პრემიერ-მინისტრის ინიციატივით სახელმწიფო უწყებებში შექმნილი "სოლიდარობის ფონდის" პრეზენტაცია დაიწყო.
ფონდი მიზნად ისახავს საზოგადოების, კერძო სექტორისა და სახელმწიფოს თანამონაწილეობით, ინოვაციური დაფინანსების მექანიზმების ამოქმედებით, საქართველოში მცხოვრები სოციალურად დაუცველი ან კატასტროფული სოციალური დანახარჯების რისკის წინაშე მდგარი ბავშვებისა და ოჯახებისთვის ალტერნატიული (არასაბიუჯეტო) რესურსების მობილიზაციის უზრუნველყოფასა და პრიორიტეტულ სოციალურ საჭიროებებზე მიმართვას.
საწყის ეტაპზე ფონდი ორიენტირებული იქნება ონკოლოგიური პაციენტების, უპირველესად კი ბავშვების ძვირადღირებული მკურნალობის ანაზღაურებაზე. აქციაში ჩართვა სრულიად ნებაყოფლობითია.
დასაწყისში დაფინანსებას 18 წლამდე პაციენტები მიიღებენ, საჭირო ფინანსური რესურსის მოპოვების შემდეგ კი ზღვარი 22 წლამდე გაიზრდება.
ფონდი პირველ ბენეფიციარებს 1 სექტემბრიდან დააკმაყოფილებს.
"სოლიდარობის ფონდში" პირველი შენატანი საქართველოს მთავრობის ადმინისტრაციის თანამშრომლებმა განახორციელეს.
