„ფუდმარტში“ გაყიდული ვადიანი გაფუჭებული პროდუქტი – ვის ეკისრება პასუხისმგებლობა?

მაღაზიათა ქსელ "ფუდმარტში" შეძენილი შებოლილი თევზი, ვადიანობის მიუხედავად, გაფუჭებული აღმოჩნდა.

"მარშეს" ფირმის პროდუქციაზე, ვადად მიმდინარე წლის 22 თებერვალია მითითებული. სწორედ ამ ფაქტის გამო, მაღაზია "ფუდმარტი (სადაც პროდუქტი გაიყიდა) პასუხისმგებლობას იცილებს და ამბობს, რომ ამ შემთხვევაში შემომტანი კომპანიის, "მარშეს" ბრალეულობა იკვეთება.

ვაჟა-ფშაველას გამზირზე #67-ში მდებარე  "ფუდმარტის" მაღაზიის მენეჯერი, "გურია ნიუსთან" ამბობს, რომ თუ პროდუქციას შენახვის ვადა გასული არ აქვს, მას პასუხისმგებლობა არ ეკისრება.

"ჩვენი მოვალეობაა შევინახოთ სათანადო პირობებში და შევამოწმოთ ვადა. ვინაიდან პროდუქცია შეფუთულია, სათითაოდ ვერ გავხსნით და დავიწყებთ შემოწმებას. მთავარია პროდუქტი დასაშვებზე რბილი არ იყოს.

პროდუქციას ვინახავთ მაცივარში, სადაც ტემპერატურა დასაშვებზე, 12 გრადუსზე ნაკლები, 5 გრადუსია. ანუ, პროდუქტი უფრო არ უნდა გაფუჭებულიყო.

ვინაიდან, პროდუქტის შემომტანი "მარშეა", პასუხისმგებელიც ისაა", _ ამბობს მაღაზიის მენეჯერი.

"გურია ნიუსი" "გუდვილის" შვილობილი კომპანია "მარშეს" ხარისხის მართვის სამსახურის უფროსს ესაუბრა, სადაც განმარტავენ, რომ მათი პროდუქცია ბაზარზე გასვლამდე შემოწმებას გადის და პასუხისმგებლობას სავაჭრო ობიექტს აკისრებენ.

"მსგავსი რამ გამორიცხულია. არ შემიძლია ახლა კონრკეტულ მიზეზზე ვისაუბრო, მაგრამ თუ სავაჭრო ცენტრში პროდუქცია ფუჭდება, ეს შენახვის პირობების, ტემპერატურის ბრალია.

არ მინდა კონკრეტულად ქსელი რაიმეში დავადანაშაულო, თუმცა გამორიცხული არაფერია", _ განმარტავენ "მარშეს" ხარისხის მართვის სამსახურში და დასძენენ, რომ თუ მაღაზია "ფუდმარტს" შენახული აქვს გაფუჭებული პროდუქცია და მათ გადასცემენ, რასაც მაღაზიის კონკრეტული ფილიალის მენეჯერი ჩვენთან საუბარში ხაზს უსვამს, ისინი პროდუქტის გაფუჭების რეალურ მიზეზს დაადგენენ.

აღსანიშნავია, რომ კომპანიის აღნიშნული პროდუქციის ეტიკეტზე შენახვისთვის საჭირო ტემპერატურად 5 გრადუსია მითითებული.

ვისი პასუხისმგებლობა იკვეთება მოცემულ ამბავში, მაღაზია "ფუდმარტის" თუ კომპანია "მარშესი" კონკრეტული ღონისძიებების გატარებისგან სურსათის ეროვნული სააგენტო თავს იკავებს.