სასჯელაღსრულებისა და პრობაციის სამინისტროს ინფორმაციით, გლდანის ციხეში 47 უვადო პატიმრობამისჯილი პირი შიმშილობს.
როგორც "გურია ნიუსს“ სამინისტროში განუცხადეს, პატიმრები ამნისტიის შესახებ კანონის პროექტს აპროტესტებენ და მათი საქმეების გადახედვას მოითხოვენ.
მოშიმშილე პატიმრები ასევე აპროტესტებენ იმას, რომ მათ საქმეებს არც ე.წ. უდოს და არც პრეზიდენტის შეწყალების კომისია არ განიხილავს.
პატიმრების შიმშილობის შესახებ ინფორმაცია უფლებადამცველმა დიმიტრი ლორთქიფანიძემ გაავრცელა. მისივე ინფორმაციით, პატიმრების პროტესტს უახლოეს დღეებში მათი ოჯახის წევრები და ახლობლებიც შეუერთდებიან.
შეგახსენებთ, რომ სულ საქართველოში 90 უვადო პატიმრობა მისჯილი მსჯავრდებულია.
