FactCheck.ge პოლიტიკოსების განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. 23 თებერვლიდან 3 მარტამდე ფაქტ-მეტრმა სხვადასხვა გადამოწმებულ ფაქტზე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, საპარლამენტო უმცირესობის წევრის, პავლე კუბლაშვილის განცხადებას ეხებოდა. კუბლაშვილის თქმით, “შარშან, ტყიბულის რაიონში ჩასული იყო კახა კალაძე და თქვა, რომ 17 კორპუსს უკვე აქვს გაზი, თუმცა იქ გაზი არცერთს არ აქვს”.
ფაქტ-მეტრის მიერ, ენერგეტიკის სამინისტროდან მოპოვებული ინფორმაციის თანახმად, 2014 წლის ბოლოსთვის ტყიბულში 350 აბონენტი იყო გაზიფიცირებული, აქედან 200 აბონენტის გაზიფიცირება 2012 წელს მოხდა, 150 აბონენტი კი 2013-2014 წლებში დაემატა.
ენერგეტიკის მინისტრი, კახა კალაძე ტყიბულში ორჯერ იმყოფებოდა (2014 წლის 4 ივნისს და 8 ივლისს). ორივე ვიზიტის დროს მან ქალაქის გაზიფიცირებაზე ისაუბრა. პირველი ვიზიტისას, ენერგეტიკის მინისტრმა განაცხადა, რომ 7 საცხოვრებელი კორპუსი (და არა 17, როგორც პავლე კუბლაშვილი აცხადებს) უკვე გაზიფიცირებული იყო. ისინი გაზს რამდენიმე დღეში მიიღებდნენ, ხოლო მთლიანად ქალაქის გაზიფიცირება 2014 წელს უნდა დასრულებულიყო. თუმცა, მეორე ვიზიტის დროს (დაახლოებით ერთ თვეში), კახა კალაძემ ადგილობრივებს ტყიბულის გაზიფიცირების პროექტის მეორე ეტაპის დეტალები გააცნო და აღნიშნა, რომ ქალაქის სრულ გაზიფიცირებას 360 დღე დასჭირდებოდა და ის 2015 (და არა 2014) წელს დასრულდებოდა.
ჩვენი კვლევის შედეგად აღმოჩნდა, რომ ტყიბულში მოსახლეობას ბუნებრივი აირი არც ადრე ჰქონდა და არც დღეს აქვს (გარდა გამონაკლისი 3 ოჯახისა). 2013-2014 წლებში ახალი აბონენტები არ დამატებულან.
ენერგეტიკის მინისტრი 2014 წლის ზაფხულში ტყიბულში სტუმრობისას აცხადებდა, რომ 7 საცხოვრებელი კორპუსი გაზიფიცირებული იყო და ბუნებრივი აირი 2-3 დღეში ჩაირთვებოდა, თუმცა, ბუნებრივი აირი იმ აბონენტებსაც კი არ მიეწოდებათ, სადაც გაზიფიცირების სამუშაოები უკვე დასრულებულია.
ფაქტ-მეტრი რამდენიმე დღეში კვლავ გადაამოწმებს ტყიბულში მითითებული ობიექტების ქსელთან მიერთებას და მკითხველს შესაბამის ინფორმაციას მიაწვდის.
ამ ეტაპზე კი, ფაქტ-მეტრმა დაასკვნა, რომ პავლე კუბლაშვილის განცხადება მეტწილად სიმართლეა.
გასულ კვირას ფაქტ-მეტრმა საპარლამენტო უმცირესობის კიდევ ერთი წევრის, მიხეილ მაჭავარიანის განცხადებაც გადაამოწმა. მაჭავარიანის თქმით, საქართველოს 530 ათას მოქალაქეს აქვს დოლარის კრედიტი ბანკში და ლარის კურსის დევალვაცია მათთვის დიდი პრობლემაა.
2014 წლის პირველი დეკემბრის მდგომარეობით საქართველოს რეზიდენტების დავალიანება უცხოურ ვალუტაში 7 047 მლნ ლარი იყო, საიდანაც 2 459 მლნ ლარი (42%) ფიზიკურ პირებზე გაცემულ სესხებს წარმოადგენდა. 2014 წელს უცხოურ ვალუტაში 447 806 ახალი საკრედიტო ხელშეკრულება გაფორმდა.
ეროვნული ბანკს მხოლოდ წლის განმავლობაში ახლადგაცემულ საკრედიტო ხელშეკრულებების რაოდენობაზე აქვს ინფორმაცია. ამ ხელშეკრულებების ნაწილი მოკლევადიანია და წლის განმავლობაში იფარება, ნაწილი კი გრძელვადიანია და სესხის დაფარვის პერიოდი ერთ წელს აჭარბებს.
შესაბამისად, იმის ზუსტად გარკვევა, თუ რამდენ მოქალაქეს ჰქონდა 2014 წლის დეკემბრის მდგომარეობით დოლარში დავალიანება, შეუძლებელია. თუმცა, ფაქტ-მეტრის მიახლოებითი შეფასების მიხედვით, 2014 წლის პირველი დეკემბრისთვის, საქართველოს რეზიდენტებზე გაცემული სასესხო ხელშეკრულებების რაოდენობა 500 000-ს ნამდვილად აჭარბებდა. შესაბამისად, დეპუტატის პათოსი, რომ ლარის გაუფასურებამ მოსახლეობის ძალიან დიდ ნაწილს სესხი გაუძვირა და მდგომარეობა გაურთულა, სიმართლეა.
ფაქტ-მეტრის მიერ გადამოწმებული კიდევ ერთი ფაქტი შს მინისტრის მოადგილის, ლევან იზორიას განცხადებას ეხებოდა. იზორიას თქმით, ოჯახში ძალადობის წინააღმდეგ სამართლებრივი ღონისძიებების აღსრულების კუთხით მნიშვნელოვანი პროგრესი გვაქვს.
ოჯახში ძალადობა განსაკუთრებით აქტუალური 2014 წელს იყო. მსგავსი ფაქტები მნიშვნელოვნად გაიზარდა, მათ შორის ოჯახური ძალადობის ნიადაგზე მკვლელობის და ჯანმრთელობის დაზიანების შემთხვევებიც. გასულ წელს, ოჯახური ძალადობის 591 ფაქტი დაფიქსირდა, აქედან 28 ჯანმრთელობის დაზიანების და 19 მკვლელობის შემთხვევა იყო.
უნდა აღინიშნოს, რომ 2013 წელს სამართლებრივი დევნა ოჯახური ძალადობის შემთხვევების 40%-ზე, ხოლო 2014 წელს 73%-ზე დაიწყო. ასევე, მნიშვნელოვნად გაიზარდა შემაკავებელი ორდერების რაოდენობაც, რაც გარკვეულწილად ოჯახური ძალადობის წინააღმდეგ სამართალდამცავების გააქტიურებაზე მიუთითებს.
2014 წელს ოჯახში ძალადობის საკითხებზე სამართალდამცავთა გადამზადება მოხდა. გადამზადებულ პოლიციელებს ოჯახში ძალადობის შემთხვევების ზედამხედველობა, სათანადო სტატისტიკური მონაცემების დამუშავება, კონფლიქტური ოჯახების პერიოდული კონტროლი და საერთო ანალიზი ევალებათ. მათი მუშაობის კოორდინაციას “ოჯახში ძალადობის პრევენციის და მასზე ეფექტური რეაგირების კომისია” ახორციელებს, რომელიც 2014 წლის სექტემბერში შეიქმნა.
სახალხო დამცველის ოფისში აცხადებენ, 2014 წლიდან შსს-მ გააძლიერა მუშაობა ოჯახში ძალადობის წინააღმდეგ. თუმცა, არის საკითხები, რომლებიც კვლავ პრობლემური რჩება. სახალხო დამცველის ოფისმა შეისწავლა კონკრეტული შემთხვევები, როცა ოჯახური ძალადობის მაღალი რისკის მიუხედავად, საქართველოს შინაგან საქმეთა ორგანოების წარმომადგენლები ხელწერილით ან გაფრთხილებით შემოიფარგლნენ.
შესაბამისად, ლევან იზორიას განცხადება მეტწილად სიმართლეა.
გასულ კვირას ფაქტ-მეტრი საქართველოდან ექსპორტის თემასაც შეეხო და დეპუტატ ზურაბ მელიქიშვილის განცხადების სიზუსტე გადაამოწმა. მელიქიშვილი აღნიშნავდა, რომ “იანვარში დაფიქსირდა ექსპორტის 30%-იანი კლება. ექსპორტში ვარდნის ტენდენცია გასული წლის აგვისტოდან დაიწყო”.
2015 წლის იანვარში ექსპორტის მოცულობა გასული წლის ანალოგიურ თვესთან შედარებით 30%-ით შემცირდა. ექსპორტის კლების ტენდენცია 2014 წლის აგვისტოდან შეინიშნება. ექსპორტის მოცულობა აგვისტოში 13%-ით, სექტემბერში 7%-ით, ოქტომბერში 5%-ით, ნოემბერში 35%-ით და დეკემბერში 20%-ით შემცირდა. ჯამში 2014 წელს ექსპორტის მოცულობა 2%-ით შემცირდა.
შესაბამისად, საპარლამენტო უმცირესობის დეპუტატის ეს განცხადება სიმართლეა.
