ეს ფაქტი დადასტურებულია. თუმცა დავით დაღელაშვილის პრემიის ოდენობის შესახებ ინფორმაციას მერია მკაცრად ასაიდუმლოებს.
“გურია ნიუსმა” 10 მაისს ჩუღურეთის რაიონის გამგებელს დავით დაღელაშვილს წერილით მიმართა. გვაინტერესებდა 2013 წლის 1 იანვრიდან დღემდე ჩუღურეთის რაიონის გამგებელსა და გამგეობის თანამშრომლებზე (სახელებისა და გვარების მითითებით) რამდენჯერ და რა ოდენობით პრემიები გაიცა.
ჩუღურეთის გამგებელმა დაღელაშვილმა პასუხად გვაცნობა, საჯარო მოსამსახურეებზე გაცემული პრემიების ოდენობის და გამგებელსა და გამგეობის სტრუქტურული ერთეულების ხელმძღვანელ პირებზე გაცემული პრემიების შესახებ ინფორმაციის მისაღებად, უნდა მიმართოთ ქალაქ თბილისის მერიასო.
წერილთან ერთად ჩუღურეთის გამგებელმა გამოგვიგზავნა ინფორმაცია გამგეობის თანამშრომლებზე გაცემული პრემიების შესახებ. აღმოჩნდა, რომ 2013 წლის მარტში გამგეობის 35 თანამშრომელს 6 795,00 ლარი, ხოლო 2013 წლის აპრილის თვეში 6 805,00 ლარი აუღიათ პრემიის სახით.
13 მაისს ანალოგიური შინაარსის წერილით თბილისის მერიასაც მივმართეთ.
30 მაისს, “გურია ნიუსმა” თბილისის მერიის საჯარო ინფორმაცის გაცემის უზრუნველყოფაზე პასუხისმგებელმა პირის ოთარ ტატალაშვილისგან წერილის პასუხი მიიღო, სადაც წერია:
“თქვენს მიერ, საჯარო ინფრომაციის მოთხოვნით, ქ თბილისის მერიაში შემოტანილი 2013 წლის 13 მაისის №11 განცხადების პასუხად გაცნობებთ, რომ ქ. თბილისის ჩუღურეთის რაიონის გამგეობა შეიქმნა 2013 წლის 1 მარტს, ქ. თბილისის საკრებულოს 2013 წლის 25 იანვრის №1-4 გადაწყვეტილების საფუძველზე. ასევე გაცნობებთ, რომ აღნიშნული რაიონის გამგებელსა და მის მოადგილეებზე მიმდინარე წელს პრემიები არ გაცემულა.“
წერილის მიღებიდან მეორე დღეს, დაგვიკავშირდა ბატონი ოთარ ტატალაშვილი და გვითხრა, რომ მათ მიერ გამოგზავნილ წერილში შეცდომა გაიპარა და ახალ წერილს გამოგვიგზავნიდა.
31 მაისს, თბილისის მერიიდან მივიღეთ ახალი წერილი, სადაც წერია:
“2013 წლის 30 მაისის თქვენთვის გამოგზავნილ №07/53319-7 საპასუხო წერილში დაშვებული იქნა შეცდომა, რის გამოც დამატებით გაცნობებთ, რომ მიმდინარე წელს ქ.თბილისის ჩუღურეთის რაიონის გამგებელსა და მის ორ მოადგილეზე პრემია გაიცა 18 600 ლარის ოდენობით.”
როგორც აღმოჩნდა, დეპუტატ ნადირაშვილის ქმარი პრემირებული ყოფილა, თუმცა თბილისის მერიიდან ვერ მივიღეთ სრულყოფილი პასუხი სახელებისა და გვარების მითითებით, რამდენი აიღო პრემია გამგებელმა და მისმა მოადგილეებმა.
ამასთან დაკავშირებით “გურია ნიუსი” თბილისის მერიის საჯარო ინფორმაციის გაცემისა და უზრუნველყოფაზე პასუხისმგებელ პირს ოთარ ტატალაშვილს დაუკავშირდა, რომელმაც განგვიცხადა, რომ წერილს თავიდან თუ გავგზავნიდით, ამ შემთხვევაში თავიდან გაგვცემდნენ პასუხს.
როდესაც ტატალაშვილს ვკითხეთ, ერთიდაიგივე შინაარსის წერილით 2-ჯერ რატომ უნდა მიგვემართა, მისგან ასეთი პასუხი მივიღეთ: “ჰო. გავიგე. გაქვთ ალბათ საკმარისი გამოცდილება და მე მგონი იცით, როგორ უნდა მოიქცეთ. შემიძლია გითხრათ გამგებლის და მისი მოადგილეების სახელები და გვარები. ეს არის აკაკი დარასელია, გიორგი რობაქიძე და გამგებელი დავით დაღელაშვილი. ეს არის ის ინფორმაცია რაც მომაწოდეს.”
