შავ ზღვაში, სამსუნის აკვატორიაში, ამ წუთებში მეჩეჩზე მჯდარ გემზე მყოფი მეზღვაურების გადასარჩენად, სამაშველო ოპერაცია მიმდინარეობს.
დაზიანებულ გემზე მყოფ მეზღვაურთა შორის, საქართველოს მოქალაქეებიც არიან. გემი დაახლოებით ერთი თვეა მეჩეჩზე ზის და გუშინ ატეხილმა შტორმმა ისე დააზიანა, ჩაძირვა დაიწყო.
სამაშველო ოპერაციაში საზღვაო მაშველებთან ერთად ვერტმფრენიცაა ჩართული და ამ დროისათვის გემზე მყოფი ათივე მგზავრი ხმელეთზეა გადმოყვანილი.
მაშველებს ხელი ძლიერმა შტორმმა შეუშალა და რამდენიმე ადამიანის გემიდან გამოყვანა ძლიერ გართულდა. რის გამოც მეზღვაურები ვერტმფრენის დახმარებით თოკებით სათითაოდ გადაიყვანეს ზმელეთზე.
ინტერნეტგამოცემა www.samsunkenthaber.com-ის ინფორმაციით, გემზე მყოფ მეზღვაურთა შორის საქართველოს მოქალაქეების გარდა, უკრაინის, აზერბაიჯანის და ლიტვის მოქალაქეებიც იმყოფებოდნენ.
სამსუნის საზღვაო პორტის წარმომადგენლების განცხადებით, ცუდი ამინდისა და შტორმის შედეგად დაზიანებულმა გემმა ზღვაში უმისამართო დრეიფი დაიწყო, რის გამოც სამაშველო ოპერაცია გართულდა.
მშრალი ტვირთის გემი „Gulf Рио“ 1984 წელსაა გამოშვებული და სიგრძით 89 მეტრია. მას მარცველეული გადაჰქონდა. დაზიანების გამო გემის რამდენიმე ავზიდან ზღვაში საწვავიც ჩაიღვარა.
მომხდართან დაკავშირებით ჯერჯერობით, საქმის კურსში არ არის საქართველოს საზღვაო ადმინისტრაციის საზღვაო სააგენტო. „გურია ნიუსთან“ საუბრის დროს მისმა წარმომადგენლებმა განაცხადეს, რომ ამის შესახებ ინფორმაცია ამ დროისათვის არ მიუღიათ და შესაბამისად არც გემზე მყოფი მესაზღვრეების ვინაობა იციან.
