ღია მმართველობის პარტნიორობის (OGP) მმართველი კომიტეტის შეხვედრაზე იუსტიციის მინისტრი თეა წულუკიანი სიტყვით გამოვიდა. 2015 წლის 23 აპრილს მინისტრი სიტყვით წარსდგა მმართველი კომიტეტის წინაშე და ისაუბრა ადგილობრივი თვითმმართველობების შესაძლებლობების გაძლიერების მიზნით საქართველოს ხელისუფლების მიერ გადადგმულ ნაბიჯებზე. მინისტრმა მმართველი კომიტეტის წევრებს გააცნო ღია მმართველობა საქართველოს 2014-2015 წლების სამოქმედო გეგმით ნაკისრი ვალდებულებები, რომლებიც ადგილობრივ დონეზე საზოგადოებრივი ცენტრების განვითარებასა და ელექტრონული მმართველობების დანერგვას ეხება.
შეხვედრა 21-23 აპრილს მეხიკოში გაიმართა. საქართველო 2014 წლიდან მმართველი კომიტეტის წევრია და მას საქართველოს იუსტიციის მინისტრი წარმოადგენს.
საქართველოს იუსტიციის სამინისტროს ინფორმაციით, კომიტეტის სხდომაზე დადასტურდა, რომ OGP-ის რეგიონული კონფერენცია საქართველოში 2015 წლის 3-4 ივნისს გაიმართება. თბილისის კონფერენცია პარტნიორობის წევრ ქვეყნებს შორის ევროპის რეგიონში გამოცდილების ურთიერთგაზიარების საუკეთესო საშუალება იქნება. საქართველოს ეწვევიან OGP-ის 30-ზე მეტი წევრი ქვეყნის, სამუშაო ჯგუფებისა და პარტნიორი საერთაშორისო ორგანიზაციების წარმომადგენლები. ღონისძიებაზე მოწვეულ სტუმრებს შორის არიან სახელმწიფოთა მაღალი თანამდებობის პირები, მათ შორის, OGP-ის მმართველი კომიტეტის რამდენიმე წევრი ქვეყნის მინისტრი.
მათივე ინფორმაციით, მმართველი კომიტეტის შეხვედრების ნაწილი ასევე დაეთმო OGP-ის მორიგი გლობალური სამიტის დაგეგმვას, რომელსაც 2015 წლის ოქტომბერში მექსიკა, როგორც მმართველი კომიტეტის თავმჯდომარე ქვეყანა, უმასპინძლებს. განხილულ იქნა ასევე წევრი ქვეყნების მიერ ღია მმართველობის მიმართულებით მიღწეული პროგრესი და პარტნიორობის მდგრადი განვითარების გეგმა. კომიტეტის წევრებმა იმსჯელეს ღია მმართველობის ჯილდოს კონკურსის შესახებ, რომელიც წელს მეორედ იმართება. კომიტეტმა განიხილა ღია მმართველობის ისეთი მნიშვნელოვანი კომპონენტები, როგორიცაა საზოგადოებრივი უსაფრთხოება და მართლმსაჯულების ხელმისაწვდომობა.
