ქალაქ ოზურგეთის მუნიციპალიტეტის საკრებულოს კომისიების და მერიის სამსახურების დებულების საჯარო განხილვა ორშაბათს, 12 საათზე უნდა დაწყებულიყო, მაგრამ 30 წუთით დაგვიანებით დაიწყო. ამის მიზეზი ის იყო, რომ ოზურგეთის მერმა ბეგლარ სიორიძემ, სწორედ იქ ჩაატარა სამსახურის უფროსებთან თათბირი, სადაც დებულების განხილვა უნდა დაწყებულიყო.
30-წუთიანი ლოდინის შემდეგ, არასამთავრობო ორგანიზაციის წარმომადგენლები სხდომის დაწყებას აღარ დაელოდნენ და ოფისებში დაბრუნდნენ.
"თათბირი მქონდა თანამშრომლებთან. ყველა სამსახურის უფროსმა უნდა წარმოადგინოს თავისი ხედვა, რას ფიქრობს, როგორ ფიქრობს და ა. შ." _ გვითხრა ბეგლარ სიორიძემ.
საჯარო განხილვას დეპუტატები, მერიის თანამშრომლები და მედიის წარმომადგენლები ესწრებოდნენ. დეპუტატ თამარ ნადირიძის თქმით, "საჯარო განხილვას საზოგადოება აუცილებლად უნდა ესწრებოდეს _ ეს მნიშვნელოვანია თვითმმართველობის განვითარებისთვის".
დეპუტატი გოჩა მგელაძე გამოვიდა ინიციატივით, რომ ქალაქის ცენტრში გაკეთდეს საინფორმაციო დაფა, სადაც განთავსდება ინფორმაცია იმის შესახებ, თუ როდის ტარდება საკრებულოს სხდომა, ამა თუ იმ საკითხის საჯარო განხილვები და ა. შ. მისივე თქმით, "კარგი იქნება ქალაქ ოზურგეთის საკრებულოს ჰყავდეს პრესსამსახური".
საკრებულოს სივრცით-ტერიტორიული დაგეგმარების და ინფრასტრუქტურის კომისიის თავმჯდომარის ლევან თოიძის აზრით, უნდა შეიქმნას ექსპერტთა ჯგუფი, რომელიც ქალაქის განვითარების გეგმაზე იმუშავებს: _ პირველ რიგში, შესაქმნელია კვალიფიციურ ექსპერტთა ჯგუფი, რომელმაც უნდა იმუშაოს ქალაქის განვითარების გენერალურ გეგმაზე. ამ მხრივ მუშაობას უკვე შევუდექით _ ხუთი სპეციალისტი ავიყვანეთ, მაგრამ ეს რიცხვი 10-მდე უნდა ავიდეს, რადგან დროულად გაკეთდეს გეგმა.
დეპუტატ ლავრენტი ბიგვავას თქმით, ქალაქში მოსაგვარებელია გარევაჭრობის საკითხი. ლევან თოიძე ამბობს, რომ ეს ფაქიზი საკითხია და სპეციალისტების ჩარევაა აუცილებელი.
დეპუტატი ლევან მგელაძე გამოვიდა ინიციატივით, რომ ქალაქის უბნებს ჰყავდეთ თავიანთი რწმუნებულები ან წარმომადგენლები.
_ აუცილებელია ასეთი შტატი. შეიძლება, ქალაქი საარჩევნო ოლქების მიხედვით დაიყოს. ამ ხალხს უფრო ახლოს ურთიერთობა ექნება ხალხთან. ადმინისტრაციული ერთეული თუ შეიქმნა უბნებში, მოსახლეობას იქ შეეძლება სხვადასხვა საბუთების გაკეთება და აღარ მოუწევთ ქალაქში ჩამოსვლა და რიგში დადგომა, _ თქვა ლევან მგელაძემ.
დეპუტატმა თამარ ნადირიძემ საკრებულოს თავმჯდომარეს გელა კობალაძეს მიმართა: _ უკვე ღიად არის საუბარი, რომ ქალაქ ოზურგეთის მერია და საკრებულო სასტუმრო "გურიას" შენობაში უნდა გადავიდეს. ეს შეიძლება კარგი იყოს, მაგრამ აქ, ჩემი აზრით, საჭიროა მოსახლეობის აზრის გათვალისწინება _ მათ უნდა ვკითხოთ აზრი და შემდეგ მივიღოთ გადაწყვეტილება, მაგრამ აქ, ალბათ, ერთეულები წყვეტენ ყველაფერს. ქალაქის განვითარებაზე თუ ვსაუბრობთ და გვინდა განვითარდეს, მაშინ აუცილებელია ქალაქში იყოს სასტუმრო, _ თქვა თამარ ნადირიძემ.
საკრებულოს თავმჯდომარის გელა კობალაძის თქმით, ამ საკითხთან დაკავშირებით თბილისიდან იყვნენ ჩამოსულები და უკვე ნახეს სასტუმრო "გურიას" შენობა: _ ჩვენთან იურიდიულად არაფერი არ შემოსულა. უბრალოდ, მე ვიცი, რომ სამი დღის წინ ჩამოსული იყო სამკაციანი ჯგუფი, რომელმაც აზომა სასტუმროს ძველი შენობა. საუბრიდან გავიგე, 25 აგვისტომდე აქვთ პროექტის დასრულების ვადა, რიც შემდეგაც იქ განთავსდება ქალაქის საკრებულოს და მერია, _ თქვა გელა კობალაძემ.
