"ძალიან კარგი ქარხანა გაიხსნა აჭარაში. ეს არის ჩვენი მეღვინეების უდიდესი წარმატება. მინდა აღვნიშნო, რომ KTW ჯგუფი და კერძოდ, მისი ხელმძღვანელი ზურაბ ჩხაიძე, ძალიან მნიშვნელოვან პროექტებს ახორციელებს არა მხოლოდ აჭარაში, არამედ სხვა რეგიონებშიც. კიდევ ერთხელ ვისარგებლებ შემთხვევით და მოვუწოდებ კერძო სექტორს და ბიზნესმენებს, რომ მაგალითი აიღონ ამ კომპანიისგან," _ განაცხადა საქართველოს პრემიერ მინისტრმა ირაკლი ღარიბაშვილმა, რომელმაც ქედაში შეღავათიანი აგროკრედიტის თანადაფინანსებით "კახური ტრადიციული მეღვინეობის" ღვინის ახალი ქარხანა გახსნა.
ქედის ღვინის ქარხანა, რომელიც დასავლეთ საქართველოს უნიკალური ყურძნის ჯიშების მიღება-გადამუშავებას განახორციელებს, ირაკლი ღარიბაშვილმა KTW ჯგუფის დამფუძნებელთან ზურაბ ჩხაიძე-ასკანელთან და სოფლის მეურნეობის მინისტრ ოთარ დანელიასთან ერთად დაათვალიერა. პრემიერმა მევენახეობა-მეღვინეობის განვითარებაზე გაამახვილა ყურადღება და შეღავათიანი აგროკრედიტის წარმატებულ პროექტზე ისაუბრა.
ირაკლი ღარიბაშვილი: "რაც შეეხება კონკრეტულად მევენახეობა-მეღვინეობას, ამ დარგში ჩვენ მიერ გადადგმული ნაბიჯები მართლაც ძალიან წარმატებულია. 2 წლის განმავლობაში, რთველიდან მიღებულმა მევენახეების შემოსავალმა 300 მილიონ ლარს მიაღწია. ასევე, 2 წლის განმავლობაში მსოფლიოს 42 ქვეყანაში ქართული ღვინის ექსპორტი 250 პროცენტით გაიზარდა. წარმატებულმა შედეგებმა მეტი სტიმული მისცა გლეხებს, ფერმერებს. რეგიონებში დაიწყო ახალი ვენახების ინტენსიური გაშენება. შენდება ვაზის უნიკალური და იშვიათი ჯიშების ნერგები", _ განაცხადა პრემიერ-მინისტრმა.
ზურაბ ჩხაიძე: "კახური ტრადიციული მეღვინეობის" ღვინის ქარხნის მშენებლობისთვის სოფლის მეურნეობის მართვის სააგენტოს შეღავათიანი აგროკრედიტით 600 000 აშშ დოლარი გამოიყო, განხორციელებული ინვესტიცია კი მთლიანად მილიონ შვიდასი ათას ლარს შეადგენს.
უახლესი ევროპული ტექნოლოგიებით, თანამედროვე სტანდარტების შესაბამისი ლაბორატორიით, ცისტერნებითა და სამაცივრე მეურნეობებით აღჭურვილი ქარხანა, გურია-აჭარის უნიკალური ყურძნის ჯიშებს მიიღებს და სრული დატვირთვის პირობებში 1000 ტონამდე ყურძენს გადაამუშავებს. უფრო მეტიც, ჩვენ მზად ვართ, მომავალში კიდევ უფრო გავზარდოთ ინვესტიცია, თუკი ამის საჭიროება დადგება. არცერთი ტონა ყურძენი არ დარჩება გადაუმუშავებელი.
სოფლის მეურნეობის პროექტების მართვის სააგენტოს მიერ გახორციელებული "სასოფლო-სამეურნეო პროდუქტების გადამამუშავებელი საწარმოების თანადაფინანსების პროექტის" განხორციელების შემდეგ, მოსალოდნელია ახალი საწარმოების შექმნა და ეკონომიკური აქტივობის ზრდა. გარდა ამისა, რამდენიმე წლით წინ წაწევს ბიზნესს, რაც ძალიან მნიშვნელოვანია ქვეყნის განვითარებისთვის. პროექტი ხელს შეუწყობს ასევე სასოფლო-სამეურნეო საქმიანობის გააქტიურებას და რაც მთავარია, ადგილობრივი მოსახლეობის დასაქმებას."
საწარმო, 701,44 კვ.მ ფართობზე განთავსდება და 22 ადამიანს დაასაქმებს.
პრემიერის განცხადებით, მისასალმებელია, რომ საწარმო გადაამუშავებს ადგილობრივ ნედლეულს, რომელსაც ადგილობრივი მოსახლეობისგან ჩაიბარებს.
როგორც ირაკლი ღარიბაშვილმა აღნიშნა, სახელმწიფოს მხარდაჭერასა და კერძო სექტორთან თანამშრომლობას საქართველოში სოფლის მეურნეობის გამოსაცოცხლებლად გადამწყვეტი მნიშვნელობა აქვს.
ზურაბ ჩხაიძის განცხადებით, სპეციალურად აჭარლებისთვის გაიხსნება "აჭარული დარბაზი", სადაც მათი პროდუქციის დეგუსტაცია და აჭარული კერძების პოპულარიზაცია მოხდება, რაც იქაურობას კიდევ უფრო მეტად მომხიბვლელს გახდის ჩამოსული სტუმრებისთვის. ეს ყველაფერი კი, საბოლოო ჯამში, ხელს შეუწყობს ტურიზმის განვითარებას.
შეგახსენებთ, რომ "სასოფლო-სამეურნეო პროდუქტების გადამამუშავებელი საწარმოების თანადაფინანსების პროექტის" ფარგლებში აჭარაში, გურიასა და სამეგრელოში ხუთი ახალი საწარმო გაიხსნება.
სოფლის მეურნეობის პროექტების მართვის სააგენტომ "სასოფლო-სამეურნეო პროდუქტების გადამამუშავებელი საწარმოების თანადაფინანსების პროექტის" ფარგლებში პირველი ხუთი გრანტი გასცა. ხუთი საწარმოდან ორს, ერთს აჭარაში (ქედაში) და ერთს გურიაში (ჩოხატაურში) "KTW" ჯგუფი ააშენებს.
(R)
