხზე მიმდინარეობს მუშაობა. ბიზნესომბუდსმენი ძალიან აქტიურად არის ჩართული და თანამშრომლობს კომპანიებთან და მე მგონი, რომ ყველაფერი ისე გადაწყდება, მისაღები იქნება ყველასთვის და საზოგადოებისათვისაც გასაგები გახდება. აი ასეთი მოკლე პასუხი გაგეცით, რამეთუ კითხვაში უკვე ბევრი ისმოდა, ბევრი მინიშნება იყო და გასაგები იყო კითხვაში უკვე. ბიზნესის დაცვა, როგორც ადრე მოგახსენეთ, ისევე გაგრძელდება და ისევე ვარ სადარაჯოზე.
გუშინ ბანკირებსაც შევხვდი და არავითარი კითხვა არ აქვთ – კარგად იცით, რა ხდება ბაზარზე, რა ხდება ბიზნესში, ხომ არ ხდება სახელმწიფოს, ჩინოვნიკების მხრიდან ჩარევა? მსგავსი შეკითხვები უკვე აღარ არსებობს. ამ მხრივ გარდატეხა მოხდა, მაგრამ ამის მსგავსი კითხვები იქნება სულ, ეს ნორმალურია. თქვენ ნუ გგონიათ, რომ მარტო საქართველოში ისმის ეს კითხვები და არ ისმის განვითარებულ ევროპაში. შესატყვისი გადაწყვეტილება იქნება მიღებული. მათთან მუშაობა მიმდინარეობს და ბიზნესმენები აქტიურად არიან ჩართულები. გარწმუნებთ, რომ გადაწყვეტილება იქნება ნორმალური.” _ ასეთი განმარტება პრემიერმა 14 მაისს მედიასთან გამართული შეხვედრის დროს “გურია ნიუსთან” გააკეთა.
ჩვენი კითხვა არაალკოჰოლური სასმელების მარკირებას და იმ კანონს ეხებოდა, რომელიც წინა ხელისუფლების დროს მიიღეს, მაგრამ დღესაც არ შეცვლილა მიუხედავად იმისა, რომ კანონში შეტანილი ცვლილების თანახმად, შემოდის მე-6 სახის გადასახადი, რაც წინააღმდეგობაში მოდის გადასახადების შესახებ საკონსტიტუციო და ორგანული კანონით “ეკონომიკური თავისუფლების შესახებ” (2011), გათვალისწინებულ გარანტიებთან, რომელთა თანახმად 2013 წლის ოქტომბრისთვის იარსებებს მხოლოდ შემდეგი გადასახადები, კერძოდ: 1. საშემოსავლო გადასახადი; 2. დღგ; 3. ქონების გადასახადი; 4. იმპორტის გადასახადი; 5. აქციზი.
სიქპა-ზე (ეს სწორედ შვეიცარული კომპანიაა, რომელიც 2012 წლის 03 თებერვალს, 2011 წლის 10 ნოემბერს გამოცხადებულ კონკურსში გამარჯვებულად გამოცხადდა) განპიროვნებული “ფარული აქციზი” არ განეკუთვნება გადასახადს, შესაბამისად, არც მისი არსებობაა შესაძლებელი.
რადგან პრემიერმა თავის პასუხში ორჯერ ახსენა ბიზნესომბუდსმენი, გადავწყვიტეთ, ადრესატისთვის გვეკითხა, რა ეტაპზეა ამ დროისთვის საკითხის შესწავლა.
გიორგი გახარიამ ამ საკითხზე ვრცელი კომენტარის გაკეთებისგან თავი შეიკავა და განაცხადა, რომ ჯერ ყველა მხარის პოზიცია სათანადოდ არ შეუსწავლია:
“ამ საკითხთან დაკავშირებით ამ დღეებში ჩვენ შეხვედრა გვაქვს არაალკოჰოლური სასმელების მწარმოებლების ასოციაციასთან და მირჩევნია მერე გავაკეთო კომენტარი, რაც მათ შევხვდები და პოზიციას მოვისმენ.
_ თქვენ უკვე დაწყებული გაქვთ ამ საკითხის შესწავლა? პრემიერმა ორჯერ გახსენათ, საქმის კურსშიაო.
_ დიახ, დაწყებული გვაქვს, უბრალოდ ყველა მხარის არგუმენტი არ გვაქვს. სანამ ყველა მხარეს არ მოვუსმენთ, რთულია საუბარი.
_ რადგან პრემიერმა გახსენათ, გამოდის ამ ეტაპზე სახელმწიფოს არგუმენტები უფრო გაქვთ შესწავლილი?
_ დიახ, დიახ. მეორე მხარის არგუმენტებიც ვიცით, მაგრამ კონსოლიდირებული არგუმენტები არ ვიცით, რადგან სხვადასხვა კომპანიებია, სხვადასხვა ინტერესები აქვთ.
_ როდის გაქვთ დაგეგმილი შეხვედრა არაალკოჰოლური სასმელების მწარმოებელთა კომპანიასთან?
_ ხუთშაბათს 10:00 საათზე. შეხვედრა რამდენიმე საათი გაგრძელდება და შემდეგ უფრო კონკრეტული პასუხის გაცემა შემეძლება.
შეგახსენებთ, რომ ამ კანონის ამოქმედებიდან (რომელიც ამჯერად ფინანსთა მინისტრის, ნოდარ ხადურის სიტყვიერი განცხადების საფუძველზე დროებითაა შეჩერებული. ავტ) სულ მალე, “ზედაზენი”, “ბორჯომი,“ „ზანდუკელი“, “რაჭის წყაროები”, “ნაბეღლავი,“ “კოკა-კოლა,” “პეპსი,“ “საირმე”, “სნო”, “ნატახტარის ლიმონათი” და ყველა სხვა არაალკოჰოლური სასმელის ფასი, რომელიც აქამდე ხელმისაწვდომი იყო თითქმის ყველა მომხმარებლისთვის, საგრძნობლად გაძვირდება.
