სოფელ მელექედურის საჯარო სკოლის დირექტორი, ნათელა თოხაძე “გურია ნიუსთან” სატელეფონო საუბრის დროს ამბობს, რომ ის ახალგამოცხადებულ კონკურსში მიიღებს მონაწილეობას. მისივე თქმით, გასაუბრებაზე ოზურგეთიდან 7 კონკურსანტი გადავიდა, მაგრამ საბოლოო შედეგის გამოცხადების დროს ცნობილი გახდა, რომ ოზურგეთში კონკურსი თავიდან გამოცხადდა.
_ შვიდი კონკურსანტიდან ერთ-ერთი ლანჩხუთის საგანმანათლებლო რესურსცენტრის დირექტორად დაინიშნა, რაც შეეხება დანარჩენ ექვსს, არ ვიცი რა მოხდა, ასეთი არადამაკმაყოფილებელი პასუხები იყო თუ ყველა კარგი იყო და ამის გამო ვერ აარჩიეს გამარჯვებული ვერ გეტყვით, ყოველშემთხვევაში კონკურსი თავიდან გამოცხადა და რას ნიშნავს ეს, ვერ ვხვდები._ გვითხრა ნათელა თოხაძემ.
ოზურგეთის საგანმანათლებლო რესურსცენტრის დირექტირი, ირინა ინარიძე, რომელიც კონკურსში მონაწილეობდა ამბობს, რომ ის მოვლენებს განვითარებას დაელოდება.
_ ქალბატონო ირინა, თქვენი აზრით კომისიამ სამართლიანი გადაწყვეტილება მიიღო?
_ ვერ გეტყვით, ასე ჩათვალა სამინისტრომ და მეტს ვერაფერს გეტყვით.
_ როგორც ცნობილია, ახალი კონკურსი ცხადდება და აპირებთ მონაწილეობას?
_ დაველოდოთ მოვლენებს.
“გურია ნიუსი” კიდევ ერთ კონკურსანტს ქეთევან მოსახლიშვილს დაუკავშირდა, რომელიც ამბობს, რომ მას ჯერ არ აქვს გადაწყვეტილება მიღებული, მიიღებს თუ არა ახალ კონკურსში მონაწილეობას: – არაფრის თქმა არ შემიძლია, ახლა ვნახე ინტერნეტში და ძალიან ბევრ მუნიციპალიტეტში არ არის შერჩეული გამარჯვებული, მხოლოდ 21 მუნიციპალიტეტიდან არის შერჩეული, _ განაცხადა ქეთევან მოსახლიშვილმა.
რაც შეეხება კიდევ ერთ კონკურსანტს, ოზურგეთის რესურსცენტრის ყოფილ დირექტორს, ლელა იმედაშვილს, ის “გურია ნიუსთან” კომენტარს არ აკეთებს.
