"თავისუფალი დემოკრატების" ოზურგეთის რაიონული ორგანიზაციის თავმჯდომარე, დიმიტრი კვერღელიძე, გუშინ, "გურია ნიუსთან" საუბრის დროს ამბობდა, რომ ის ჯერ ირაკლი ალასანიას შეხვდებოდა და შემდეგ მიიღებდა გადაწყვეტილებას დარჩებოდა თუ არა პარტიაში.
დღეს კი მან პოლიტიკური გადაწყვეტილება უკვე მიიღო და პარტია დატოვა.
"მოგეხსენებათ, რომ "თავისუფალმა დემოკრატებმა" დატოვა კოალიცია "ქართული ოცნება" და მე როგორც ერთ-ერთი დამფუძნებელი "თავისუფალი დემოკრატების" და ამავდროულად ოზურგეთის რაიონული ორგანიზაციის ხელმძღვანელი მინდა გავაკეთო განცხადება და გითხრათ ჩემი მოსაზრება", _ თქვა ბრიფინგის დასაწყისში დიმიტრი კვერღელიძემ.
მისივე თქმით, პარტიას რამდენიმე ადამიანი დატოვებს, მაგრამ ამ ეტაპზე მხოლოდ ის ერთადერთია, რომელმაც "თავისუფალი დემოკრატების" რაიონული ორგანიზაცია დატოვა.
"პირველ რიგში მინდა ვთქვა, ჩემ მეგობრებთან და თანამებრძოლებთან ერთად კოალიციის შექმნამდე დავიწყეთ ბრძოლა უსამართლობის წინაშე, დავიწყეთ ბრძოლა "ნაცმოძრაობის" წინაშე. ბატონ ირაკლი ალასანიასთან ერთად დავიწყეთ ბრძოლა იმ არადემოკრატიული კურსის წინაშე, რომელიც მიმდინარეობდა ქვეყანაში. შემდეგ, 2012 წელს ბიძინა ივანიშვილთან და კოალიცია "ქართულ ოცნებასთან" ერთად მოხდა გაერთიანება ოპოზიციური პარტიების ერთად და ჩვენ ერთად, სამართლიანი არჩევნების გზით შევცვალეთ ხელისუფლება, რაც მნიშვნელოვანი იყო. ამ ორ წელში ძალიან ბევრი სირთულეების მიუხედავად ჩვენ ძალიან ბევრი დანაპირებები უკვე შევასრულეთ და ძალიან ბევრი დანაპირებების შესრულება ვერ შევძელით, იქედან გამომდინარე, რომ მთლიანად არ ვიყავით ხელისუფლებაში მოსული. შემდეგ ქვეყანაში ჩავატარეთ დემოკრატიულად საპრეზიდენტო და თვითმმართველობების არჩევნები და აქაც კოალიცია იყო ერთიანი. კოალიციამ "ქართულმა ოცნებამ" გასცა დიდძალი დანაპირები ამომრჩევლის წინაშე და ძალიან დიდი პასუხისმგებლობა ჩემი, რადგან წარმოვადგენ ადგილობრივ ხელისუფლებას და სრულიად აქ ადგილზე კოალიცია აგებს პასუხს. მე დღეს არასახელმწიფოებრივად მიმაჩნია, რომ დავტოვო კოალიცია და დავტოვო "თავისუფალი დემოკრატები" და დავიწყო აღსრულება იმ დანაპირებების, რომელიც ჩვენ ერთად მივეცით ხალხს. მესმის ეს ძალიან ადამიანურად, მაგრამ როდესაც არჩევანის გაკეთება ხდება პიროვნებასა და სახელმწიფოს შორის მე ყოველთვის ვაკეთებდი არჩევანს სახელმწიფოს წინაშე", _ თქვა დიმიტრი კვერღელიძემ.
მისივე განცხადებით, პარტიას კიდევ რამდენიმე ადამიანი დატოვებს. ამ ეტაპზე პარტიაში რჩებიან ოზურგეთის მუნიციპალიტეტის საკრებულოს ოთხი დეპუტატი, რომელიც "თავისუფალი დემოკრატებით" შევიდნენ საკრებულოში.
ბრიფინგის დასასრულს დიმიტრი კვერღელიძემ "გურია ნიუსის" კითხვებს უპასუხა:
_ ბატონო დიმიტრი, თქვენ გუშინ, "გურია ნიუსთან" გააკეთეთ კომენტარი, რომ ჯერ შეხვდებოდით ირაკლი ალასანიას და შემდეგ მიიღებდით გადაწყვეტილებას.
_ მე მქონდა კონსულტაციები ამასთან დაკავშირებით და ვთვლი, რომ ეს განცხადება დღეს უნდა გამეკეთებინა.
_ ანუ ირაკლი ალასანიას აღარ შეხვდებით?
_ არა, არ მოხდება.
მისივე განცხადებით, ის აუცილებლად მიმართავს "ქართული ოცნება – დემოკრატიულ საქართველოს", რომ მათ რიგებში გააგრძელოს პოლიტიკური მოღვაწეობა.
