კოოპერატივების გაძლიერებისა და მდგრადობის ხელშეწყობისთვის, ასევე, შიდა საწარმოო ურთიერთობების მოწესრიგების მიზნით, "სასოფლო-სამეურნეო კოოპერატივის შესახებ" საქართველოს კანონში ცვლილებები შედის.
როგორც კანონპროექტის ავტორები განმარტავენ, ცვლილებების მიზანი კოოპერატივის შიდა საწარმოო ურთიერთობების მოწესრიგებით, სასოფლო-სამეურნეო კოოპერატივის გამართული მოდელის შექმნაა, რომელიც მიმართული იქნება წევრთა შრომითი რესურსების კაპიტალიზაციის გააქტიურებაზე.
როგორც "გურია ნიუსთან" საუბრისას სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტოს ხელმძღვანელი გიორგი მიშელაძე განმარტავს, კანონში განხორციელებული ცვლილებებით კოოპერატივებს განვითარების მეტი შესაძლებლობა და უცხოური ინვესტიციების მოზიდვა შეუძლიათ.
"პირველ რიგში კანონში ცვლილების შედეგად ახალი ცნება ჩნდება კოოპერატივში და შემოდის ასოცირებული წევრის ინსტიტუტი.
დღემდე წევრში მხოლოდ მეპაიე მოიაზრებოდა. (მეპაიე შეიძლება იყოს ფიზიკური პირი 18 წლის ასაკიდან, საქართველოს მოქალაქე, რომელიც ჩართულია სასოფლო-სამეურნეო საქმიანობაში) ამ ცვლილებით კი, კოოპერატივში შეიძლება იყოს ასოცირებული წევრიც, რომელიც მეპაიე არ არის, მაგრამ ფაქტიურად არის ინვესტორი კოოპერატივში.
ასოცირებული წევრი შეიძლება იყოს პირი, მათ შორის უცხო ქვეყნის მოქალაქე ან/და უცხოეთში რეგისტრირებული სამეწარმეო იურიდიული პირი, რომელსაც ამ კანონისა და სასოფლო–სამეურნეო კოოპერატივის საერთო კრების გადაწყვეტილების საფუძველზე, საპაიო ფონდში განხორციელებული აქვს შენატანი.
ამასთან, ასოცირებული წევრი სარგებლობს სათათბირო ხმის უფლებით, რაც გულისხმობს სასოფლო–სამეურნეო კოოპერატივის მმართველი ორგანოების სხდომებზე მხოლოდ დასწრებისა და საკუთარი მოსაზრების გამოთქმისუფლებას.
სასოფლო–სამეურნეო კოოპერატივის წესდებით გათვალისწინებულ შემთხვევებში ასოცირებული წევრი შეიძლება ასევე იყოს ამ კოოპერატივის მმართველობასა და წარმომადგენლობაზე უფლებამოსილი პირი.
მეპაიე მხოლოდ საქართველოს მოქალაქე შეიძლება იყოს, ასევე სასოფლო-სამეურნეო კოოპერატივს. ხოლო ასოცირებული წევრი ნებისმიერი პირი შეიძლება იყოს.
ეს უკვე კოოპერატივს მისცემს შესაძლებლობას მოიზიდოს ინვესტიციები და მხარდამჭერები უცხოეთიდან და უფრო მძლავრ კოოპერატივად ჩამოყალიბდნენ", _ აღნიშნავს მიშელაძე.
მისივე თქმით, 29013 წელს მიღებულ კანონში ცვლილებები კოოპერატივის ქუდის ქვეშ ოჯახური ფერმერული მეურნეობების ჩამოყალიბებამ გამოიწვია.
"ეს კანონი 2013 წლის 18 ივლისს მივიღეთ, უკვე თავისი გასაკეთებელი წარმატებით გააკეთა, ადამიანებმა გაიგეს რას ნიშნავს კოოპერატივი, აგრარულ სექტორში კოოპერატივების მხარდაჭერა, კოოპერაციის პროცესი. კანონი იმდენად ლიბერალური იყო, რომ მიეცათ შესაძლებლობა, საკმაოდ ბევრი ადამიანი ჩართულიყო მასში.
დღეის მდგომარეობით 706 სასოფლო-სამეურნეო კოოპერატივია შექმნილი, 4758 მეპაიე გვყავს. მათ შორის, 1000-ზე მეტი ქალია. 200-ზე მეტი კოოპერატივია მაღალმთიან რეგიონებში რეგისტრირებული.
სტატისტიკაც მეტყველებს, რომ კანონი, რომელიც 2013 წელს მივიღეთ საკმაოდ კარგად მუშაობს, მაგრამ მცირედი დახვეწა მაინც საჭიროა; თუნდაც იმიტომ, რომ დღეს, სამწუხაროდ, ამ რაოდენობის კოოპერატივებში ბევრია ისეთი კოოპერატივი, სადაც ოჯახური ფერმერული მეურნეობებია ჩამოყალიბებული კოოპერატივის ქუდის ქვეშ. არის ისეთი კოოპერატივები, სადაც ცოლ-ქმარი, შვილი, რძალი , სიძე და ა.შ. არის გაერთიანებული და კოოპერატივი ჰქვია. დღეს კოოპერატივის წევრთა რაოდენობა მაღალმთიან რეგიონებში 3-ით, ხოლო დანარჩენ საქართველოში 5 წევრით განისაზღვრება. ეს ბიძგს აძლევს ფერმერული მეურნეობების პრინციპებზე ჩამოყალიბებული კოოპერატივების შექმნას კი არა, არამედ, საოჯახო მეურნეობების ჩამოყალიბებას. ამიტომ, რეალურ კოოპერაციასთან დასაახლოვებლად კანონში ცვლილებები გახდა საჭირო, რაც დახვეწს პრინციპს და კოოპარატივის განვითარების მეტ შესაძლებლობას მისცემს ხალხს", _ აღნიშნავს მიშელაძე.
კანონპროექტი, რომლის ინიციატორი საქართველოს მთავრობა, ხოლო ავტორი სოფლის მეურნეობის სამინისტორა, პარლამენტს საგაზაფხულო სესიის დასრულებამდე წარედგინება.
ამავე თემაზე:
კოოპერატივების ეფექტური მუშაობისთვის კანონში ცვლილებები იგეგმება
