ქალაქ ოზურგეთის მუნიციპალიტეტის ცენტრალური სტადიონის ყოფილი დირექტორი საქართველოს სახალხო დამცველს, უჩა ნანუაშვილს მიმართავს.
განცხადებაში სტადიონის ყოფილი დირექტორი, მურთაზ აბაშიძე, "გურია ნიუსში" გამოქვეყნებულ სტატიებზე ამახვილებს ყურადღებას.
"მოგახსენებთ, რომ ვმუშაობდი ოზურგეთის მუნიციპალიტეტის მიერ დაფუძ¬ნებულ ა(ა)იპ ქალაქ ოზურგეთის მუნიციპალიტეტის ცენტრალური სტადიონის (ს/კ 237113039) დირექტორად.
სამსახურიდან განთავისუფლების შესახებ ინფორმაცია მივიღე პრესის საშუალებით 25.08.2014 წელს. საკითხის გადამოწმების მიზნით მივმართე ოზურგეთის მერიას, სდაც დავადგინე, რომ მე თანამდებობიდან განთავისუფლებული ვიყავი ოზურგეთის მერის 18.08.2014 წლის #84 ბრძანებით. 18 აგვისტოდან 25 აგვისტოს ჩათვლით ისე ვასრულებდი სტადიონის დირექტორის უფლებამოსილება, რომ ჩემი განთავისუფლების შესახებ არც კი ვიცოდი, აქვე გაითვალისიწინეთ, რომ განთავისუფლების შესახებ ბრძანება გადმომეცა მხლოდ ჩემი მოთხოვნის შემდეგ.
ჩემი განთავისუფლების შესახებ ბრძანებაში აღნიშნულია, რომ იგი გამოცემულია თოჯინებისა და მოზარდ მაყურებელთა თეატრის წესდების საფუძველზე, მაგრამ მასში საერთოდ არაა მითითებული რა საფუძვლით მოხდა ჩემი განთავისუფლება.
ზემოხსენებული ბრძანება ჩემს მიერ გასაჩივრებული იქნა ოზურგეთის სასამართლოში, რომლის 30.10.2014 წლის გადაწყვეტილებით ჩემი მოთხოვნა სამსახურში აღდგენისა და სახელფასო განაცდურის დაკისრების თაობაზე დააკმაყოფილა.
08.12.2014 წელს დამირეკეს ოზურგეთის მერიის კადრების განყოფილებიდან და მთხოვა მერიაში მისვლა. მერიაში მისვლის შემდეგ მერიის თანამშრომელმა (მზია გაგუა) გადმომცა ოზურგეთის მერის 01.12.2014 წლის #301 ბრძანება რომლის მიხედვითაც მე აღდგენილი ვიყავი სამსახურში. ამ ბრძანების გაცნობის შემდეგ კი გადმომცა იგივე ოზურგეთის მერის 02.12.2014 წლის #306 ბრძანება რომლის მიხედვითაც მე განთავისუფლებული ვიყავი სამსახურიდან.
ზემოხსენებულთან დაკავშირებით მოგახსენებთ, რომ საარჩევნო კამპანიის მიმდინარეობისას ოზურგეთის მაშინ ჯერ კიდევ მერობის კანდიდატმა ბეგლარ სიორიძემ, როგორც მუნიციპალიტეტის მიერ დაფუძნებული ა(ა)იპ-ის ხელმძღვანელს მომთხოვა საარჩევნო კამპანიაში აქტიური ჩართვა და მისი საარჩევნო შტაბის მითითებების შესრულება, რაც ძირთადად გამოიხატებოდა თანამშრომლებისა და მათი ოჯახის წევრებისათვის, ახლონათესავებისათვის სიორიძისათვის ხმის მიცემის დავალდებულებაში.
ვარ ომის ვეტერანი ვმონაწილებდი საქართველოს ტერიტორიული მთლიანობისათვის ბრძოლებში, ასევე ვარ ვეტერანი ფეხბურთელი. შესაბამისად აქტიურად ვმონაწილეობ როგორც ომის ისე ფეხბურთის ვეტერანთა საზოგადოებრივ აქტივობებში, სიორიძის ინტერესს ასევე წარმოადგენდა ხსენებულ საზოგადოებრივ გაერთიანებში გაწევრიანებული ამომრჩევლების და მათი ოჯახების ხმებიც, შესაბამისად მომთხოვეს ჩემი მხრიდან მათთან შეხვედრების ორგანიზება და მათთვის აგიტაციის გაწევა. ყველაფერ ამაზე უარი განვუცხადე, რადგანაც მიმაჩნდა, რომ ეს იქნებოდა კანონდარღევა, ამასთანავე ჩემთვის, როგორც მოქალაქისათვის და ამომრჩევლისათვის არ იყო მისაღები მისი მერად არჩევა.
ოზურგეთის მერი თავისი უფლებამოსილების განხორციელებას შეუდგა 2014 წლის აგვისტოში, მის მიერ ჩემი განთავისუფლების ბრძანება გამოიცა რამდენიმე დღეში 18.08.2014 წელს.
განთავისუფლებამდე ჩემთვის ცნობილი გახდა, რომ ბეგლარ სიორიძე ეძებდა ყველანაირ სახის ინფორმაციას რაც შეიძლება გამხდარიყო ჩემი განთავისუფლების საფუძველი.
სიორიძის მიერ ჩემი განთავისუფლების შემდეგ პრესის საშუალებით გაკეთდა რამდენიმე განცხადება (შიდაუდიტის დასკვნის გაკეთებამდე) სადაც იგი ყოველგვარი დასაბუთების გარეშე ბრალს მდებდა სხვადასხვა სახის დარღვევებში, რომელიც შემდგომში აღმოაჩინა მისივე დაქვემდებარებაში არსებულმა მერიის შიდაუდიტის სამსახურმა.
მაგალითად გაზეთ "გურია ნიუსის" ვებგვერდზე 26.08.2014 წელს გამოქვეყნდა ჟურნალისტ ჟანა მეგრელიშვილის წერილი, რომელშიც მოყვანილია ოზურგეთის მერის ბეგლარ სიორიძის შემდეგი განცხადება:
"მურთაზ აბაშიძეს სახლში შტაბის გახსნას ერჩივნა სტადიონისთვის მიეხედა, გაპარტახებული და გაუბედურებულია იქაურობა. მაგის საქმი¬ანობას თავიდან ბოლომდე შევისწავლით.
"ქართული ოცნება" და "ნაციონალები" არაფერ შუაში არაა სტადიონთან, მურთაზ აბაშიძეს უნდა მიეხედა სტადიონისთვის, მაგ თემას ჩვენ აუცილებლად დავუბრუნდებით და შევისწავლით ძირფესვიანად, თუ რა ხდებოდა სტადიონზე მისი საქმიანობის დროს. 100 პროცენტი ა.იპ. დამფუძნებელი გახლავთ ქალაქის მუნიციპალიტეტის მერია, აქედან გამომდინარე მე ჩავთვალე, რომ მურთაზ აბაშიძე ვერ ართმევდა თავს, დაკისრებულ მოვალეობას და იმ საქმიანობას, ამიტომ გადავწყვიტე მისი განთავისუფლება. მე მაქვს ყველანაირი პირობა იმისი, რომ ჩემი შეხედულებებისამებრ შევცვალო და დავნიშნო ნებისმიერი ა.ი.პ ხელმძღვანელი, ამაში გაუგებარი არაფერი არ არის. რა ვერ გაიგო ბატონმა მურთაზმა არ ვიცი" (ციტატის დასასრული).
სასამართლოში დავის მიმდინარეობისას ა(ა)იპ ოზურგეთის მუნიციპალური სტადიონის თანამშრომლებთან შეხვედრაში ოზურგეთის მერმა განაცხადა, რომ მურთაზ აბაშიძე ვერასდროს ვერ დაბრუნდებოდა სტადიონზე და ვერცერთ თანამდებობას მისთვის მიუღებელი პირები ვერ დაიკავებდნენ.
ფაქტია, რომ მოცემულ შემთხვევაში მერი იმუქრება თავისი ძალაუფლების გამოყენებით აღნიშნავს რა, რომ ის აპირებს შემდგომში ანუ განთავისუფლების შემდეგ შეესწავლოს ჩემი – მურთაზ აბაშიძის საქმიანობა. მაგრამ აქვე აღნიშნავს, რომ სტადიონი გაპარტახებული იყო და, რომ აბაშიძე საფუძვლიანად გაანთავისუფლა.
ზემოხსენებულიდან გამომდინარე აშკარაა რომ მე განვიცდი დევნასა და დისკრიმინაციას საჯარო ხელისუფლების პოლიტიკური თანამდებობის პირისაგან ჩემი პოლიტიკური და საარჩევნო მრწამსის გამო, შესაბამისად გთხოვთ დამეხმაროთ ჩემი შელახული უფლებების აღდგენაში თქვენი კომპეტენციის ფარგლებში", – აღნიშნავს აბაშიძე.
შეგახსენებთ, რომ სტადიონის ყოფილ დირექტორსა და ქალაქ ოზურგეთის მერიას შორის სასამართლო დავა უკვე რამდენიმე თვეა მიმდინარეობს. ხვალ, 18 თებერვალს, 2 საათზე ოზურგეთის რაიონული სასამართლო ბოლო გადაწყვეტილებას მიიღებს.
