გასულ პარასკევს "G-NewsTV"-ის გადაცემაში ერთ-ერთი განხილვის თემა საფეხბურთო კლუბ ლანჩხუთის "გურიის" ირგვლივ განვითარებული მოვლენები იყო. კერძოდ, კლუბის ყოფილი პრეზიდენტის დას, მარინა თოთლაძესა და კლუბის ყოფილ სპორტულ დირექტორს, თემურ ალექსაიას შორის, რომელიც ახლა საკრებულოს წევრია, დებატები უნდა შემდგარიყო.
თუმცა, ალექსაიას გადაცემაში მონაწილეობა არ მიუღია. თოთლაძემ მუნიციპალიტეტის პირველ პირს ზაზა ურუშაძესა და საკრებულოს დეპუტატს, თემურ ალექსაიას გადაცემაში საკმაოდ ბევრს ბრალდებები წაუყენა და ამ უკანასკნელის მისამართით პირდაპირ განაცხადა, რომ იგი სისხლის სამართლის დამნაშავეა.
მართალია თემურ ალექსაია პირდაპირ დებატებში არ შევიდა მარინა თოთლაძესთან, თუმცა ოპონენტის მხრიდან მის მიმართ გამოთქმულ ბრალდებებს სოციალური ქსელის მეშვეობით გამოეხმაურა და ცილისწამებაშიც დაადანაშაულა. ამასთან, განმარტებაც გააკეთა, თუ რატომ არ მიიღო გადაცემაში მონაწილეობა და რატომ იყო მასთან სატელეფონო კავშირის დამყარება შეუძლებელი.
"იმ დღეს მე საპროექტო განყოფილების წარმომადგენელთან და გამგებლის რწმუნებულთან ერთად დავდიოდით სოფლის პროექტებზე, რაც უფრო საჭიროდ ჩავთვალე, ვიდრე მაგ გაუგებარი წარმომავლობის ქალთან საუბარი და მისთვის პასუხების გაცემა. რაც შეეხება ტელეფონის გამორთვას, სპეციალურად არ გამითიშია.
რაც შეეხება ჩემს ნასამართლეობას, ამაზე მთელმა რაიონმა და პარლამენტის წევრებმა იციან რისთვის ვიყავი ნასამართლევი. მე საკრებულოშიც და გამგეობაშიც მიტანილი მაქვს შესაბამისი დოკუმენტი და უახლოეს დროში ჩემი რეაბილიტაციაც განხორციელდება.
ახლა რაც შეეხება ქალბატონი მარინას წამოყენებულ ბრალდებებს: საზოგადოება ალბათ უფრო ადრე ელოდა პასუხს იმ სერიოზულ ბრალდებებზე, რაც მარინა თორთლაძემ?! წამომიყენა მიმდინარე წლის 27 თებერვლის სესიაზე. მაგრამ როგორც იმავე სესიაზე ავღნიშნე, მას მხოლოდ სასამართლოში დაველაპარაკებოდი, მაგრამ მისი უნამუსო ცილისწამება უკვე ყველა ზღვარს გადაცდა და იძულებული გავხდი პასუხი გავცე მის დემაგოგიას და ცილისწამებას.
კერძოდ ჩემთან მიმართებაში, ქ-ნ მარინას პრეტენზია აქვს კაფე-ბარ "ნიკალა"-ში ჩარიცხულ თანხასთან დაკავშირებით, რომლის მიმართაც ს/კ "ლანჩხუთის გურია"-ს ერიცხებოდა დავალიანება.
ახლა რაც შეეხება კაფე-ბარ "ნიკალა"-ს დავალიანებას, მე ხელთ მაქვს მეპატრონის ამონაწერი კაფე-ბარ "ნიკალა"-დან სადაც საფეხბურთო კლუბ "ლანჩხუთის გურია"-ს დავალიანება შეადგენდა 5647 (ხუთიათასექვსასორმოცდაშვიდი) ლარს. ამ თანხის გასტუმრება მოხდა ნაწილობრივ ნაღდი ანგარიშსწორებით (ხელზე თანხის მიცემით) და ნაწილობრივ გადარიცხვით; სწორედ იმ გადარიცხვაზეა საუბარი რომელზეც ქ-ნი მარინა ამახვილებს ყურადღებას და ამბობს, თითქოს ეს ჩემი შვილის ქორწილის ვალად დარჩენილი ფული იყო, რომელიც სრული სიცრუეა და შეურაცხმყოფელია ჩემთვის და ჩემი ოჯახისთვის. და თუ ხელშეკრულება არ არის გაფორმებული კაფე-ბარ "ნიკალა"-სა და ს/კ "ლანჩხუთის გურია"-ს შორის ეს კლუბის დირექტორის და იურისტის პასუხისმგებლობაა და არა ჩემი.
რაც შეეხება 2 აპრილს გადარიცხულ თანხებს მაგ დღეს გადარიცხულია სხვადასხვა დავალიანებები გარკვეული თანხების, რომლის დაანგარიშებაც მოხდა მარტის შუა რიცხვებში და არა იმ ტრაგიკულ მათი ოჯახისათვის დღეებში, როგორც ქ-ნი თორთლაძე?! აღნიშნავს. სხვათაშორის ეს თანხა საქართველოს ფეხბურთის ფედერაციამ გამოუყო კლუბებს ვალების გასასტუმრებლად.
აქვე მინდა შეგახსენოთ ქ-ნო თორთლაძე?! რადგან გავიწყდებათ მთავარი, თქვენ კლუბის ხელმძღვანელობა გაუშვით კლუბიდან იმ მოტივით რომ იღებდით სრულ პასუხისმგებლობას კლუბის დაფინანსებაზე და ასევე ამბობდით, რომ მოიყვანდით სპონსორს, რომელიც მიუხედავად არაერთი ტყუილი დაპირებისა ისე ჩამთავრდა 2013-2014 წლების სეზონი თვალად არავის უნახავს.
ზემოთ აღნიშნულიდან გამომდინარე იქმნება საფუძვლიანი ეჭვი, რომ ქ-ნ თორთლაძეს?! სხვა მიზნები ამოძრავებდა. მისი მთავარი მიზანი იყო გრიგოლეთის ბაზა კლუბის ბალანსზე მოეხვედრებინა, ჩაედო ბანკში და აღებული თანხა გამოეყენებინა საკუთარი მიზნებისათვის რათა წამოეწყო ბიზნესი რაც არაერთხელ დაადასტურა სატელევიზიო გამოსვლაში.
და ბოლოს,, როცა მან დაინახა, რომ ამ საქმიდან არაფერი გამოვიდოდა, რადგან მაშინდელი ხელმძღვანელობა ვერ დაითანხმა ზემოთ აღნიშნულზე, გადაერთო ბარნაბ (ბორისი) ჭყონიას საარჩევნო კომპანიაში. სადაც ბარნაბ ჭყონიას საარჩევნო შტაბის მთავარი დამფინანსებელი გახდა. (როგორც ჩემთვის გახდა ცნობილი შტაბში საარჩევნო კომპანიისთვის გაწეულ ხარჯებსაც ითხოვს უკან, თუმცა აქაც არ გააჩნია გაწეული ხარჯების დამადასტურებელი არანაირი დოკუმენტაცია).
ზემოთ აღნიშნულიდან გამომდინარე იქმნება შთაბეჭდილება თაღლითობას ხომ არ აქვს ადგილი, რადგან იყავით დაინტერესებული პირი, თქვენივე სურვილით გახდით ზემოთხსენებული შტაბის "სპონსორი" და წაგების შემდეგ დახარჯულ თანხას ითხოვთ უკან. რაც შეეხება ჩემს თაღლითობას მთელი რაიონი მიცნობს მე და იცნობს ჩემს ოჯახს, (ისევე როგორც თქვენ და თქვენს ოჯახს) რაც დაადასტურა 2000-ზე მეტმა ამომრჩეველმა, რომელთა მეშვეობითაც გავხდი საკრებულოს წევრი რაც დღემდე ვერ მოგინელებიათ. ამაზე დაბოღმილმა და გაბოროტებულმა განტევების ვაცს დაუწყეთ ძებნა და რატომღაც მე შემარჩიეთ, მაგრამ მე სრული პასუხისმგებლობით ვაცხადებ, რომ ამ საპასუხო წერილით თქვენთან ყოველგვარ საუბარს ვამთავრებ. საზოგადოებას ვაცნობებ, რომ მე არ გავურბივარ პასუხისმგებლობას და მივმართავ ქ-ნ თორთლაძეს?! როგორც "ცნობილ ადვოკატს" მიმართოს სასამრთლოს და სასამართლო გაარკვევს ვინ ვინ არის", – აცხადებს თემურ ალექსაია.
