დღეს მორიგი ამხანაგური მატჩი ჩაატარა ლანჩხუთის „გურიამ“. ამჯერზე წინა სპარინგებისგან განსხვავებით მეტოქე სერიოზული იყო ფოთის „კოლხეთის“ სახით. კოლხები ახლახან დაბრუნდნენ ანტალიიდან, სადაც საკმაოდ ნაყოფიერი შეკრება გამოუვიდათ. ჰოდა, ჯერ კიდევ არასრულფასოვნად მომზადებულ მეტოქეს ყველა კომპონენტში აჯობეს და 3-1 იმარჯვეს კიდეც.
„გურიაში“ რამდენიმე სიახლეა. უკრაინულ დუეტს კიდევ ერთი- 26 წლის მცველი ბელოვი შეემატა. მის გარდა პირველად ითამაშეს ზვიად სიხარულიამ და ალექსი ბენაშვილმა. პირველი უკვე გუნდის სრულფასოვანი წევრია, მეორეს კი მწვრთნელები ჯერ აკვირდებიან.
თავად შეხვედრა სტუმართა უპირატესობით აღინიშნა. განსაკუთრებით ფიზიკურად დაჯაბნეს მათ მეტოქე და ეს არც იყო გასაკვირი. ერთადერთი გოლი მოსიაშვილმა გაიტანა პენალტით და ეს მაშინ, როცა ანგარიში 0-3 იყო.
ლანჩხუთელთა მთავარმა მწვრთნელმა, თემურ ლორიამ თამაში ამ შემადგენლობით დაიწყო- თებიძე, ჭეიშვილი, ბელოვი, ცინცაძე, მჭედლიშვილი, ინგოროყვა, კოშკაძე. სიხარულია, შალამბერიძე, კონოვალოვი და შეველი.
შესვენების შემდეგ შემოვიდნენ: ბენაშვილი, ისიანი, გაბრიჩიძე, კილაძე, მოსიაშვილი, ღაღანიძე და მათიაშვილი.
