პრემია ნაკურთხია, პატრიარქის მიერ – ეს ფრაზა კახური იუმორის ნაწილი არ გეგონოთ, საკრებულოს სხდომაზე ნათქვამი არგუმენტია, რომლითაც „ქართული ოცნების“ წევრი დეპუტატი საახალწლოდ გაცემულ პრემიებზე დავის შეწყვეტას შეეცადა.
დავა გურჯაანის საკრებულოს სხდომაზე კახეთის საინფორმაციო ცენტრმა გადაიღო – 10 თებერვალს გავრცელებულმა ამ ინფორმაციამ საზოგადოებაში არაერთგვაროვანი რეაქცია გამოიწვია. რადიო „საქართველოს ხმის“ გადაცემა „პრეს-რევიუში“ სტუდიის ტელეფონი ფაქტობრივად „აფეთქდა“. საოცარი იყო „ღვთისმოშიში“ საკრებულოელების განმარტება. “მხედველობაში მქონდა, რომ პატრიარქის მიერ როგორც ჯარისკაცის სამსახურია ნაკურთხი, ისე საჯარო სამსახურია-მეთქი. შეიძლება, განერვიულებული ვიყავი და რაღაც ისე ვერ ვთქვი,” – განაცხადა დეპუტატმა ზაქარია ქაჩლიშვილმა „ნეტგაზეთთან“ საუბარში.
ვერაფერს იტყვი. რკინის ლოგიკაა, არადა მე ორი შეკითხვა გამიჩნდა: 1. როგორც მოიქცეოდა ნებისმიერი ევროპული ქვეყნის ელექტორატი, მათ რჩეულს მსგავსი განცხადებები რომ გაეკეთებინათ. 2. როგორ მოხვდნენ „ქართული ოცნების“ საარჩევნო სიაში ადამიანები, რომლებიც რაღაცას ისე ვერ ამბობენ.
იმავე დღეს მონიტორინგის ცენტრ „მედიატორის“ დამფუძნებელმა ლევან ხაბეიშვილმა გაავრცელა ინფორმაცია, რომ „თბილისის საკრებულოს თავმჯდომარის მოადგილემ გიორგი ტყემალაძემ 5 თვის განმავლობაში 4 ტონა ბენზინი დახარჯა. გამოდის, რომ ბატონი ტყემალაძე დღეში 22 ლიტრ ბენზინს მოიხმარდა. აღსანიშნავია, რომ ამ ადამიანს ემსახურება ავტომობილი „KIA”, რომელიც იმიტომ შეარჩიეს, რომ ნაკლებ საწვავს მოიხმარს. გამოდის, რომ ეს ადამიანი დღეში 200 კილომეტრს გადიოდა, რაც საკრებულოს დეპუტატისთვის არარეალურია“.
მდააა. . . მეტს ვერაფერს ვიტყვი.
***
„რუსთავი 2“-მა საკუთარ სტილსაც კი გადაამეტა და გიორგი გაბუნიამ თავისი „არჩევანი“, ყოფილ მთავარ პროკურორ მალხაზ ზოდელავასთან ერთად, „ავგიას თავლად“ აქცია. ამ ამაზრზენ კამპანიასთან დაკავშირებით ექს-პრემიერ ზურაბ ჟვანიას ახლო მეგობრებმა და დაცვის ყოფილმა წევრებმა „რეპორტიორის" პრესკლუბში საგანგებო ბრიფინგი გამართეს: „ჩვენ, ზურაბ ჟვანიას მეგობრები, მივმართავთ ქართულ საზოგადოებას, პრესას, საგამომძიებო ორგანოებს – ის რაც ხდება ზურაბ ჟვანიას სახელის ირგვლივ, სრულიად შეუწყნარებელი და შეურაცხმყოფელია არა მარტო ჩვენთვის და მისი ოჯახის წევრებისათვის, არამედ მთელი საზოგადოებისათვის… მოგმართავთ ჟურნალისტებს, პრესისა და ტელევიზიის წარმომადგენლებს – ნუ ახდენთ ამ სიცრუისა და სიბინძურის საჯარო ტირაჟირებას, ნუ უწყობთ ხელს უზნეობის, ბოროტების დანერგვას და საზოგადოების გახრწნის მცდელობას“.
საქართველოში ძალიან ბევრ ადამიანს სურს, გახდეს ე.წ. „ცნობადი სახე“ და ამისათვის მზად არიან, ყველაფერზე წავიდნენ. ზოგი შიშველ მკერდს აჩვენებს, ზოგი სიამაყით აცხადებს „ეროვნული ბოზი ვარო“, ზოგი რას სჩადის და ზოგი რას. ანუ მოკლედ რომ ვთქვა, სექსი და რაც შეიძლება მეტი სექსი. ასევე ძალიან საინტერესოა თანამედროვე ქართული ლიტერატურის „შედევრები“ – საკმარისია იღადაო ეკლესიაზე, პატრიარქზე და ცოტა სექსიც გაურიო, რომ „მწერლის“ ტიტული გარანტირებული გაქვს.
პრინციპში, მესმის იმ ე.წ. ტელეწამყვანების, რომლებიც თავიანთი გადაცემის რეიტინგზე ზრუნავენ. რატომაც არა? აბა, ვის აინტერესებს კარგი ვოკალური მონაცემებისა და ვიზუალის ახალგაზრდა მომღერალი. თუ ინგა გრიგოლიას, გიორგი ჯაჯანიძის ან ნანუკა ჟორჟოლიანის თვალით შევხედავთ გადაცემის თემის შერჩევას, დავინახავთ პრინციპს: დაე, გვლანძღონ, ოღონდ გვიყურონ.
ალბათ ამის ბრალია ისიც, რომ ამ ბოლო დროს „რუსთავი 2“ და „იმედი“ აშკარად „დაეჯახნენ“ ერთმანეთს მსგავსი ტიპის „შოუებში“ სტუმრების ერთფეროვნებით. რაც შეეხება ბეჭდურ ეპატაჟს, მოედანი აქაც არ ცარიელდება. რამდენიმე დღეა, გამოჩნდა ვინმე პუბლიცისტი ზურა ოდილავაძე, რომელსაც ძალიან სურს ცნობადი ადამიანების მარაქაში გარევა. ამისთვის მან ლეპტოპი მოიმარჯვა და გამოაცხო „ნაწარმოები“ სათაურით „ალენ დელონი ცხონდა! დედა ბოზი, მამა – მორფინისტი!“
ღმერთო შენ უშველე ყველა გაჭირვებულს!
***
საინტერესო იყო ბეჭდურ მედიაში გამოქვეყნებული მასალებიც, რომელთა მიმართულება მერიის ზედამხედველობის სამსახურის აპარატის უფროსის დაკავებამ განსაზღვრა.
„რა დანაშაულებზე ნასამართლევი პირები მუშაობენ მერიაში?“ – დასვა შეკითხვა გაზეთ „ალიას“ ჟურნალისტმა დიანა ლიპარტელიანმა და პასუხი მონიტორინგის ცენტრ „მედიატორის“ ხელმძღვანელ ლევან ხაბეიშვილისგან მიიღო: „გელა ჩივიაშვილი – სოციალური სამსახურის უფროსი. 2011 წელს ჯანდაცვის სამინისტროში მუშაობისას სოციალურად დაუცველთა თანხების გაფლანგვის გამო, ორგანიზებული დანაშაულის ჩადენისთვის გაასამართლეს. დანაშაული აღიარა და საპროცესო გარიგება გაუფორმეს.
კახა გავაშელი – საბურთალოს გამგეობის აპარატის უფროსი. ფინანსური დანაშაულისთვის ორჯერაა ნასამართლევი.
ვახტანგ ბექაური – ნაძალადევის მუნიციპალიტეტის თავმჯდომარე. საბურავების ქურდობაზეა ნასამართლევი. მისი მოადგილე სანაძის შესახებ კი სატელევიზიო სიუჟეტებიც მომზადდა.“ ხაბეიშვილის თქმით, არავინ უარყოფს, რომ სანაძე ნასამართლევია. „მედიატორის“ ხელმძღვანელი აქვე დასძენს, რომ მერიაში დასაქმებული ადამიანების 80% ან უვიცია, ან ნასამართლევი.
მერიის საზოგადოებასთან ურთიერთობის სამსახურის უფროსმა მაგდა პოპიაშვილმა გამოცემას სთხოვა ამ ადამიანების ნასამართლეობის ცნობის წარდგენა და სწორედ ამის შემდეგ გააკეთებინებდა ვინმეს კომენტარს.
ვერაფერს იტყვი. პრინციპში, ჩვენ რა უნდა ვთქვათ, აქ სხვები უნდა ლაპარაკობდნენ ან, უკეთესი იქნება, საქმეს აკეთებდნენ.
ძირითადი თემები ესენი იყო. რა თქმა უნდა, მედიის ყურადღების მიღმა არ დარჩენილა დაპირისპირება საპარლამენტო უმრავლესობაში, მოსალოდნელი დაჭერების ანონსები და ლარის კურსის ცეკვა-თამაში, მაგრამ ამ თემებზე სხვა დროს.
