FactCheck.ge პოლიტიკოსთა განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. 13-დან 20 იანვრამდე, ფაქტ-მეტრმა სხვადასხვა გადამოწმებულ ფაქტზე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, პრეზიდენტ მარგველაშვილის განცხადებას ეხებოდა. გადაცემა „რეაქციაში,“ თოქშოუს წამყვანმა პრეზიდენტ გიორგი მარგველაშვილს საკუთარი ცოლის ძმის შეწყალებასთან დაკავშირებით შეკითხვა დაუსვა. საპასუხოდ, პრეზიდენტმა განაცხადა: „მიმაჩნია, რომ ამ შემთხვევაშიც ისეთივე ლმობიერი ვიყავი, როგორც სხვა შემთხვევებში. ასეთი შემთხვევა, იგივე ბრალდებაზე შეწყალება, შემდეგაც ყოფილა“.
გასულ წელს, საინფორმაციო სააგენტო presa.ge-მ გაავრცელა ინფორმაცია, რომ გიორგი მარგველაშვილმა თავისი ცოლის ძმა შეიწყალა, რომელიც განზრახ მკვლელობის მცდელობისთვის იყო მსჯავრდებული. სწორედ აღნიშნულ ინფორმაციას ეყრდნობოდა ჟურნალისტის შეკითხვაც. პრეზიდენტმა ცოლის ძმის შეწყალების ფაქტი არ უარყო და აღნიშნა, რომ იმავე მუხლით გასამართლებული სხვა მსჯავრდებულებიც შეუწყალებია.
პრეზიდენტის ადმინისტრაციიდან მიღებული ინფორმაციის თანახმად, განზრახ მკვლელობისთვის დაკავებული პირების შეწყალება 2004 წლიდან 2014 წლის ნოემბრამდე არაერთხელ მომხდარა. ინაუგურაციიდან (2013 წლის 17 ნოემბრიდან) 2014 წლის ნოემბრამდე გიორგი მარგველაშვილმა, აღნიშნული დანაშაულისთვის დაპატიმრებული 7 პირი შეიწყალა.
შესაბამისად, მისი განცხადება სიმართლეს შეესაბამება.
გასულ კვირას ფაქტ-მეტრმა პრემიერ-მინისტრის განცხადებებიც გადაამოწმა. მათგან ერთ-ერთი, საქართველოში კორუფციის რისკების დაბალ მაჩვენებელს ეხებოდა. ირაკლი ღარიბაშვილის თქმით, „კორუფციის რისკების მიხედვით საქართველო მე-11 ადგილზეა და ბევრ განვითარებულ ქვეყანას უსწრებს“.
როგორც ფაქტ-მეტრმა დაადგინა, Trace International და RAND Corporation-ის თანამშრომლობით გამოქვეყნებულ კორუფციული რისკების ინდექსში საქართველო მე-11 ადგილს იკავებს და მიუხედავად იმისა, რომ სხვა ინდექსები მნიშვნელოვნად განსხვავებულ შედეგებს იძლევიან, აღნიშნული კვლევის მიხედვით საქართველო ბევრ განვითარებულ ქვეყანაზე უკეთეს შედეგს აჩვენებს.
ფაქტ-მეტრმა პრემიერის ეს განცხადება სიმართლედ შეაფასა.
ირაკლი ღარიბაშვილის კიდევ ერთი განცხადება ქვეყნის ეკონომიკურ ზრდას ეხებოდა. „2014 წელს საქართველოს ეკონომიკური ზრდა 5%-ს გადააჭარბებს… ჩვენზე ძლიერი ეკონომიკის მქონე ქვეყნებში ეკონომიკური ზრდის მაჩვენებელი ჩვენზე დაბალია“ – განაცხადა პრემიერმა.
ფაქტ-მეტრის კვლევის თანახმად, 2014 წლის 11 თვის მონაცემებით, საქართველოს მშპ-ს ზრდის მაჩვენებელმა 5% შეადგინა. დიდი ალბათობით, საქართველოს 2014 წლის ეკონომიკური ზრდა 5%-თან ახლოს იქნება (2014 წლის ეკონომიკური ზრდის მონაცემებს სტატისტიკის ეროვნული სამსახური მიმდინარე წლის მარტში გამოაქვეყნებს).
ირაკლი ღარიბაშვილმა საქართველოს ეკონომიკური ზრდის მაჩვენებელი განვითარებული ეკონომიკის მქონე ქვეყნების ზრდის ტემპს შეადარა. მსგავსი შედარება არასწორია, რადგან განვითარებულ ქვეყნებში ეკონომიკის მაღალი პროცენტული ზრდა ძალიან რთულია. რეალური სურათის მისაღებად, საქართველოს ეკონომიკური ზრდის ტემპი განვითარებადი ეკონომიკის მქონე ქვეყნების ზრდის მაჩვენებელს უნდა შედარდეს. ეკონომიკური ზრდის მიხედვით,აღმოსავლეთ ევროპისა და ცენტრალური აზიის ქვეყნების ჯგუფში საქართველო მეშვიდე ადგილს იკავებს, ხოლო მსოფლიო მასშტაბით 152 განვითარებად ქვეყანას შორის 49-ე ადგილზეა.
მიუხედავად იმისა, რომ ირაკლი ღარიბაშვილი ფაქტობრივ მონაცემებს მეტ-ნაკლებლად ზუსტად ასახელებს, ის შედარებებს არასწორად ახდენს და საქართველოს ეკონომიკური ზრდის წარმატებას გადაჭარბებულად წარმოაჩენს. ამასთან, ის არაფერს ამბობს 2014 წლის ბოლო თვეებში შემცირებულ საქართველოს ეკონომიკურ ზრდაზე.
შესაბამისად, მისი განცხადება მეტწილად მცდარია.
გასულ კვირას ფაქტ-მეტრმა ჩხოროწყუს მაჟორიტარი დეპუტატის, ვახტანგ ლემონჯავას განცხადებაც გადაამოწმა. ლემონჯავას თქმით, „ჩხოროწყუს რაიონში მოსახლეობის დაახლოებით ერთი მეოთხედი გამრიცხველიანებული ჯერ კიდევ არ არის. ეს პროცესი 2013 წლის გაზაფხულზე უნდა დამთავრებულიყო. „ქართული ოცნების“ გენერალურმა მდივანმა, ბატონმა კალაძემ, ათასი ჩხოროწყუელი ადგილობრივი არჩევნების წინა დღეს მოატყუა და უთხრა, რომ ჩხოროწყუს გაზიფიკაცია დაიწყებოდა ერთ კვირაში, რაც ჯერ პროექტშიც კი არ არის“.
ფაქტ-მეტრის მიერ მოპოვებული ინფორმაციით, ჩხოროწყუს რაიონში სულ 7 813 აბონენტი უნდა გამრიცხველიანებულიყო. 2014 წლის 1 დეკემბრის მონაცემით, 6 636 აბონენტია გამრიცხველიანებული. გამრიცხველიანების გარეშე 1 177 აბონენტია დარჩენილი, რაც აბონენტთა საერთო რაოდენობის არა ერთი მეოთხედი (როგორც დეპუტატი ამბობს), არამედ ერთი მეექვსედია. გამრიცხველიანების დასრულება ენერგეტიკის სამინისტროს, ისევე როგორც “ENERGO- PRO Georgia”-ს ინფორმაციით, 2015 წლისათვის არის დაგეგმილი.
გეგმის მიხედვით 2015 წელს 516 აბონენტის გამრიცხველიანება უნდა განხორციელდეს. ამას ემატება დარჩენილი 661 აბონენტის (2014 წლის გეგმასთან ჩამორჩენა) გამრიცხველიანებაც, რაც ენერგეტიკის სამინისტროს განმარტებით, 2015 წლის მარტამდე უნდა მოხდეს. იქიდან გამომდინარე, რომ 2014 წელს დაგეგმილი 1206 აბონენტის ნაცვლად მხოლოდ 545 აბონენტის გამრიცხველიანება მოხერხდა, 2015 წელს გამრიცხველიანების დასრულება (1 177 აბონენტი) გარკვეულწილად სათუოა.
რაც შეეხება ჩხოროწყუს რაიონის გაზიფიცირებას, 2015 წლის გაზიფიცირების გეგმა ჯერ დაზუსტებული არაა და შესაბამისად, იმის თქმა, 2015 წელს ამ რაიონის გაზიფიცირება ნამდვილად მოხდება თუ არა, შეუძლებელია. ჩვენ 2015 წლის გაზიფიცირების გეგმის შესახებ ინფორმაცია ენერგეტიკის სამინისტროში კიდევ ერთხელ გადავამოწმეთ. სამინისტროს პასუხის მიხედვით, მუშაობა ამ კუთხით ჯერ კიდევ მიმდინარეობს და დასრულებისთანავე ის სამინისტროს ვებგვერდზე განთავსდება. თუმცა, აღსანიშნავია, რომ გაზიფიცირების დაწყებას კახა კალაძე მოსახლეობას 2014 წლის ზაფხულიდან დაპირდა.
ამ გარემოებების გათვალისწინებით, ვახტანგ ლემონჯავას განცხადება მეტწილად სიმართლედ შეფასდა.
