“დავიღალე ამდენი ინტრიგით, მეტი არ შემიძლია, სახლში მივდივარ!”

ა(ა)იპ "სკოლამდელი სააღმზრდელო ცენტრში" დავით დობორჯგინიძის დანიშვნას, მუნიციპალიტეტის გამგებელი ზაზა ურუშაძე "ახალი სიცოცხლის" საჭიროებით ხსნიდა, თუმცა, რეალურად, იქ ხელმძღვანელის შეცვლასა და ზონის კურატორების დანიშვნის გარდა, ბევრი უწყებაში გასახორციელებელ კადრების წმენდას ელოდა. 

ყველა აქტიურად საუბრობდა იმაზე, რომ დობორჯგინიძეს მუნიციპალიტეტის  ხელმძღვანელობისგან დირექტივა ჰქონდა მიღებული, სამსახურიდან გაეშვა რამდენიმე არასასურველი თანამშრომელი, თუმცა, მოხდა ისე, რომ ახალმა უფროსმა ხელმძღვანელობის მოლოდინი ვერ გაამართლა და ბოლომდე იზრუნა ძველი კადრების შესანარჩუნებლად.

ბაღების ცენტრის ბიუჯეტი დობორჯგინიძის მისვლამდე 1 200 000 ლარს შეადგენდა  და  ბევრს ბიუჯეტის ამგვარი სიმსუყე ეჭვსაც უჩენდა, რომ იქ, შესაძლოა, კორუფციასთან გვქონოდა საქმე. გასულ კვირას მომხდარმა ფაქტმა, როცა ფინანსურმა პოლიციამ ქრთამის აღების ფაქტზე აიყვანა ცენტრის უფროსი და მთავარი სპეციალისტი, უფრო გააძლიერა მითქმა-მოთქმა.

დობორჯგინიძემ, როგორც გამოცდილმა ფინანსისტმა, ახალ სამსახურში  მისვლისთანავე გააკეთა ანალიზი და მაშინ "გურია ნიუსთან" საუბარში აღნიშნა კიდეც, რომ სამსახურს რეალურად 500 ათასი ლარი ესაჭიროებოდა დამატებით და ასაბუთებდა კიდეც ამ მოთხოვნას. გამოდის, რომ იმ გამოწვევებისთვის, რომლებიც ბაღების გაერთიანების წინაშე იდგა, მილიონ 200 ათასი რეალურად საკმარისი არ იყო.

როგორც ირკვევა, მუნიციპალიტეტის გამგებელი ზაზა ურუშაძე დაჟინებით ითხოვდა ბაღების გაერთიანებაში ფინანსური პოლიციის შესვლას, მაგრამ გაუგებარია, როგორ უნდა "მოეწვია", როცა კონკრეტული დანაშაულის ნიშნები რეალურად არ იკვეთებოდა. უფრო მეტიც, ჯერ გამგეობის აუდიტის სამსახურის დასკვნაა ამის ნათელი მაგალითი, რომელიც სხვა ა(ა)იპ-ების "პოლიტიკანაზავი" დასკვნებისგან განსხვავებით, გაცილებით დადებითი იყო.

"გურია ნიუსთან" კომენტარში ზაზა ურუშაძე აღიარებს კიდეც იმ ფაქტს, რომ მან დობორჯგინიძეს ფინანსური პოლიციის შემოყვანა ურჩია, მაგრამ გაერთიანების ხელმძღვანელმა რჩევა არ გაითვალისწინა და მხოლოდ აუდიტის ხელახალ  შემოწმებას დასჯერდა. ჩვენი ინფორმაციით, სწორედ აქ გაწყდა ბოლო ძაფი ურუშაძისა და დობორჯგინიძის ურთიერთობაში.

აუდიტის ხელახალი დასკვნა ბევრად არ განსხვავდებოდა წინამორბედისგან და არც აქ იკვეთებოდა რაიმე სერიოზული დარღვევები. აუდიტორმა თემურ ბარამიძემ ჩვენთან სატელეფონო საუბარში დაგვიდასტურა კიდეც ეს იმ დოკუმენტაციის საფუძველზე, რაც მან ადგილზე შეისწავლა.

გაერთიანების ხელმძღვანელის მოვალეობის შემსრულებლად ურუშაძემ თავისი მრჩეველი დავით წულაძე დანიშნა და, ჩვენი ინფორმაციით, იმ მისიის შესრულება დაავალა, რომელიც დობორჯგინიძემ თავის დროზე ვერ (თუ არ) შეასრულა. წულაძეს, ფინანსური პოლიციის შემოსვლის მუქარით, არასასურველი კადრების დაშინება არ გასჭირვებია. ზეწოლას პირველმა ვერ გაუძლო ბაღების ყოფილმა დირექტორმა და აქამდე ერთ-ერთი ზონის კურატორად ჩამოქვეითებულმა ნინო ხალვაშმა. მან ზეწოლის ფაქტი არც უარყო და არც დაადასტურა: "დავიღალე, რა, ამდენი ინტრიგით. მეტი არ შემიძლია. სახლში მივდივარ!" _ მოკლედ გვითხრა ხალვაშმა.

საკუთარი ნებით დაწერა განცხადება ა(ა)იპ-ის მთავარმა ბუღალტერმა ლალი ტორონჯაძემაც, თუმცა, წულაძეს ჯერ არ გადაუწყვეტია მისი გაშვება. მასზე ზეწოლის ფაქტს უარყოფს "მთავარი არასასურველი" კადრი _ მაკა ურუშაძე, რომელიც საკუთარი ნებით თანამდებობის დატოვებას არ აპირებს.

დავით წულაძის დანიშვნის შემდეგ, ბაღების სამსახურში განვითარებულ მოვლენებზე ლანჩხუთის მუნიციპალიტეტის საკრებულოს წევრმა კახა ასკურავამ სოციალურ ქსელში კომენტარი გააკეთა: "როცა ფინანსური პოლიციის შემოსვლით დაგემუქრებიან, ზეწოლაა, აბა, რა არის?!  ეს პროცესი არ დაწყებულა არც გუშინ და არც გუშინწინ, ეს პროცესი ცოტა კიდევ უფრო ადრე დაიწყო, რასაც იმჟამინდელი ხელმძღვანელიც შეეწირა, ხოლო ახალი ხელმძღვანელიც არ გახდა პოლიტიკური დაკვეთის პირდაპირ შემსრულებელი. დათო დობორჯგინიძეს პირდაპირ მოსთხოვეს გაეშვა ყველა, ვინც არასასურველი პერსონებად ითვლებოდა, რაც არ გააკეთა და დაპირისპირებაში შევიდა გამგებელ ურუშაძესთან. შემდგომი მოვლენები ყველასთვის ნათელია თუ როგორც განვითარდა… სამწუხაროდ, იმ ბრალდებას, რასაც გამოძიება უკვე ყოფილ ხელმძღვანელს და სპეციალისტს ედავება, არაფერი ამართლებს, მაგრამ ამ მეტად წარმატებული სამსახურის მუშაობაში ეს მოვლენები ძალიან უარყოფითად აისახება. რაც შეეხება პოლიტიკურ ასპექტების არსებობას მიმდინარე მოვლენებში, ეს პატარა ბავშვმაც კი იცის ლანჩხუთში".