საქართველოს ეროვნულმა ბანკმა დღეს ლარის ახალი გაცვლითი კურსი დაადგინა. შესაბამისად, ხვალ ერთი ამერიკული დოლარი 1,8217 ლარი იქნება, დღეს კი, 1,7938 იყო.
ცნობისთვის, 22 ნოემბერთან შედარებით, დოლართან მიმართებით ლარის ფასი სამი თეთრით დაეცა, 12 ნოემბრიდან კი-10 თეთრით.
ლარის კურსის ცვლილებას საგანგაშოდ არ მიიჩნევენ მმართველ გუნდში. ფინანსთა მინისტრის მოადგილის, გიორგი კაკაურიძის განმარტებით, წლის ბოლოს გარკვეული ცვლილებები ლართან დაკავშირებით ყოველთვის ხდება, რაც საერთაშორისო ბაზარზე დოლარის გამყარებით არის გამოწვეული.
მთავრობაში ლარის კურსის ზრდას 1,8-ზე მაღალ ნიშნულზე ელოდებიან.
ფინანსთა მინისტრ ნოდარ ხადურის განცხადებით კი, საქართველოს ქონია უფრო მაღალი და უფრო დაბალი გაცვლითი კურსი.
"არანაირი საფრთხე საქართველოს ეკონომიკას არ შეიძლება დაემუქროს. უჩვეულო არაფერი ხდება, კიდევ ერთხელ ვამბობ, გაცვლითი კურსის დიდ მერყეობას მე არ ველი, ამის არანაირი ეკონომიკური საფუძველი არ არსებობს, რადგან გაზრდილია ექსპორტი, დოლარის გადარიცხვები, უცხოური ინვესტიციები" – განაცხადა მინისტრმა.
ექსპერტი დემურ გიორხელიძე მიიჩნევს, რომ ლარის კურსის დაცემა დოლართან მიმართებაში ხელუვნურადაა შექმნილი.
"ლარის კურსის დაცემა დოლარის მიმართ, ფულის კეთების ჩვეულებრივი საშუალებაა. დიდი ხანია ვამბობ, რომ ლარის კურსი ხელოვნურად მაღალ ნიშნულზეა გაჩერებული იმ გზით, რომ ფულის მიწოდებაა შეჩერებული, ამიტომ ლარის გეგმაზომიერი დევალვაცია უბრალოდ გარდაუვალია.
ახლა უნდა ვივარაუდოთ, რომ უკან არ წამოიყვანს ლარის კურსს ეროვნული ბანკი, წინააღმდეგ შემთხვევაში სრული მარაზმი იქნება. ცხადია ლარის კურსის დაგდება ხელოვნურად არ შეიძლება", – განაცხადა დემურ გიორხელიძემ.
