დღეს, ქალაქ ოზურგეთის მუნიციპალიტეტის საკრებულოს თავმჯდომარეს საკრებულოს დეპუტატები თამარ ნადირიძე და ნათია შარაშენიძე შეხვდნენ და საკრებულოს გუშინდელ სხდომაზე მომხდარი ინციდენტის გამო, საკრებულოს თავმჯდომარისგან უსაფრთხოების გარანტიები მიიღეს.
"საიდან აქვს ამდენი უფლება ბეგლარ სიორიძის მრჩეველს? ან კონკრეტულად რას წარმოადგენს? რა ეხება, აქვს თუ არა იმის ფუნქცია, რომ ჩაერთოს საკრებულოს საქმიანობაში და ზეწოლა მოახდინოს თითოეულ ჩვენგანზე? რა გადაწყვეტილებებში ღებულობს მონაწილეობას? შეიძლება თუ არა წარმომადგენლობითი ორგანოს საქმიანობაში ჩაერთოს მერიის თანამშრომელი? ბატონო გელა, გაგვეცით ამაზე პასუხი და იზრუნეთ ჩვენს უსაფრთხოებაზე!"
_ მიმართავდნენ დეპუტატები საკრებულოს თავმჯდომარეს.
აღნიშნულ განცხადებასთან დაკავშირებით კომენტარი გააკეთა ქალაქ ოზურგეთის მუნიციპალიტეტის მერის ბეგლარ სიორიძის მრჩეველმა სოფო ჭანტურიამ.
“ქალბატონი ნათია შარაშანიძისა და თამარ (თამილა) ნადირიძის მიერ ადგილობრივ მედია-საშუალებებში გავრცელებული ინფორმაციები ძალიან ჰგავს “გაღმა შეედავე, გამოღმა შეგრჩება“-ს პოლიტიკას. მაშინ, როცა ცილსმწამებლური, უსაგნო, რეალობას მოკლებული განცხადებების კასკადს ავრცელებენ, როგორც საკუთარ სოციალურ ქსელებში ასევე გაზეთებში.
განსაკუთრებულ ახსნა-განმარტებას არ საჭიროებს ამ ქალბატონების აქტივობის მიზეზებზე ყურადღების გამახვილება, რადგან ცხადია, ისინი თავიანთი განცხადებებით საზოგადოებაში გამოწვეულ ინტერესის მიჩქმალვას ლამობენ. ისინი ჩიხში ისევ და ისევ საკუთარმა განცხადებებმა შეიყვანეს. მინიმუმ უხერხულია გამუდმებით ვითხოვდე იმ ბრალდებების დამადასტურებელი ფაქტების არსებობას, რაშიც მათგან ბრალი მედება. ჩვეულებრივი სიცრუეა, როცა შარაშანიძე და ნადირიძე საუბრობენ, ჩემი მხრიდან, მათი თავისუფლების უკანონო აღკვეთაზე, მუქარაზე მოსალოდნელ ხანძართან დაკავშირებით, კონსტიტუციის დარღვევაზე.
მინდა განსაკუთრებული ყურადღება გავამახვილო ნათია შარაშანიძის მიერ მედია-საშუალებებით გავრცელებულ ტყუილზე, სადაც ის საუბრობს, რომ თითქოს ჩემი მხრიდან ადგილი ჰქონდა ფიზიკურ ზეწოლას და დარბაზიდან არ გაშვების მიზნით ხელების გადაგრეხვას. ცხადია, რომ ზემოთ ნახსენებ ქალბატონებს ჯანსაღი კრიტიკისა და თანამშრომლობის ნაცვლად, თავიანთი პოლიტიკური არსებობის გასახანგრძლივებლად არჩეული აქვთ ჭიქაში ქარიშხლის ატეხვის პოლიტიკა. ბოლო პერიოდში, ჩემი მისამართით გაჟღერებული იმდენად აბსურდული და არასერიოზული განცხადებების მოსმენა მიწევს, რომ არ გამოვრიცხავ ერთ მშვენიერ დღეს რომელიმე მედიასაშუალებით გავიგო, რომ მე ვარ ბონი ელიზაბეტ პარკერი.
ვფიქრობ, არაფრის მომცემი იქნება მათთვის ჩემი ეს განცხადება და უმჯობესია სასამართლომ დაამტკიცოს სიმართლე“, _ აცხადებს სოფო ჭანტურია.
ამავე თემაზე: "რადგან ოზურგეთი პატარაა, ეს არ ნიშნავს "მაფიოზურად" მართოს მერმა თავისი ქალაქი"
