ოთხშაბათს, ლანჩხუთის მუნიციპალიტეტის საკრებულოს რიგგარეშე სხდომა გაიმართა, რომლის დღის წესრიგი 2 საკითხით შემოიფარგლა. საუბარია სამომავლოდ ჩასატარებელი ინფრასტრუქტურული პროექტების საპროექტო დოკუმენტაციის შექმნასა და საექსპერტო მომსახურებისთვის საჭირო თანხების მუნიციპალიტეტის შესყიდვების გეგმაში და ბიუჯეტში ასახვის საკითხზე.
საქართველოს მთავრობამ 3 თებერვლის #121 განკარგულებით, საპროექტო დოკუმენტაციის შექმნისთვის და საექსპერტო მომსახურებისთვის 244 022 ლარი გამოყო და დეპუტატებმა ეს თანხა შესყიდვების გეგმაში სიამოვნებით ასახეს კიდეც. რაც შეეხება უშუალოდ ინფრასტრუქტურული პროექტების ჩამონათვალს, აქ რამდენიმე დეპუტატს შეკითხვები გაუჩნდათ. კერძოდ, გია გოგუაძემ ნუსხაში ვერ იპოვა დაპირებული გრეიდერის შესასყიდი თანხა და დაეჭვდა, ამ თანხის ხარჯზე ხომ არ მოხდა ამ 244 022 ლარის გამოყოფაო. დეპუტატი გამგებელმა დაამშვიდა: "ამ ეტაპზე გრეიდერის თანხა ამ ნუსხაში ვერ მოხვდა იმიტომ, რომ მთავრობა ტექნიკის შესყიდვაზე სამომავლოდ აპირებს ტენდერის გამოცხადებას და გრეიდერის შესყიდვაც მაშინ განხორციელდება," _ განაცხადა ზაზა ურუშაძემ.
სუფსის მაჟორიტარმა დეპუტატმა ჯუმბერ ბლაგიძემ შეშფოთება გამოთქვა სუფსის ცენტრის რეაბილიტაციის თანხის შემცირებაზე: "რა მოხდა, ვერ გავიგე, 200 ათას ლარზე შევთანხმდით, მაგრამ რატომღაც ეს თანხა 185 ათას ლარამდე შემცირდა. გამაგებინეთ _ რატომ?"
აქაც გამგებელმა ითავა კიდევ ერთი დეპუტატის დაშოშმინება: "არაა პრობლემა, ეს მიახლოებითი თანხებია და პროექტის გაკეთების შემდეგ დაზუსტდება. ჩათვალეთ, რომ 200 ათასი ლარია", _ დასძინა ურუშაძემ.
საგულისხმო იყო რომან ბიწაძის პოზიცია, სადაც მან შესაძლო კანონდარღვევაზე ისაუბრა: "რატომ ვარღვევთ კანონს და რატომ მივდივართ მთავრობის წინააღმდეგ? თუ მთავრობამ დამატებით გამოგვიყო საპროექტო დოკუმენტაციისა და საექსპერტო მომსახურების თანხები, სტიქიის შედეგად დაზიანებული ობიექტების შემთხვევაში, თავად შემსრულებლებს რატომ უწევთ ამ პროცედურების გავლა, უშუალოდ პროექტისთვის განკუთვნილი თანხებიდან?"
ბიწაძემ კითხვები კი დასვა, მაგრამ, განმარტება ამ საკითხზე არავის გაუკეთებია.
