დღეს, 6 ნოემბერს, ოზურგეთის მუნიციპალიტეტის მერმა ბეგლარ სიორიძემ ისრაელის რვაკაციანი დელეგაცია მიიღო. ქალაქ კირიათ იამის ადგილობრივმა სახელისუფლებო შემადგენლობამ, რომელსაც წარმოადგენდნენ ქალაქის მერის მეუღლე, ვიცე მოადგილე, საკრებულოს წევრები და საზოგადო მოღვაწეები, დიდი მადლობა გადაუხადეს ოზურგეთის მერს მოწვევისათვის და მათი მერისგან გამოგზავნილი ბოდიშის წერილი გადასცეს. “ვიმედოვნებთ, რომ ჩვენი დამეგობრება იქნება თბილი, ურთიერთგაგებასა და საქმიან თანამშრომლობაზე დამყარებული, ბოდიშს გიხდით ჩვენი მერის სახელით, სასწრაფოდ პრემიერთან იქნა დაბარებული, მთელი გულით უნდოდა ჩამოსვლა“ – აღნიშნეს დელეგატებმა.
ბეგლარ სიორიძე: „ქართველებსა და ებრაელებს ამდენი ხნის ურთიერთობა და მეგობრობა გვაქვს, ამისი დასტურია დღეს თქვენი აქ ჩამობრძანებაც. ჩვენი ქალაქი თავისი მდებარეობით გამორჩეულია და განსაკუთრებული, გვაქვს ბევრი ღირსშესანიშნავი ადგილი, რომელსაც დაგათვალიერებინებთ ამ დღეების განმავლობაში, ზეგ ქალაქის დღესასწაული გვაქვს და გვიხარია, რომ ჩვენთან ერთად იქნებით, ვეცდებით, გაგიწიოთ ისეთი მასპინძლობა, გურულებს რომ შეგვფერის. ყოველთვის მოხარული ვართ სტუმრების მიღებით, დიდი სურვილი გვაქვს, ჩვენი გაცნობა საქმიან ურთიერთობაში გადავზარდოთ, დარწმუნებული ვარ, საინტერესო წინადადებები იქნება, როგორც ჩვენი, ასევე, თქვენი მხრიდან. მინდა აღვნიშნო, რომ ოზურგეთი ფოლკლორის ცენტრად გამოცხადდა და ამ კუთხითაც, მნიშვნელოვანია წარმოჩნდეს იგი. გარდა ამისა, აღსანიშნავია, ტურიზმის სფეროც და ამ მხრივ, ტურისტთა დაინტერესება, როგორც თავად გაეცნობით, ოზურგეთს აქვს საკამო რესურსი მის გასავითარებლად“
გაცნობის შემდგომ სტუმარ–მასპინძლებმა ერთმანეთს სიმბოლური საჩუქრები გადასცეს და ქალაქის დათვალიერების სურვილი გამოთქვეს.
პირველად, პროფესიული კოლეჯი „ჰორიზონტი“ დაათვალიერეს. დაესწრნენ კოლეჯში არსებული პროფესიული კურსების სამუშაო პროცესს. – სასიამოვნოდ გაოცებულები ვართ, კარგ გარემოში უწევთ ახალგაზრდებს სასურველი პროფესიის დაუფლება, მნიშვნელოვანია, რომ აქ მიღებული ცოდნა მათ დაეხმარებათ სამომავლოდ საქმის სწორად წარმართვაში, ასევე, რეგიონის განვითარებისთვის საჭიროა ამგვარად გადამზადებული კადრები.
კოლეჯის ადმინისტრაციამ სტუმრებს სამახსოვროდ მოსწავლეთა მიერ შეკერილი ნაციონალური სამოსი გადასცა, თავადაც სიმბოლური საჩუქარი მიიღო.
განსაკუთრებული მოწონება დელეგატებმა ისტორიული მუზეუმის მიმართ გამოხატეს:
„საამაყოა, რომ ასეთ პატარა ქალაქს ამდენი ხნის ისტორია აქვს დაცული და შემონახული, უფრო დიდ ქალაქებსაც კი არ აქვთ მსგავსი საგანძური. მოხიბლულები ვართ ამ ყველაფრის ნახვით, როგორც კი მუზეუმში ფეხი შემოვდგით, მივხვდით, რომ წინ საინტერესო სანახაობა გველოდა“.
ბოლოს, სტუმრებმა ექადიის წმინდა გიორგის სახელობის ტაძრის გალავნიდან ოზურგეთის ხედები დაათვალიერეს.
(R)
