დღეს ოზურგეთის მუნიციპალიტეტის საკრებულოს სხდომა შედგა, სადაც ერთ-ერთ უმთავრეს საკითხზე: „ოზურგეთის მუნიციპალიტეტის ორგანოების, 2012-2013 წლების საქმიანობის შესახებ, სახელმწიფო აუდიტის სამსახურის აუდიტორული დასკვნის თაობაზე“ _ საკრებულოს თავმჯდომარის მოადგილემ, დიმიტრი კვერღელიძემ ისაუბრა.
მისივე თქმით, 6 იანვარს საფინანსო-საბიუჯეტო კომისიის სხდომაზე განიხილეს აუდიტის მიერ წარმოდგენილი ანგარიშები, რომელიც შემოწმების 2012-2013 წლის პერიოდს მოიცავს. მან კონკრეტულად ისაუბრა არაერთი ხარჯის შესახებ, რაზეც გონივრული ეჭვი გაუჩნდა სახელმწიფო აუდიტს.
_ კერძოდ, რაში დაიხარჯა 645 ათასი ლარი, რომელიც სტიქიით დაზარალებულთათვის იყო განკუთვნილი, სინამდვილეში კი ყველა ადამიანს, ვინც დაზარალებული იყო, არ გაეწია დახმარება და სხვებს გადაუხურეს სახლები, ასგვერდიან დასკვნაში ერთი კარგი არ წერია, _ აღნიშნა კვერღელიძემ და ისიც განმარტა, რომ „წელიწადი და ოთხი თვე გრძელდებოდა ასეთი ამბავი“
_ თუმცა, როცა ჩვენი ხელისუფლება მოვიდა, ეს ყველაფერი მალევე აღმოიფხვრა, _ განაცხადა კვერღელიძემ.
მან ასევე ისაუბრა მაღალი ფასებით გაკეთებულ ხარჯთაღრიცხვებზე, ხელოვნურად გაზრდილ თვითღირებულებებზე, რაც მისივე თქმით, 2012_2013 წლებში ხდებოდა. საკრებულოს თავმჯდომარის მოადგილემ ყოფილი გამგებლის, კოტე შარაშენიძის მიერ გამოწერილ პრემიებზეც ისაუბრა და 145 ათას ლარად ნაყიდი გრეიდერიც ახსენა.
კვერღელიძეს სოფელ შემოქმედის დეპუტატი ხვიჩა წულაძე შეეკამათა: ჩვენც ხომ არ დავარღვიეთ კანონი, პრემიებზე როცა ვსაუბრობთ და გრეიდერი არ უნდა ეყიდა? ერთი კი არა, ყველა სოფელს უნდა ჰყავდეს გრეიდერი, აბა, მანქანები უნდა ეყიდა? _ თქვა მან.
_ ხვიჩა, თქვენ არ მისმენთ, დამამთავრებინეთ, გრეიდერი უნდა ეყიდათ, მაგრამ იყიდა და გადასცა ერთ-ერთ შპს-ს, რომლისგანაც მერე საბაზრო ფასებში ქირაობდნენ. შეღავათს თუ არ გაუწევდნენ, ყიდვას აზრი ჰქონდა? ამას ვამბობ, _ თქვა კვერღელიძემ.
დეპუტატ ლელა ნაცვალაძის თქმით, შეცდომა და დანაშაული ერთმანეთისგან უნდა განვასხვავოთ:
_ ჩვენ შეცდომას და დანაშაულს ხშირად არ ვანსხვავებთ და ახლაც, რაკი თანამდებობაზე არ არის, უნდა ჩავწიხლოთ. დანაშაულს ვინც ჩადიოდა, თანამდებობაზე ისეთებიც დარჩნენ. სახლი ბევრს გადაუხურეს, ბევრი დარჩა. ხალხის ფსიქოლოგიაც არის ასეთი, რაც მეტს გაუკეთებ, მეტს ითხოვს. ზოგი ისჯება, ზოგი _არა. აბა, გადავხედოთ, თანამდებობებზე რამდენი დარჩა. აქ იურისტები არიან და იცით, რომ ვინც დოკუმენტზე ხელს აწერს, ის პასუხს აგებს. ხვალ, შეიძლება, უარესი ჰქნას სხვამ. მე მუდამ ვამბობდი, რომ შეცდომას და დანაშაულს რომ ვერ ვანსხვავებთ, იმიტომ ვართ ასე, _ აღნიშნა ნაცვალაძემ.
კოტე შარაშენიძის შესახებ სასაუბროდ სიტყვა ითხოვა სოფელ ცხემლისხიდის მცხოვრებმა, ნუგზარ გიორგაძემ, რომელიც შარაშენიძის გამგებლობის პერიოდში აქციების ერთ-ერთი ორგანიზატორი იყო. მან პათოსით ისაუბრა პოლიტიკაში "ქართული ოცნების“ როლზე და ხელისუფლებაში კოტე შარაშენიძის მოსვლას ოცნების დაღუპვა უწოდა.
_ ამის შესახებ კახი კალაძეს ვუთხარი და ახლა პრემიერი რომ ჩამოვა, იმასაც შევხვდები, თუ საჭირო გახდა, ეს დასკვნა პროკურატურას უნდა გადაეცეს, _ დასძინა გიორგაძემ.
_ პიროვნება არ გიყვარდეს, ეს იმას არ ნიშნავს, არაფერი გაკეთებულა, _ თქვა ხვიჩა წულაძემ.
