რა გახდა რუსთაველის გამზირზე, ე.წ. კაზარიანცის სახლში ხანძრის გაჩენის მიზეზი ჯერჯერობით კვლავ დაუდგენელია.
გავრცელებულ ინფორმაცია, რომ ხანძარი შენობის ეზოში განთავსებული ურნებიდან გავრცელდა, ოფიციალურად არ დასტურდება.
თუმაცა, ხანძრის გაჩენისთანავე გაჩნდა განსხვავებული ვერსიებიც. ერთ-ერთი ვერსიით კი, ხანძრის გაჩენას შენობაში განთავსებულ არასამთავრობო ორგანიზაცია" იდენტობას" უკავშირებენ, თუმცა საპასუხოდ, "იდენტობაში" აცხადებენ, რომ გამოძიების შედეგებს დაელოდებიან და კომენტარს მხოლოდ ამის შემდეგ გააკეთებენ.
ორგანიზაციის აღმასრულებელი დირექტორის მოვალეობის შემსრულებელი ანა რეხვიაშვილი უკანასკნელ დღეებში განვითარებულ მოვლენებზე საუბრობს და ყურადღებას ორგანიზაციის ირგვლივ განვითარებულ მოვლენებზე ამახვილებს.
ამის მიუხედავად, მისი თქმით, ამჟამად ყველაზე მნიშვნელოვანი ხანძრის გამომწვევი მიზეზების დადგენა და ამავე დროს, ორგანიზაციის თანამშრომელთა უსაფრთხოების უზრუნველყოფაა.
“ჩვენ გვესმის, თუ რატომ შეიძლება გავრცელებულიყო მსგავსი მოსაზრება. ყველას კარგად გვახსოვს 2014 წელს სპორტის სასახლეში გაჩენილი საეჭვო ხანძრის შესახებ, რომლის გამოც “იმედის ფესტივალი” ჩაიშალა. მაშინაც, ხანძარს წინ უსწრებდა რელიგიური უმცირესობების მიმართ გაჩაღებული აგრესიული კამპანია, რომლის მიზანიც ამ ფესტივალის ჩაშლა იყო.”, – აცხადებს ანა რეხვიაშვილი და დასძენს: “ჯერჯერობით მაინც თავს შევიკავებთ პოზიციის გამოხატვისგან, მიუხედავად იმისა, რაც ბოლო დღეების განმავლობაში ხდება. მიგვაჩნია, რომ მხოლოდ გამოძიების შედეგების მიხედვით უნდა ვიმსჯელოთ და მაქსიმალურად მოვერიდოთ ამ თემის შესახებ წინმსწრებ განცხადებებს”.
ორგანიზაციის თანამშრომლისა და მისი ყოფილი ხელმძღვანელის, ირაკლი ვაჭარაძის თქმით, არასამთავრობო ორგანიზაციის ოფისი ხანძრის შედეგად დაზიანებული არ არის.
“იდენტობას ოფისი და შენობის მხარე, რომელიც ყოფილი ელბაქიძის ქუჩას ესაზღვრება, ხანძარს გადაურჩა. მართალია, ოფისში დენი არაა, არის კვამლი და კედლებიც სველია, მაგრამ ცეცხლმა ჩვენთან შემოღწევა ვერ შეძლო”, – ამბობს ვაჭარაძე.
"იდენტობას" იურისტის, ინგა არახამიას თქმით, ხანძართან დაკავშირებით მას 13 იანვრის დილის 04:00 საათზევე ჰქონდა პირველი კომუნიკაცია გამომძიებელთან, რომელიც იდენტობის მიმართ მუქარის ფაქტზე სისხლის სამართლის საქმეს აწარმოებს.
არახამიას ცნობით, “იმავე [ძველი თბილისის] განყოფილების სხვა გამომძიებელი იძიებს აზარიანცის სახლში გაჩენილი ხანძრის ფაქტზე სისხლის სამართლის საქმეს.”
"იდენტობას" იურისტმა ხანძრის გაჩენის მიზეზების დადგენის შედეგების ორგანიზაციის წარმომადგენლებისთვის გაცნობა მოითხოვა, რაც ორგანიზაციას შესაძლებლობას მისცემს, გამორიცხოს ან პირიქით, დაადასტუროს საზოგადოებაში გაჩენილი ვარაუდი – ხომ არ შეიძლება ხანძარი "იდენტობის" მიმართ მუქარის საქმეს უკავშირდებოდეს და ხომ არ იყო ის განზრახვა გამოწვეული იდენტობის დასაშინებლად. არახამიას ცნობითვე, გამომძიებელმა მას განუმარტა, რომ ხანძრის გამომწვევი მიზეზებისა და ხანძრის კერის დადგენის მიზნით ექსპერტიზა უკვე დანიშნულია და ექსპერტიზის შედეგებს, "იდენტობას", როგორც ერთ-ერთ დაზარალებულ მხარეს, ოფიციალურად გააცნობენ.
"იდენტობას" იურისტის თქმით, მხოლოდ ექსპერტიზის დასკვნის შემდეგ შეეძლება ორგანიზაციას შეფასების გაკეთების შესაძლებლობა და მსჯელობა, თუ რამდენად შეიძლება ეს ყოფილიყო განზრახ ჩადენილი ქმედება და მუქარის კიდევ ერთი გზავნილი "იდენტობას" მიმართ.
“ამ ეტაპზე ამ ვერსიას, რა თქმა უნდა, აქვს არსებობის ლეგიტიმური უფლება, რაც უნდა იქნას ობიექტურად გამოძიებული და გამოირიცხოს უტყუარი მტკიცებულებებით”, – აცხადებს არახამია.
ცნობისთვის, ცეცხლმა კულტურის სამინისტროს ყოფილი შენობის, ე.წ. კაზარიანცის სახლის დიდი ნაწილი დღეს გამთენიისას გაანადგურა. დამწვარია 300 კვადრატული მეტრის ფართობი. ხანძრის დროს შენობაში ერთი ოჯახი იმყოფებოდა, რომლის ევაკუაციაც დროულად განხორციელდა.
ცეცხლის შედეგად დაიწვა შენობის სახურავი და რამდენიმე სართული. განადგურდა ხელოვნების სკოლაც, რომელიც შენობის მესამე სართულზე მდებარეობდა. ინციდენტის შედეგად ასევე დაზარალდნენ ნაგებობის პირველ სართულზე მდებარე კომერციული ფართების მეპატრონეებიც.
ადგილობრივების თქმით, ხანძარი შენობას ეზოში სანაგვე ურნებთან დანთებული ცეცხლისგან გადაედო, მიმდინარეობს გამოძიება. ადგილზე საგანგებო სიტუაციათა სამსახურის 16 ბრიგადასთან ერთად საპატრულო პოლიციაც მუშაობდა.
ადგილობრივები და შენობაში განთავსებული კომპანიების წარმომადგენლები აცხადებენ, რომ შენობის ეს ნაწილი ეკუთვნის "სილქ როუდ გრუპს“ და მისმა მფლობელმა არაფერი არ გააკეთა იმისათვის, რომ ძველი გაყვანილობა გამოეცვალა ასეთი შემთხვევის თავიდან ასარიდებლად.
სწორედ მოძველებულ გაყვანილობას ასახელებენ ხანძრის სავარაუდო გამომწვევ მიზეზად, თუმცა ზუსტი პასუხი ამ დრომდე უცნობია.
