საქართველოს სახალხო დამცველი, შესაძლოა, იმ კომისიის მუშაობას დააკვირდეს, რომელიც რელიგიის სახელმწიფო სააგენტოსთან შეიქმნა და ადიგენის რაიონის სოფელ მოხეში ყოფილი მეჩეთის ტერიტორიაზე სადავო ნაგებობის საკითხს სწავლობს.
უჩა ნანუაშვილი მიიჩნევს, რომ კომისიის მუშაობაში სახალხო დამცველის დამკვირვებლის სტატუსით ჩაბმა კომისიის მიმართ საზოგადოებრივ ნდობას გაზრდის.
"ადიგენის რაიონის სოფელ მოხეში მდებარე სადავო ნაგეგობის საკითხის ყოველმხრივი და ობიექტური განხილვა დიდი საჯარო ინტერესის სფეროს განეკუთვნება და ამ საკითხის შესწავლა თანასწორუფლებიანობისა და რელიგიური ტოლერანტობის დაცვის მიზნებს უნდა ემსახურებოდეს",_ აღნიშნულია ომბუდსმენის განცხადებაში.
ამიტომ, საქართველოს სახალხო დამცველი, კონსტიტუციური მანდატით გათვალისიწინებული უფლებამოსილებიდან გამომდინარე, მიზანშეწონილად მიიჩნევს დამკვირვებლის სტატუსით ჩაერთოს სადავო შენობასთან დაკავშირებით შექმნილი კომისიის საქმიანობაში.
მოთხოვნა რელიგიის საკითხთა სახელმწიფო სააგენტოს ომბუდსმენის აპარატიდან გუშინ გადაეგზავნა.
რელიგიის საკითხთა სახელმწიფო სააგენტოს ხელმძღვანელი ზაზა ვაშაყმაძე "გურია ნიუსთან" საუბრისას ამბობს, რომ კომისიას ომბუდსმენის განცხადება ჯერჯერობით არ მიუღია, თუმცა განცახდებას მიღებისთანავე განიხილავენ.
"მოხარული ვიქნებით, სახალხო დამცველი კომისიის მუშაობაში არა მარტო დამკვირვებლის სტატუსით, არამედ, საკითხის განხილვაში აქტიურ მონაწილეობასაც თუ მიიღებს“, _ ამბობს ვაშაყმაძე.
შეგახსენებთ, რომ მუსლიმ მრევლსა და ადგილობრივ მართლმადიდებლებს შორის დაპირისპირება სოფელ მოხეში 2014 წლის 18 ოქტომბერს დაიწყო. მუსლიმი მრევლი შენობის მუსლიმთა სამმართველოსთვის გადაცემას ითხოვდა, თუმცა, ადიგენის გამგეობაში აცხადებდნენ, რომ შენობას კულტურის სახლის სტატუსი აქვს და მისი სარეაბილიტაციო სამუშაოები უნდა დაწყებულიყო.
აქციის მონაწილეებიდან 14 პირი წინააღმდეგობის გაწევისა და წვრილმანი ხულიგნობისთვის დააკავეს, აქედან 3 მათგანი ყოველგვარი სანქციის, 11 კი, 250-ლარიანი ჯარიმის გადახდის სანაცვლოდ გაათავისუფლეს.
ადგილობრივი მუსლიმები აქციებს თითქმის მთელი კვირის განმავლობაში მართავდნენ. პროტესტის გამო, რამდენიმე დღის განმავლობაში მუსლიმმა მრევლმა, 6 სოფელში, მოსწავლეები სკოლაში არ გაუშვა.
მუსლიმები ხელისუფლებას 2014 წლის არჩევნების წინ დადებულ პირობას ახსენებდნენ და აცხადებდნენ, რომ ხელისუფლება მათ ამ შენობის გადაცემას დაპირდა, თუმცა დაპირება აღარ შეასრულეს.
თავის მხრივ, შენობის საქართველოს საპატრიარქოსთვის გადაცემას ითხოვდნენ სასულიერო პირები. მათი თქმით, საბჭოთა კავშირის დროს, ამ ადგილზე ეკლესია იყო, რომელიც განადგურდა. მეჩეთი კი იქ არასდროს ყოფილა.
ცნობისთვის, ერთ-ერთი პრობლემა ისიც არის, რომ საქართველოში თითქმის ყველა მეჩეთი კულტურის სახლში ან სხვა სახლებშია რეგისტრირებული, რადგან საქართველოს კანონმდებლობა რელიგიური სახლების რეგისტრაციას არ ცნობს. მოხეში მდებარე მეჩეთიც სალოცავ ადგილად არ არის რეგისტრირებული. შენობა ამჟამად ადგილობრივი გამგეობის ბალანსზეა.
საქართველოს პრემიერ მინისტრი ირაკლი ღარიბაშვილი აცხადებდა, რომ რელიგიურ ნიადაგზე ყოველგვარ ძალადობა და დაპირისპირება მისთვის მიუღებელია, თუმცა ამბობდა იმასაც, რომ სოფელ მოხეს მეჩეთი უკვე აქვს და ადგილობრივ მუსლიმებს ლოცვის პრობლემა არა აქვთ.
ცნობისთვის, არასამთავრობო ორგანიზაციებმა ადიგენის სოფელ მოხეში მომხდარ დაპირისპირება მუსლიმური თემის დევნად შეაფასეს და აღნიშნეს, რომ ამ ქმედებამ უკვე სისტემური ხასიათი მიიღო.
"უკანასკნელი ორი წლის განმავლობაში მუსლიმი თემის მიმართ რელიგიური ძალადობის არაერთი სერიოზული შემთხვევა გამოვლინდა (ნიგვზიანი, წინწყარო, სამთაწყარო, ჭელა, ქობულეთი, მოხე). რელიგიურ ძალადობის ყველა ამ ფაქტს კომუნალური ხასიათი ჰქონდა. ხელისუფლებამ სათანადოდ არ უპასუხა რელიგიური ექსტრემიზმის გამოვლინებებს, არ უზრუნველყო კერძო პირებისგან მომდინარე ძალადობის პრევენცია და ეფექტური გამოძიების ჩატარება“, _ აცხადებდნენ არასამთავრობო ორგანიზაციების წარმომადგენლები.
რელიგის საკითხთა სააგენტოში შექმნილი კომისია, სადაც ადიგენის მუნიციპალიტეტის ადგილობრივი თვითმმართველობის, საქართველოს კულტურისა და ძეგლთა დაცვის სამინისტროს, მუსლიმი და მართლმადიდებელი თემის 11 წარმომადგენელი შედის, 2 დეკემბერს ჩამოყალიბდა. მოხეში განვითარებულ მოვლენებზე 2014 წლის 27 დეკემბერს კომისიის პირველ სხდომაზე იმსჯელებენ. მანამდე კი, კომისიის საქმიანობაში სახალხო დამცველის ჩართვის საკითხიც გადაწყდება.
