ახალი ფრაქციები და ფასდადებული უმაღლესი განათლება

15 ოქტომბერს ოზურგეთის მუნიციპალიტეტის საკრებულოს რიგგარეშე  სხდომა შედგა, რომელსაც 38 დეპუტატი ესწრებოდა. მათ 12-საკითხიანი დღის წესრიგი საკრებულოს თავმჯდომარემ, დავით დარჩიამ გააცნო.მანვე მოკლედ ისაუბრა ოზურგეთის მუნიციპალიტეტის საკრებულოში ფრაქციების  "პატრიოტთა ალიანსის" და "ქართული ოცნება-რესპუბლიკელების" შექმნის შესახებ, რაც შემდეგ, საკითხების სახით, სხდომას სამანდატო და იურიდიულ საკითხთა კომისიის თავმჯდომარემ ეროდი გორდელაძემ მოახსენა. მან განმარტა, რომ ბიუროს სხდომაზე განიხილეს "პატრიოტთა ალიანსის" უფლებამონაცვლე დეპუტატის, დავით თენიეშვილის საკრებულოში შესვლის საკითხი და ამჯერად ფრაქციაში სამი დეპუტატი იქნება წარმოდგენილი. ესენია: პაატა კიღურაძე, შალვა დოლიძე და დათო თენიეშვილი. ხოლო "ქართული ოცნება-რესპუბლიკელების" სახეს დეპუტატები: ლადო ვადაჭკორია, გელა ჩავლეშვილი დ გურამ კოჩალიძე წარმოადგენენ. 

დღის წესრიგის მესამე საკითხიც, "ოზურგეთის მუნიციპალიტეტის საკრებულოს აპარატის საშტატო ნუსხის დამტკიცების შესახებ", ეროდი გორდელაძემ წარადგინა.  აპარატში სულ 15 საშტატო ერთეულია, განსაზღვრული თანამდებობრივი რანგით. წარმოდგენილ საკითხს კენჭი უყარეს და წინააღმდეგობის გარეშე დაამტკიცეს. 

ოზურგეთის გამგებელმა, მერაბ ჭანუყვაძემ ოზურგეთის მუნიციპალიტეტის გამგეობის საშტატო ნუსხის დამტკიცების შესახებ ისაუბრა: სულ წარმოდგენილა 139 საშტატო ერთეული, რაშიც შედის ყველა ადმინისტრაციული ერთეული (სოფლების სახით). ოზურგეთის მუნიციპალიტეტის 20 სოფელში ერთი შტატი ემატება, რვაში კი _ ორი. ოზურგეთის მუნიციპალიტეტის საჯარო მოხელეთა მუდმივმოქმედმა საკონკურსო-საატესტაციო კომისიამ კონკურსი გამოაცხადა  გათვალისწინებული ვაკანტური თანამდებობების დასაკავებლად. ადმინისტრაციულ ერთეულებში კი, თითოეული სოფლის გამგებლის წარმომადგენლის თანაშემწეს მოეთხოვება უმაღლესი განათლება და სამ თვემდე სამუშაო გამოცდილება. დეპუტატთა უმრავლესობამ მოიწონა აღნიშნული კრიტერიუმები; ლელა ნაცვალაძემ კი საკითხის დაკონკრეტება ითხოვა, თუ რა სახის სამუშაო გამოცდილების მოთხოვნა წარედგინება მუშაობის დაწყების მსურველ უმაღლესი განათლების მქონე პირს. მერაბ ჭანუყვაძემ და დიმიტრი კვერღელიძემ განმარტეს, რომ მნიშვნელობა არ აქვს სფეროს, მისაღებია თუ პირი ბიზნესში მუშაობდა ან თუნდაც სხვაგან, მთავარია, მას ჰქონდეს პრაქტიკა, სერიოზულ გარემოში მუშაობის გამოცდილება და გააჩნდეს კომუნიკაციის უნარი. 

_მიხარია, რომ ოზურგეთის მუნიციპალიტეტი იღებს გადაწყვეტილებას, ჩატარდეს კონკურსი საჯარო მოხელეთათვის. ყველა მსურველ ადამიანს ვაძლევთ თანაბარ შანსს, დამსახურებულად დაიკავოს თანამდებობა. პირველ ეტაპზე მოხდება აპლიკაციების შერჩევა, მაგალითად, წარმოგიდგენთ ერთ ვარიანტს _ გამგეობის აპარატის უფროსის თანამდებობაზე მოსვლის მსურველი აუცილებლად უნდა იყოს უმაღლესი განათლების მქონე და ჰქონდეს, მინიმუმ, სამი წლის მუშაობის გამოცდილება. ასეთი მონაცემების მქონე პირი გაივლის კონკურსს. იგივე სახის  მოთხოვნებია წაყენებული საკრებულოს შემთხვევაშიც, _ თქვა კვერღელიძემ.

დეპუტატი ლალი სიჭინავა არ დაეთანხმა წარმოდგენილ მოთხოვნას: უმაღლესი განათლება ბევრს აქვს, მაგალითად, ჩემმა შვილმა ხუთი წელია, დაამთავრა უმაღლესი სასწავლებელი, მაგრამ სამსახური ვერ დაიწყო, რადგან სამუშაო ადგილები არ არისო.  მოწინააღმდეგე ამ მოსაზრებასაც მრავლად გამოუჩნდა:

_ გამოუცდელი პირი პირდაპირ თანამდებობით არ უნდა იწყებდეს მუშაობას, ეს არ ნიშნავს აკრძალვას, იმუშაოს საჯარო დაწესებულებაში, აქ საუბარია პასუხსაგებ თანამდებობაზე, სადაც სამუშაო გამოცდილება ისევე საჭიროა, როგორც უმაღლესი განათლება, _ იყო პასუხი. 

აღნიშნული კამათის შემდეგ, დეპუტატები მაინც შეჯერდნენ იმ აზრზე, რომ მოთხოვნა სამართლიანია და  ოზურგეთის მუნიციპალიტეტის ადგილობრივი თვითმმართველობის მოხელეთა დამატებითი საკვალიფიკაციო მოთხოვნების დამტკიცების შესახებ, ოზურგეთის  მუნიციპალიტეტის საკრებულოს დადგენილების მისაღებად, საჯარო ადმინისტრაციული წარმოების დაწყებას ხმების უმრავლესობით დაეთანხმნენ.

დღის წესრიგის მეოთხე, მეშვიდე, მერვე და მეცხრე საკითხები, რომლებიც  სხვადასხვა განკარგულებებში ცვლილებებებს ეხებოდა, დეპუტატებმა უხმაუროდ და მოკლედ მიმოიხილეს და ერთხმად უყარეს კენჭი.

რაც შეეხება დღის წესრიგის მეათე საკითხს: "ოზურგეთის მუნიციპალიტეტის გამგებლისა და საკრებულოს თავმჯდომარის თანამდებობრივი სარგოების ოდენობის განსაზღვრის შესახებ" _ ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე,  დეპუტატების მხრიდან უფრო ხმადაბალი განსჯა მოჰყვა, პირდაპირ, სანეტარო ხელფასებიაო, _ ერთმანეთში აზრები გაცვალეს.   ოფიციალური აზრის ხმამაღალი დაფიქსირება არავის უცდია.  თქვეს ისიც, რომ ზოგადად, მაღალი ხელფასების სტანდარტი ექვემდებარება მოსაზრებას, რომ  თანამდებობის პირს უწევს  საპასუხისმგებლო და ხშირად 24-საათიანი შრომა. ამიტომ, ის მატერიალურად უნდა იქნეს უზრუნველყოფილი. აღნიშნული დადგენილების მიღების ვადა 2014 წლის სამი ნოემბერია. 

სოფელ ცხემლისხიდის  დეპუტატმა, ლალი სიჭინავამ საკრებულოს სხდომაზე  გააპროტესტა სადეპუტატო უფლებამოსილებისთვის განკუთვნილი ხარჯი, რაც 50 ლარს შეადგენს. 

_ ეს განმარტება ჩემთვის არის შეურაცხმყოფელი. ცხემლისხიდის თემში სოფელი ბაღდადიც შედის. ძალიან ბევრი სიარული მიხდება და კაცებზე ნაკლებად არ დავრბივარ.  მე ამისთვის 50 ლარს არ ვითხოვ და ეს უფრო გამაღიზიანებელი და შეურაცხმყოფელია. უმჯობესია, ამ თანხას საკრებულოს სხდომებზე  ჩამოსვლისთვის განკუთვნილი ხარჯის სტატუსი ერქვას, _ თქვა მან.

დეპუტატები კოლეგას დაეთანხმნენ, მაკვანეთის დეპუტატმა ნუგზარ კალანდარიშვილმა კი საყვედური გამოთქვა იმის გამო, რომ საკრებულოს ერთ-ერთ დეპუტატს, რომელიც ცუდად იყო და საავადმყოფო ფურცელზე იმყოფებოდა, 50 ლარი დაუქვითეს. რეპლიკას მოჰყვა განმარტება, რომ ეს თანხა დეპუტატის ხელფასი კი არ არის, არამედ  სადეპუტატო უფლებამოსილებისთვის განკუთვნილი ხარჯია,  რომელიც სხდომებზე  დეპუტატთა დასწრების აღრიცხვის შემდეგ გაიცემა.  თუ დეპუტატი არ ჩამოსულა, არ გაუწევია სათანადო სამუშაო, შესაბამისად, აღრიცხვაც არ მოხდა და თანხაც არ გაიცემა, _ განუმარტეს დეპუტატებს. ითქვა ისიც, რომ ამ თანხას, ზოგადად, ჰქვია მოსახლეობის, ამომრჩევლის მომსახურებისთვის განკუთვნილი თანხა. სხდომებზე დასწრება თუ მოსახლეობასთან შეხვედრა, ნებისმიერ შემთხვევაში მოსახლეობისთვის  მომსახურებაა და ის კონკრეტულად რომელიმე შეხვედრისთვის გაცემულ ანაზღაურებას არ გულისხმობს.