"საქართველოს ინფრასტრუქტურული პროექტების ინიციატივის" ორგანიზებით, ამ წუთებში, სატუმრო რედისონში "რიჩ მეტალს გრუპი – საქმიანობის სოციალ-ეკონომიკური შედეგების შეფასება და გავლენა ეკონომიკაზე", პრეზენტაცია მიმდინარეობს.
ეკონომიკის ექსპერტებმა ლევან კალანდაძემ, ირაკლი ლექვინაძემ და ნოდარ ჭიჭინაძემ, წარმოადგინეს კვლევაში ასახული ტენდენციები – ოქროს მოპოვებისა და გადამუშავების მთლიანი დარგის და ოქროს შენადნობების ექსპორტის კუთხით დღეს არსებული პრობლემების შესახებ.
როგორც კვლევის ერთ-ერთმა ავტორმა, ეკონომიკის ექსპერტმა ირაკლი ლექვინაძემ განაცხადა, კომპანიის სრულფასოვანი ფუნქციონირებისა და მთლიანად ოქროს მოპოვებისა და გადამუშავების დარგის განვითარების კუთხით, დღეს ინვესტორისთვის რიგი პრობლემები და ხელისშემშლელი გარემოებები არსებობს.
"იმის გამო, რომ სახელმწიფოს მხრიდან რიგი ტექნიკური საკითხების მოუგვარებლობის გამო კომპანია "არემჯის" არ ეძლევა სრულფასოვანი საქმიანობის შესაძლებლობა, რეგიონიც და სახელმწიფო ბიუჯეტიც, ყოველწლიურად მილიონობით ლარს კარგავს.
ამასთან, დღეს უკვე დასამალი აღარ არის, რომ თუ არსებული მდგომარეობა არ შეიცვალა, არის რეალური საფრთხე, კომპანიაში დასაქმებულმა 3000-მა ადამიანმა სამუშაო დაკარგოს. ეს სერიოზული პრობლემაა არა მხოლოდ რეგიონისთვის, არამედ მთელი ქვეყნისთვის", _ განაცხადა ლექვინაძემ.
"საქართველოს ინფრასტრუქტურული პროექტების ინიციატივის" ხელმძღვანელ ლევან კალანდაძის თქმით, კომპანია "არემჯის" როლი და წვლილი მეტად მნიშვნელოვანია როგორც რეგიონის, ისე ქვეყნის მთლიან ეკონომიკაში და ექსპორტში. შესაბამისად, ხელისუფლება მეტი ყურადღებით და გულისხმიერებით უნდა ეკიდებოდეს იმ პრობლემების დროულ გადაწყვეტას, რაც დღეს ერთის მხრივ ინვესტორს და მეორეს მხრივ, მადნეულის მოპოვებისა და გადამუშავების მთელ დარგს გააჩნია.
