ამის შესახებ ნინო ბურჯანაძემ კავკასიის საერთაშორისო უნივერსიტეტის სტუდენტებთან და პროფესორ-მასწავლებლებთან შეხვედრის დასრულების შემდეგ განაცხადა ჟურნალისტის შეკითხვაზე, თუ რა კომენტარს გააკეთებდა ის
“პრაიმ-თაიმში” პრემიერ-მინისტრის მიერ 26 მაისის მოვლენებთან და მის პასუხისმგებლობასთან დაკავშირებით გაკეთებულ განცხადებაზე.
“მე ზუსტად ისე მივიღე ეს განცხადება, როგორც იყო ნათქვამი და როგორც განმარტა გუშინ ბიძინა ივანიშვილმა და არჩილ კბილაშვილმა, ანუ თუ მომავალში ვინმეს მიმართ, ეს იქნება მომქმედი თუ ყოფილი პრეზიდენტი, პარლამენტის თავმჯდომარე, პრემიერ-მინისტრი ან ნებისმიერი მოქალაქე, იქნება რაიმე დასაბუთებული ეჭვი დანაშაულებრივი მოქმედებისა, რა თქმა უნდა, ნებისმიერი ადამიანი უნდა წარსდგეს მართლმსაჯულების წინაშე და არავინ არ უნდა სარგებლობდეს იმუნიტეტით”,- განაცხადა ნინო ბურჯანაძემ.
მისი თქმით, ძალიან სწორი იყო, რომ გუშინვე პრემიერ-მინისტრმა და მთავარმა პროკურორმა ეს განმარტეს.
როგორც ნინო ბურჯანაძემ აღნიშნა: “საერთოდ, უკეთესი იქნებოდა, ჟურნალისტებმა კონტექსტს მეტი ყურადღება მიაქციონ და უადგილო აჟიოტაჟი არ ატეხონ იქ სადაც ამის საფუძველი არ არსებობს”.
