ამ ინფორმაციას “გურია ნიუსთან” ადასტურებს როგორც ჯანდაცვის მინისტრი, ასევე სოციალური სააგენტოს უფროსი.
დავით სერგეენკო: “საკადრო ცვლილებების განხორციელება მიმდინარეობს მუდმივად და უმრავლეს შემთხვევაში, დაფუძნებულია ახალი გამოწვევების შესრულებასთან. ეს ცვლილებები განვახორციელეთ არა იმიტომ, რომ აღმოვაჩინეთ დანაშაულის ნიშნები. დანაშაულის სახელის დარქმევა შეუძლია მხოლოდ სასამართლოს, ჩვენ შეგვიძლია ვიმსჯელოთ მხოლოდ იმაზე, თუ რამდენად ეფექტურად ასრულებს ესა თუ ის თანამშრომელი მასზე დაკისრებულ მოვალეობას.
ერთის მხრივ ეს ცვლილებები სწორედ ამაზე იყო დაფუძნებული და მეორეს მხრივ იმაზე, რომ სოცმომსახურების სააგენტოს მნიშვნელოვნად შეეცვალა ფორმატი, დაემატა ახალი და უზარმაზარი პასუხისმგებლობა, რომელიც არის ახალი ჯანდაცვითი პროექტის მართვა და ადმინისტრირება. შესაბამისად, გაჩნდა ახალი გამოწვევები და საკადრო რეორგანიზაცია იქნა დაფუძნებული იმ მიზნის შესრულებაზე” _ განაცხადა დავით სერგეენკომ “გურია ნიუსთან”.
ჩვენს კითხვაზე, იგეგმება თუ არა კიდევ უფრო მასობრივი საკადრო ცვლილება სოციალურ სააგენტოში, რომელიც საგამოძიებო ორგანოების ინტერესის ამ სისტემაში წინა წლებში არსებული არაერთი დარღვევის გამო მოექცა, დავით სერგეენკომ განაცხადა:
“რაც შეეხება საგამოძიებო სამსახურის ინტერესებს, მიმდინარეობს მოკვლევა იმიტომ რომ ერთ-ერთი უდიდესი მმართველი ფინანსური ორგანო იყო სააგენტო. შესაბამისად, კითხვები ბევრია, თუმცა, ამაზე ალბათ კომპეტენტური ორგანოები გაგვცემენ პასუხს.”
რაც შეეხება სოციალური სააგენტოს ხელმძღვანელს, ნოე ქინქლაძეს, ის “გურია ნიუსთან” კონკრეტული პირების ვინაობას, რომლებმაც თანამდებობები დატოვეს, არ ასახელებს.
“ცვლილებები განხორციელდა იმიტომ, რომ ახლებური მიდგომაა საჭირო, როგორც ეკონომიკური, ასევე სოციალური ბლოკის მუშაობაში.
ეკონომიკური ბლოკთან დაკავშირებით შემიძლია გითხრათ, რომ იგივე ჯანდაცვის პროგრამა მოითხოვს ახლებურ მიდგომას, ახლებურ ხედვას და შესაბამისად. მოხდა ცვლილება. უახლოეს დღეებში დაინიშნება ახალი პიროვნება რომელიც ახალ ეკონომიკურ ბლოკს ჩაუდგება სათავეში. რაც შეეხება სოციალური მიმართულების თემას, აქაც გარკვეული ანალიზის შედეგად მივიღეთ გადაწყვეტილება, რომ საჭირო იყო ცვლილებები და რამე გაუგებრობას ადგილი არ ჰქონია.
_ რამდენია სოციალური სააგენტოს წლიური ბიუჯეტი?
_ შეიძლება ითქვას, რომ სააგენტო საქართველოში ყველაზე დიდი და მხარჯველი ორგანიზაციაა. მისი ბიუჯეტი 2 მილიარდ ლარამდე შეადგენს. მოიცავს ყველა სახის პენსიას, სოციალურ დახმარებებს, ჯანდაცვის პროგრამების დაფინანსებას, მათ შორის ჯანდაცვის ახალი პროგრამების დაფინანსებას, რომელიც ქვეყნის მასშტაბით გაიცემა. ეს საკმაოდ დიდი ხარჯებია, რომლის ადმინისტრირებას ჩვენი სააგენტო ახორციელებს. ჩვენი აზრით, საჭირო იყო სხვა პიროვნებების დანიშვნა , რომლებიც ამ საქმეს უხელმძღვანელებდნენ.
გათავისუფლებული ხელმძღვანელების ვინაობას სოციალური სააგენტოს ხელმძღვანელი არ ასახელებს და “გურია ნიუსთან” აცხადებს: “ამ შემთხვევაში ამას არსებითი მნიშვნელობა არ აქვს, რადგან კონკრეტულ პიროვნებების მიმართ არანაირი პრეტენზია არ გვაქვს. ჩვენი მხრიდან საკითხი დადგა გარკვეულ მიდგომებზე...”
თუმცა, ფაქტია ისიც, რომ გარდა “გარკვეული მიდგომებისა”, სოციალურ სააგენტოზე გარკვეული და დადასტურებული ფაქტებიც არსებობს, რომელიც საგამოძიებო ორგანოების ყურადღების ქვეშ მოექცა.
მაგალითისთვის შეგვიძლია მოვიყვანოთ ვანო მერაბიშვილის სკანდალური დადგენილება და წინასაარჩევნო დასაქმების პროგრამა, რომელზეც პროკურატურამ გამოძიება უკვე დაასრულა და ვანო მერაბიშვილს ბრალიც წაუყენა. შუა რგოლი, რომელიც ამ დასაქმების საქმეში ფიგურირებს, სწორედ სოციალური სააგენტო გახლდათ.
ვანო მერაბიშვილმა 2012 წლის 5 ივლისს ხელი მოაწერა დადგენილებას.
წინასაარჩევნო დადგენილებით დამტკიცებული პროგრამით, საქართველოს ტერიტორიაზე მცხოვრებ “სამუშაოს მაძიებელთა აღრიცხვა” და მონაცემთა ბაზის შექმნა, 2012 წლის ივლისიდან 25 ქალაქში ინტენსიურად მიმდინარეობდა. სოციალური მომსახურების სააგენტოს დასაქმების აგენტების მიერ ხდებოდა შესაბამისი კითხვარების შევსება და მონაცემების ელექტრონულ ბაზებში შეყვანა.
2012 წლის 3 სექტემბერს სსიპ “სოციალური მომსახურების სააგენტომ” გამოსცა ბრძანება, რომლის შესაბამისად, ზემოხსენებული პროგრამის ფარგლებში, შტატგარეშედ, საქართველოს ყველა რეგიონში დამატებითი კონტრაქტები გაუფორმდა 21 837 პირს, რომლებსაც პროგრამის ფარგლებში უნდა შეესრულებინათ მოქალაქეთა დასაქმებასთან დაკავშირებული სააღრიცხვო სამუშაოები.
მიუხედავად ამისა, 2012 წლის სექტემბრის ბოლოს ყველა მათგანს სს “ლიბერთი ბანკის“ შესაბამის ფილიალებში ხელფასის სახით დაერიცხათ 240 ლარი.
სულ, ამ პირებზე სახელმწიფო ბიუჯეტიდან გადარიცხულია 5 240 880 ლარი.
გამოძიების ფარგლებში, ქვეყნის მასშტაბით, საქართველოს ყველა რეგიონში, მოწმის სახით დაიკითხა 2000-მდე პირი, რომელთა ჩვენებებით დადგინდა, რომ ზემოხსენებულ 21 837 მოქალაქეს “სამუშაოს მაძიებელთა აღრიცხვის პროგრამის“ ფარგლებში არანაირი სამუშაო არ შეუსრულებიათ და რომ მათ თანხა მიიღეს პოლიტიკური გაერთიანება “ერთიანი ნაციონალური მოძრაობის“ მხარდასაჭერად წარმოებული წინასაარჩევნო აქტიურობისათვის, რაც გამოიხატებოდა საქართველოს პრეზიდენტთან დაგეგმილ წინასაარჩევნო შეხვედრებში მონაწილეობის მიღებაში, „ერთიანი ნაციონალური მოძრაობის” პარტიული ბროშურების, ფლაერების და სიმბოლიკების დარიგებაში, პარტიული აგიტააციისა და პროპაგანდის განხორციელებაში და სხვა.
გამოძიების მიერ მიღებულ იქნა გადაწყვეტილება საქართველოს შრომის ჯანმრთელობისა და სოციალური დაცვის იმჟამინდელი მინისტრის ზურაბ ჭიაბერაშვილისა და საქართველოს იმჟამინდელი პრემიერ-მინისტრის ივანე მერაბიშვილის მოწმის სახით დაკითხვის შესახებ. ზურაბ ჭიაბერაშვილი და ივანე მერაბიშვილი ამ საკითხთან დაკავშირებით დასავლეთ საქართველოს საოლქო პროკურატურაში პირველად 2012 წლის 13 თებერვალს დაიბარეს.
სოციალური მომსახურების სააგენტოს ხელმძღვანელი ნოე ქინქლაძე ამ საკითხთან დაკავშირებით “გურია ნიუსთან” ასეთ კომენტარს აკეთებს:
_აღნიშნულ საქმეს იძიებს პროკურატურა და მე ამ საკითხზე კომენტარს არ გავაკეთებ. საქართველოს ყველა რეგიონისა და რაიონის საქმე არის პროკურატურაში, ვნახოთ, რა დადგება გამოძიების შემდეგ. მე ხშირად მთხოვენ პროკურატურიდან გარკვეული საბუთების გაცემას, მაქვს ინფორმაციები და ვიცი, რომ ჩემი თანამშრომლები ახლაც დადიან დაკითხვებზე. ვნახოთ, დაველოდოთ გამოძიების შედეგებს, თუ იქ გამოიკვეთება რომელიმე თანამშრომლის დანაშაულის ნიშნები და ბრალეულობა, კანონის მიხედვით ვიმოქმედებთ.
