ამასთან დაკავშირებით პარლამენტის უმრავლესობის წევრი ოთარ ჩრდილელი ფეისბუქის გვერდზე განცხადებას ავრცელებს:
“SOS!!! ხვალ სამტრედიაში ირჩევენ საკრებულოს თავმჯდომარეს. სულ ახლახანს ცნობილი გახდა, რომ “ნაცმოძრაობის” საკრებულოს წევრებს ღამე ტოვებენ შტაბში, უკვე მომარაგებული აქვთ პროდუქტები და რამდენიმე წევრისათვის წამლები.
ამ ფაქტით კიდევ ერთხელ ჩანს, თუ რაოდენ მშიშარაა “ნაცმოძრაობა” და როგორ ზღუდავს ის თავისი წევრების უფლებებსაც კი. “ნაციონალური მოძრაობის” საკრებულოს წევრებს მივმართავ, რომ ნუ ჩაიგდებენ თავს ერთი მუჭა ავანტიურისტების ხელში და თავისუფლად გამოხატონ თავიანთი აზრი.
“ნაციონალური მოძრაობა” იმყოფება აგონიაში და საკრებულოს ყველა წევრს, გთხოვთ თავისუფლად გამოხატოთ თქვენი ნება-სურვილი, ნუ გადააქცევთ სამტრედიას ნაციონალი ფეოდალების სათარეშოდ!!!
საინფორმაციო საშუალებებს ვთხოვ, გადაამოწმონ აღნიშნული ფაქტი.”
განცხადების გაცნობის შემდეგ სამტრედიის საკრებულოს წევრს, იმედა გოგავას დავურეკეთ, მაგრამ ვერ დავუკავშირდით, თუმცა, პასუხი ჩვენს კითხვაზე იმედა გოგავას ფეისბუქის გვერდზე ვნახეთ, სადაც ის წერს: “სამტრედიაში “ნაცტერორი” საკრებულოს წევრებზე კვლავ წარმატებით გრძელდება…”
რა ხდება სამტრედიაში საკრებულოს თავმჯდომარის არჩევამდე ერთი დღით ადრე? ამის გასაგებად პარტია “ქართული ოცნება _ დემოკრატიული საქართველოს“ სამტრედიის რეგიონული ოფისის ერთ-ერთ დამფუძნებელს და საინიციატივო ჯგუფის წევრს, ლიკა ივანიშვილს დავუკავშირდით.
_ ლიკა, ხვალ საკრებულოს სხდომაა დანიშნული. რამ განაპირობა ახალი თავმჯდომარის არჩევა?
_ 10 ივნისს საკრებულოს მოქმედმა თავმჯდომარემ, ალექსანდრე ჯვარშეიშვილმა საკუთარი ნებით დაწერა განცხადება გადადგომის შესახებ და მისი ადგილი ვაკანტური გახდა. ხვალ ახალი თავმჯდომარე აირჩევა.
_ მართლა მიმდინარეობს ზეწოლა საკრებულოს წევრებზე?
_ ვრცელდება ინფორმაცია, რომ ავთანდილ სტურუას და ემზარ შუბლაძეს სათათბირო ოთახში ჰყავთ საკრებულოს წევრები და არ აძლევენ სახლში წასვლის საშუალებას. როგორც გახდა ცნობილი ოთახიდან გამოდის მოწოდებები, რომ ერთად დგომის დროა და ა.შ.
_ რა თქმა უნდა, კანდიდატები ცნობილი იქნებიან.
_ კოალიციის კანდიდატია იმედა გოგავა, რესპუბლიკური პარტიის სამტრედიის ორგანიზაციის თავმჯდომარე, “ნაციონალური მოძრაობის“ მხრიდან კი დასახელებულია ემზარ შუბლაძე. სწორედ “ნაციონალების“ ლიდერები ახდენენ ზეწოლას ისევ თავის წევრებზე. ვერ ხვდებიან, რომ ყველაფერი დამთავრდა და ვეღარავის დააშინებენ თავისი ბინძური ხრიკებით. ახლა რომ შემეძლოს, მივიდოდი საკრებულოს წევრებთან და მოვუწოდებდი, რომ გონივრულად განსაჯონ მომავალი _შანსი ეძლევათ იმ ჭაობიდან ამოვიდნენ, რაშიც ყელამდე იყვნენ ჩაფლულები ეს 9 წელი.
_ სამტრედიის საკრებულო რამდენი წევრისგან შედგება?
-საკრებულოში 25 წევრია. ორი კოალიციის წარმომადგენელია, ერთი “ქრისტიან-დემოკრატების“ სამტრედიის პარტიის თავმჯდომარეა და დანარჩენი “ნაციონალური მოძრაობის“ წარმომადგენლები.
_ ამ წუთებში რა ხდება სამტრედიაში?
_ სიტუაცია არ შეცვლილა, ისევ საკრებულოს შენობაში არიან ერთ ოთახში შეკრებილი და სტურუა და შუბლაძე ისევ განაგრძობენ მათზე ზეწოლას.
_ სხდომა ღიაა თუ დახურული და როგორ ფიქრობთ, ხვალ რა შედეგი დადგება ხვალ?
_ სხდომა ღიაა, მე ვესწრები და ისიც ვიცი, რომ დილის 9 საათიდან საკრებულოსთან იკრიბება მოსახლეობა. ყველა ელოდება საკრებულოს გადაწყვეტილებას. მე პირადად საკრებულოს წევრების გონიერების იმედი მაქვს.
