_ გზა, ტროტუარი, განათება, წყალი, კანალიზაცია, გაზი _ ინფრასტრუქტურის ეს სასიცოცხლოდ აუცილებელი ელემენტები ურეკში ჯერ კიდევ არ არსებობს. გადაუჭრელი პრობლემები, საკურორტო – ტურისტული თვალსაზრისით, უდიდესი პოტენციალის მქონე დაბა ურეკს წლების განმავლობაში აქვს.ადგილობრივი მოსახლეობის თქმით, ურეკში ამ ეტაპზე სასწრაფოდ მოსაგვარებელია წყალგაყვანილობისა და კანალიზაციის სისტემები. მათი თქმით, ყველა ხელისუფლების მოსვლის დროს, ამ საკითხების გადაჭრის შესახებ მხოლოდ საუბარი და დაპირებები მიდის.
_ ამ ეტაპზე არაფერი არ ხდება. პლაჟზე. ჯებირი რომ არის ჩანგრეული, ამას ხომ უნდა გაკეთება? ცხრაჯერ მაინც გაიგზავნა ურეკიდან ოზურგეთის მუნიციპალიტეტში წერილი ამის შესახებ, მაგრამ პრობლემა პრობლემად რჩება.
_ მაგნეტიტში, სანაპიროს ქუჩაზე, წლებია, საწრეტი არხის მოწესრიგებას ვითხოვთ და არავინ ყურადღებას არ გვაქცევს. ზაფხულში სანაპიროზე ვერ გაივლით _ ყარს ყველაფერი. არ დაადგა საშველი ამ არხის გაწმენდას. არჩევნებში ხმა მივეცით "ქართულ ოცნებას", თუმცა, ჯერჯერობით არაფერი არ გაკეთებულა. მინდა, სიცოცხლეში ვნახო ეს კურორტი აღორძინებული.
წყალგაყვანილობისა და საკანალიზაციო მილების სისტემის მოგვარება, როგორც ხელისუფლების წარმომადგენლები ამბობენ, სექტემბრიდან უნდა დაეწყოთ, მაგრამ დაიწყეს გაზაფხულზე და როგორ მოესწრებოდა წლევანდელი სეზონისთვის? ახლა დატოვეს გადათხრილი ქუჩები, _ გვითხრეს ურეკის მაცხოვრებლებმა.
დაბა ურეკის რწმუნებული და ახალი მოწვევის საკრებულოს მაჟორიტარი დეპუტატი ბიძინა იმნაიშვილი "გურია ნიუსის" საშუალებით მიმართავს ადგილობრივ და ცენტრალურ ხელისუფლებას, რომ კურორტს, რაც შეიძლება მალე მიაქციონ ყურადღება და ყველა პრობლემა მალე აღმოიფხვრას: _ ოზურგეთის მუნიციპალიტეტის ბიუჯეტში ყველაზე მსხვილი შემომტანი არის ურეკი. ვთხოვ ოზურგეთის გამგეობას, ქვეყნის ხელისუფლებას, გამოიჩინონ გულისხმიერება და დროულად მიხედონ ასეთ კურორტს!
რუსუდან შარაშიძე, ურეკის მცხოვრები: _ არაფერი არ არის გაუმჯობესებული, აბსოლუტურად არაფერი არ გაკეთებულა. შტორმის დროს, ზღვაზე გასასვლელი ჯებირი დაინგრა და დღესაც გაუკეთებელია. როგორც მაშინ გვითხრეს, მილიონნახევარი ლარია გამოყოფილი ოზურგეთისთვის და გააკეთებენო, მაგრამ არ გაუკეთებიათ.
ჩვენ, ყველას, ბანკებში გვაქვს პროცენტიანი ვალები აღებული. დამსვენებელი თუ არ მოვიდა, გაგვიყიდის ბანკი ამ სახლებს და დავრჩებით ღია ცის ქვეშ.
არავინ ყურადღებას არ გვაქცევს _ არც წყალია, არც კანალიზაცია, არც გზა. ამ დროს ამბობენ, ყველაფერი კეთდებაო. ნახეთ, როგორი ტყეპარკია მოუვლელი და განადგურებული. პირუტყვი შეესია, ხეები მოჭრილი და განადგურებულია, ნათურები მოპარული.
ნარგიზ სვანიძე, ერთ-ერთი სასტუმროს მეპატრონე: _ საშინელ დღეში ვართ. არც წყალია, არც კანალიზაცია, არც გაზი, არც გზა. გადათხრილია ქუჩები… ავადმყოფებისა და ბავშვებისთვის აუცილებელი კურორტი ასე უპატრონოდაა მიტოვებული.
ბიძინა იმნაიშვილი, დაბა ურეკის მაჟორიტარი დეპუტატი: _ დაწყებულია წყლის სისტემის და კანალიზაციის რეაბილიტაცია. არსებობს უამრავი სამუშაო დოკუმენტაცია, რომლის მომზადებას და მოწესრიგებას ერთი წელი დასჭირდა. ამ საქმეში მეც ვიყავი ჩართული. ჩემი ინფორმაციით, სამუშაოები ნორმალური ტემპით მიმდინარეობს. ამის შემდეგ უნდა შედგეს ურეკის განვითარების პროექტი. აზიის ბანკი, რომელმაც ეს პროექტი უნდა დააფინანსოს, ყველა კონკრეტული სამუშაოს დასაბუთებას ითხოვს _ საუბარია 53 მილიონ ლარზე, რაც უზარმაზარი თანხაა.
_ რა გაკეთდა ბოლო ორი წლის განმავლობაში ურეკში?
_ მოსახლეობას თუ სასტუმროს მეპატრონეებს ბანკიდან აქვთ სესხი გამოტანილი. ახლა რომ დაეწყოთ კანალიზაციის გაკეთება და გადაეთხარათ ქუჩები, დამსვენებელი არ მოვიდოდა. ამიტომ გააჩერეს მშენებლობა წელს ზაფხულში.
_ ბატონო ბიძინა, ურეკში ანტისანიტარიაა, შიდა ქუჩები გადათხრილია, დაჭაობებულია ტერიტორია, პლაჟზე უამრავი პირუტყვია, ყრია ნაგავი… ამის მოწესრიგება ვის ევალება?
_ ეს ყველაფერი წყალდიდობის ბრალია, მოუწესრიგებელია სანიაღვრე არხები. გეთანხმებით, ქუჩები გათხრილია, მაგრამ ახლა რომ გაგვეკეთებინა, კანალიზაციის რეაბილიტაციის დროს ხელახლა გადათხრა იქნებოდა საჭირო. ხალხიც გაგებით უნდა მოეკიდოს ამ საკითხს _ ხარისხიანად გაკეთებას დრო სჭირდება.
_ სოფლის მხარდამჭერი პროექტებით შარშან რა გაკეთდა?
_ გამოყოფილი იყო 15 000 ლარი, მოწესრიგდა შიდა გზები. თუმცა, არხები კვლავ გასაწმენდია.
აქვე ისიც უნდა ითქვას, რომ ურეკში არსებული კერძო საკუთრება, მათ შორის მიწებიც, თავად მეპატრონემ უნდა მოაწესრიგოს, _ გვითხრა ურეკის მაჟორიტარმა დეპუტატმა.
