ბარათაშვილი სამართალდამცავ ორგანოებს ბრალდებულებზე ზეწოლასა და არაადამიანურ მოპყრობაში ადანაშაულებს. მისი განცხადებით, რამდენიმე ბრალდებული უმძიმეს პირობებში გადაიყვანეს.
“ბრალდებულები გადაიყვანეს ბევრად უარეს პირობებში, ზოგიერთი მათგანის ჯანმრთელობა კრიტიკულია და მათ სიცოცხლეს, შესაძლოა, საფრთხე დაემუქროს,” _ აცხადებს ბარათაშვილი.
ადვოკატის განცხადებით, ბრალდებულებისთვის ადგილის შეცვლა მხოლოდ ერთ რამეს ემსახურება, პროკურატურას არ აქვს არანაიტრი მტკიცებულება, ბრალდება დაუსაბუთებელია:
“ჯერ მოითხოვე წინასაწარი სასამართლო სხდომის 19 აგვისტომდე გადავადება. სასამართლომ მათი მოთხოვნა ნაწილობრივ დააკამყოფილა, წინასასამართლო სხდომა 5 აგვისტომდე გადაიდო, შემდეგ მათზე დაიწყეს ყოვლად დაუშვებელი მეთოდებით მოქმედება,” _ ამბობს სოსო ბარათაშვილი.
ადვოკატის მიერ გუშინ გაკეთებულ დაახლოებით ამ შინაარსისვე განცხადებას პროკურატურა მალევე გამოეხმაურა.
“ადვოკატ სოსო ბარათაშვილის განცხადება იმის თაობაზე, რომ ბოლო დღეების განმავლობაში ბრალდებულ მამუკა ივანიაძესთან ხორციელდებოდა არასაპროცესო მოქმედებებით მუშაობა, არის სრული სიცრუე. არათუ ბოლო დღეებში, არამედ ბრალდებულ მ. ივანიაძის საპყრობილეში მოთავსების დღიდან, არც ერთი პროკურორი და გამომძიებელი არ ყოფილა მასთან. ასევე სიცრუეა ადვოკატ ბარათაშვილის განცხადება იმის თაობაზე, რომ ბრალდებულის განცხადება გადაიგზავნა შსს ანტიკორუფციულ სააგენტოში. მითითებული განცხადება შემოსულია პროკურატურაში, რადგან პროკურატურა არის განცხადების ადრესატი და არ გადაგზავნილა არსად.
მაშინვე, როდესაც საქმის მწარმოებელი ორგანოსათვის ცნობილი გახდა, რომ ბრალდებული მამუკა ივანიაძე ითხოვდა პროკურორთან შეხვედრას, სწორედ მისი უფლებების, კერძოდ დაცვის უფლების სრულყოფილად განხორციელების მიზნით, გამოძიების მიერ მოხდა მისი სამივე ადვოკატის ს. ბარათაშვილის, რ. კირკიტაძისა და ი. ჯანაშვილის ინფორმირება იმის თაობაზე, რომ მონაწილეობა მიეღოთ ბრალდებულთან ჩასატარებელ საპროცესო მოქმედებებში.
ბრალდებულთან შეხვედრამდე მამუკა ივანიაძემ განცხადებით მომართა პროკურატურას, რომლითაც ის უნდობლობას უცხადებდა ადვოკატ სოსო ბარათაშვილს და მის საადვოკატო ბიუროს.
აღნიშნული განცხადების თაობაზე ადვოკატი სოსო ბარათაშვილი ინფორმირებული იქნა საპყრობილეში ყოფნის დროს.
ნაცვლად იმისა, რომ ადვოკატ სოსო ბარათაშვილის გაერკვია ბრალდებულის პოზიცია, დატოვა საპყრობილის ტერიტორია, რის შემდგომაც საგამოძიებო ორგანომ მიიღო გადაწყვეტილება ადვოკატის დასწრების გარეშე არ შეხვედროდნენ ბრალდებულს და მათ მიერ, ბრალდებულთან კონტაქტის გარეშე მოხდა საპყრობილის დატოვება,” _ნათქვამია განცხადებაში.
სოსო ბარათაშვილის თქმით, პროკურატურას ამ დრომდე არ გააჩნია მამხილებელი მტკიცებულებები და სწორედ ამის გამო, სასამართლოსთან შეთანხმებით, 1 თვითა და 20 დღით გადასწია საქმის წინასასამართლო მოსმენა. ადვოკატის მტკიცებით, პროკურატურა ამ გზით დამატებითი მტკიცებულებების მოპოვებას ზეწოლის შედეგად მიღებული აღიარებითი ჩვენებებით ხარჯზე ცდილობს.
გუშინ დილით გლდანის საპყრობილეში მისულ ადვოკატს ციხის უფროსის მოადგილის კაბინეტში გამომძიებელი შარდენ კოპალიანი და პროკურორი შოთა რიჟამაძე დახვდნენ. მათ ბარათაშვილს განუცხადეს, რომ მამუკა ივანიაძემ მას, როგორც ადვოკატს, გამოუცხადა უნდობლობა, მისცა აცილება და სურს სახაზინო ადვოკატის აყვანა.
“მოვითხოვე, ეჩვენებინათ დოკუმენტი, სადაც ივანიაძემ თავისი მოთხოვნები განაცხადა. მაჩვენეს მისი ხელნაწერი, რომელიც დაწერილი იყო მთავარი პროკურორის _ არჩილ კბილაშვილის სახელზე. განცხადება დათარიღებული იყო გუშინდელი დღით _ კვირა დღით, 16 ივნისით. დავინტერესდი როგორი წესით მოხდა ამ წერილის გადაგზავნა მთავარ პროკურორთან, შემდეგ ანტიკორუფციულ სამსახურში და როგორ მოხდა, რომ 11 საათისათვის ყველა ინსტანცია მოიარა ამ წერილმა? მათ ამ კითხვებზე პასუხი არ გააჩნდათ,” _ აცხადებს სოსო ბარათაშვილი “გურია ნიუსთან”.
შეგახსენებთ, რომ შსს-ს ანტიკორუფციული სააგენტოს თანამშრომლებმა სახელმწიფოს კუთვნილი განსაკუთრებით დიდი ოდენობით თანხების გაფლანგვის, სამსახურებრივი გულგრილობისა და ექსპერტებზე ზეწოლისთვის დაკავეს საქართველოს სოფლის მეურნეობის სამინისტროსა და სახელმწიფო შ.პ.ს. “მექანიზატორის” მაღალი თანამდებობის პირები.
შინაგან საქმეთა სამინისტროს ინფორმაციით, 2012 წლის 24 დეკემბერს საქართველოს მთავრობამ, სოფლად მცხოვრები მოსახლეობის დახმარების მიზნით სახელმწიფო ბიუჯეტიდან გამოყო ორმოცდათოთხმეტი მილიონი ლარი, რაც უნდა მოხმარებოდა მოსახლეობის კუთვნილი მიწების ხვნა-თესვას.
ამ პროექტისათვის მთავრობის მიერ გამოყოფილი თანხიდან ორმოცდაათი მილიონი ლარის ღირებულების სასოფლო- სამეურნეო ტრაქტორებისა და სხვადასხვა საჭირო აგრეგატის შეძენა დაევალა შპს “მექანიზატორს”. შესყიდვის კონტროლისათვის სპეციალურად შეიქმნა შესაბამისი კომისიები, რომელშიც შედიოდნენ როგორც შპს “მექანიზატორის”, ასევე საქართველოს სოფლის მეურნეობის სამინისტროს ხელმძღვანელი თანამდებობის პირები.
სასოფლო-სამეურნეო ტექნიკის შერჩევისა და შესყიდვის დროს, სხვადასხვა მწარმოებლის მიერ შემოთავაზებულ, პრაქტიკულად თანაბარი სპეციფიკაციების მქონე ტრაქტორებს შორის უპირატესობა დანაშაულებრივად მიენიჭა უარესს, რის შედეგადაც ერთ ერთეულ ტრაქტორში გაიფლანგა დაახლოებით ათი ათასი ევრო.
2013 წლის იანვრის თვეში განხორციელდა ტრაქტორებისა და საჭირო ტექნიკის შეძენა, რა დროსაც თანამდებობის პირებმა დანაშაულებრივი ქმედებით გაფლანგეს მოსახლეობის დასახმარებლად სახელმწიფო ბიუჯეტიდან გამოყოფილი ორი მილიონ ხუთასი ათასი ლარი.
მხილებულმა პირებმა დანაშაულის დასაფარად ზეწოლა მოახდინეს სისხლის სამართლის საქმეზე მომუშავე ექსპერტთა ჯგუფზე, რათა მიეღოთ მათთვის სასურველი დასკვნა და თავი აერიდებინათ სისხლის სამართლის პასუხისმგებლობისათვის.
ჩატარებული საგამოძიებო და ოპერატიულ-სამძებრო ღონისძიებების შედეგად მხილებული და დაკავებული იქნენ: სოფლის მეურნეობის სამინისტროს სამმართველოს უფროსი – ომარ თედორაძე; სოფლის მეურნეობის მექანიზაციის ინსტიტუტის დირექტორი – ზაზა მახარობლიძე; შპს მექანიზატორის დირექტორი ვაჟა ნახუცრიშვილი და მისი ორი მოადგილე, მამუკა ივანიაძე და ბესიკ თეთვაძე; აგრარული უნივერსიტეტის სრული პროფესორი- ოთარ ქარჩავა.
