ამის მიზეზი კი ბაღში შესაბამისი პირობების არქონაა. თავდაპირველად, საბავშვო ბაღი სოფლის ცენტრში მდგარ ორსართულიან შენობაში იყო განთავსებული, მაგრამ, დროთა განმავლობაში, ის ამორტიზირებული გახდა და ხელისუფლებამ ბავშვებისთვის ახალი შენობა ააშენა, მაგრამ რა დანიშნულება აქვს შენობის ოთხ პატარა ოთახს, დღემდე გაურკვეველია _ იქ არც სათამაშო ოთახის, არც სასადილოს და არც საძინებლის მოთავსება არ არის შესაძლებელი, თანაც ეს ოთახები მიდგმულია კომუნისტურ პერიოდში აშენებულ შენობაზე, რომელსაც, თავის დროზე, შხამქიმიკატების შესანახად იყენებდნენ. დღეს ამ ძველი ნაგებობის ერთი ოთახი გამოყენებულია საძინებლად, სასადილოდ და სათამაშოდაც, რაც, ვფიქრობთ, მიუღებელია და სასწრაფოდ ზომების მიღებაა საჭირო.
ერკეთის თემში შედის სოფელი ქვემო ერკეთიც, სადაც საბავშვო ბაღის ასაკის 18 ბავშვია. მათი მშობლები სოფელში საბავშვო ბაღის გახსნას მოითხოვენ. ქვემო ერკეთში არც ბაღის შენობის პრობლემა არ არის _ შენობა, რომელშიც აქ წლების წინ ბაღი ფუნქციონირებდა, ისევ დგას.
ჩვენ გამოვკითხეთ სოფლის მოსახლეობა. მათი აზრით, საბავშვო ბაღის გახსნით სოფლისთვის ძალიან სასიკეთო საქმე გაკეთდება. ასეთ შემთხვევაში აღსაზრდელები მშობლებმა შეიძლება, ატარონ ერკეთიდანაც და გუთურიდანაც. ერკეთის ტერიტორიული ორგანოს რწმუნებული, კახა თედორაძე მიიჩნევს, რომ კოხში საბავშვო ბაღი არ უნდა დაიხუროს: _ ძალიან მინდა, რომ კოხში საბავშვო ბაღი არ გაუქმდეს. იგი სოფლისთვის აუცილებელია. რაც შეეხება ქვემო ერკეთს, ბაღის გახსნას მივესალმები. იქ ამისთვის შენობაც გამოინახება. ზაფხული საუკეთესო დროა იმისთვის, რომ ხელისუფლებამ ამ საქმეს ხელი მოჰკიდოს და საქმე დაიძრას. სექტემბრიდან კი შესაძლებელი იქნება, ახალი საბავშვო ბაღი გავხსნათ, _ თქვა თედორაძემ.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
