"სამართალდამცავთა დაცვის ლიგა" ე.წ. კორტების სპეცოპერაციაში მონაწილე სამართალდამცველთა სიის გამოქვეყნების გამო შეშფოთებულია და სახალხო დამცველს სასწრაფო რეაგირების თხოვნით მიმართავს.
"ჩვენთვის ცნობილი გახდა, რომ მასმედით გავრცელდა ე.წ. კორტების სპეცოპერაციაში მონაწილე სამართალდამცველთა სრული სია, მათი იმჟამინდელი თანამდებობებისა და პიროვნებების იდენტიფიცირების მითითებით, რაც ჩვენს სამართლიან შეშფოთებას იწვევს. დარღვევულია უდანაშაულობის პრეზუმპცია. ამ პირების მიმართ მიმდინარეობს რეპრესიები, რომელიც გამოიხატება შემდეგში: ამჟამად შინაგან საქმეთა სამინისტროში დასაქმებულ პოლიციელებს სამინისტროს გენერალურ ინსპექციაში ორგანოდან დათხოვნის თაობაზე პატაკებს იძულებით აწერინებენ და თარიღის მითითებას კატეგორიულად უკრძალავენ; პროცესს პროკურატურის წარმომადგენელი ესწრება, შემდეგ კი, შსს გენერალური ინსპექციის თანამშრომლებს პოლიციელები მთავარ პროკურატურაში გადაჰყავთ; პოლიციელთა დაკითხვა ადვოკატების გარეშე მიმდინარეობს, აუცილებელ პირობად უყენებენ მათთვის სასურველი ჩვენების მიცემას, რის შემდგომაც ისინი შეინარჩუნებენ თანამდებობებს, წინააღმდეგ შემთხვევაში მათი პატაკები იქნება დაკმაყოფილებული;
იმ თანამშრომლებს კი, რომლებიც უკვე გათავისუფლებულები არიან შინაგან საქმეთა სამინისტროდან სასურველი ჩვენების სანაცვლოდ მაღალანაზღაურებად სამსახურებში დასაქმებას სთავაზობენ. შეშფოთებას იწვევს, რომ ე.წ. დაკითხვებს არ ასწრებენ ადვოკატებს, რაც წინააღმდეგობაში მოდის: 1) საერთაშორისო სამართლით აღიარებულ პრინციპებთან; 2) ადამიანის ძირითად უფლებებსა და თავისუფლებებთან; 3) პროკურატურის იმ განცხადებასთან, რომ აღნიშნულ საკითხზე გამოძიება გამჭვირვალედ ჩატარდებოდა", _ ნათქვამია განცხადებაში.
"სამართალდამცავთა დაცვის ლიგა" სახალხო დამცველს მიმართავს, სასწრაფო რეაგირება მოახდინოს და საჯარო გამოსვლით დააფიქსიროს პოზიცია, ვინაიდან იმ პოლიციელთა სიცოცხლეს, რომელთა ვინაობაც გასაჯაროებულია, რეალური საფრთხე ემუქრება.
