მერის ბრალდებები გაზეთს და გამომცემლის პასუხი მერს

გაზეთ "გურიის მოამბეს“ მიერ გავრცელებულ განცხადებას, რომლის თანახმადაც ქალაქ ოზურგეთის მერს ბეგლარ სიორიძესა და მერიის ზედამხედველობის თანამშრომლებს შორის ფიზიკური და სიტყვიერი დაპირისპირების გამო, მერიიდან სამი თანამშრომელი დაითხოვეს, პრესკონფერენციაზე უპასუხა სიორიძემ:

_ გუშინ გაზეთ "გურიის მოამბეს" ვებ-გვერდზე გავრცელდა ინფორმაცია, რომელიც ქალაქ ოზურგეთის მერიის ზედამხედველობის სამსახურიდან სამი თანამშრომლის გათავისუფლებას უკავშირდებოდა. სტატიის მიხედვით, ქალაქის მერმა თანამშრომლებს ფიზიკური შეურაცხყოფა მიაყენა და შემდეგ სამსახურიდან დაითხოვა.

გაზეთმა აღნიშნული დეზინფორმაცია გადამოწმების გარეშე საინფორმაციო საშუალებებით, კერძოდ, სამაუწყებლო კომპანია "რუსთავი-2"-ით გაავრცელა. "გურიის მოამბემ" მერიის პრესსამსახურში მხოლოდ თანამშრომლების დათხოვნის ფაქტის დადასტურებასთან დაკავშირებით დასვა კითხვები, ხოლო სტატიაში მოყვანილ არცერთ ფაქტთან დაკავშირებით მას პრესსამსახურისთვის არ მოუმართავს. ხსენებული გაზეთის მხრიდან მსგავსი სიცრუის ტირაჟირება პირველი შემთხვევა არ გახლავთ.

“გურიის მოამბე“ სისტემატურად ავრცელებს მსგავსი ტიპის აბსურდულ, რეალობას მოკლებულ ინფორმაციებს და ამ ფორმით გამუდმებით ცდილობს მერისა და მერიის დისკრედიტაციას. გაზეთი ემსახურება არა სიმართლესა და სამართლიანობას, არამედ ბოროტად იყენებს ჟურნალისტური სტანდარტებით მისთვის მინიჭებულ უფლებას და “სამართლიანობის“ სახელით გამუდმებით ტყუის.

“გურიის მოამბე“, ასევე, უარს აცხადებს საპასუხო წერილების გამოქვეყნებაზე და საფასურად 500 ლარს ითხოვს. ასეთი მიდგომა გვიქმნის შთაბეჭდილებას, რომ გაზეთი შეგნებულად ავრცელებს გადაუმოწმებელ ინფორმაციებს, რათა გამოიწვიოს მერის საპასუხო რეაქცია და ამით მატერიალური სარგებელი მიიღოს. მართალია, კონსტიტუციითა და სხვა კანონებით გარანტირებულია სიტყვისა და გამოხატვის თავისუფლება, მაგრამ ამ უფლების რეალიზაციისას იგივე კანონმდებლობა ითვალისწინებს გარკვეული სახის შეზღუდვებს.

“გურიის მოამბე“ ნებისმიერ ფაქტს, რომელიც მერისა და მერიის მხრიდან გახლავთ ინიცირებული, უარყოფითი კონტექსტით ავრცელებს. ის ყოველგვარი საფუძვლის გარეშე ბრალს სდებს მერს ტრეფიკინგში, თანამშრომელების მიმართ მონურ მოპყრობასა და სხვადასხვა ტიპის აფიორაში. გაზეთის მიერ გავრცელებული ინფორმაციების უმრავლესობა არის ცილისმწამებლური, რაც სცდება ჟურნალისტური საქმიანობისა და ჟურნალისტური ეთიკის ნორმებს.

მრჩება შთაბეჭდილება, რომ ხსენებული გაზეთი წარმოადგენს მხარეს და მოვუწოდებ ყველა კომპეტენტურ არასამთავრობო ორგანიზაციას, ასევე, ჟურნალისტური ეთიკის საბჭოს, რათა მოახდინონ შესაბამისი რეაგირება. ქალაქის მერია საქმიანობს კანონის ფარგლებში, აბსოლუტურად გამჭვირვალედ და ნებისმიერ დაინტერესებულ პირს შეუძლია კანონით დადგენილი გამონაკლისის გარდა, მიიღოს ნებისმიერი ინფორმაცია მერისა და ქალაქის მუნიციპალიტეტის საქმიანობის შესახებ, _ აღნიშნულია მერის მიერ გავრცელებულ განცხადებაში,.

„გურიის მოამბის“ გამომცემელი ვლადიმერ მენაბდე ჩვენთან საუბრისას ამბობს, რომ ინფორმაცია წყაროზე დაყრდნობით გაავრცელა. უფრო მეტიც, მენაბდემ დღეს ინციდენტში მონაწილე ერთ-ერთი პირის კახა კვაჭანტირაძის სატელეფონო საუბრის ჩანაწერი გაავრცელა (იხილეთ საუბრის ჩანაწერი).

ჩანაწერში კვაჭანტირაძე მომხდარის დეტალებს ყვება. მენაბდე ამბობს, რომ სწორედ ამ ჩანაწერზე დაყრდნობით მომზადდა მასალა, რომელსაც მერი არასწორს უწოდებს.

_ ჩვენ ყველა მასალაზე ვთხოვთ მერიას კომენტარს. ასე იყო გუშინაც. პრესსამსახურს მივწერეთ განემარტა ჩვენთვის რა მიზეზით დაითხოვეს სამი თანამშრომელი. პასუხად მივიღეთ, რომ პირადი განცხადების საფუძველზე. დავწერეთ ის რაც იყო. რაც შეეხება იმას, რომ ჩვენ მერიის საპასუხო წერილში თანხას ვითხოვთ _ როდესაც ვითხოვთ კომენტარს გვიგზავნიან წერილს, უფრო სწორად მერის და პრესსამსახურის თანამშრომლების მოსაზრებას ჩვენი გაზეთის შესახებ. უფრო რომ დავკონკრეტდე ჩვენი ლანძღვით არიან დაკავებულები.

ჩვენ აქედან ვიყენებთ მხოლოდ და მხოლოდ კონკრეტული თემისთვის განკუთვნილ კომენტარს, რომელიც გვესაჭიროება. ჩვენ მათ ვუთხარით, რომ თუკი მერიის  არა მომხდარი ფაქტის, არამედ „გურიის მოამბესადმი“ დამოკიდებულების სრულად გამოქვეყნება უნდოდათ ეს მომსახურება ფასიანი გახლდათ. ეს იყო და ეს.

ცოტა ხნის წინ გამომიგზავნა პრესსამსახურის თანამშრომელმა ე.წ. მტკიცებულება, რომელშიც სწორედ ამაზეა საუბარი. ეს ყველაფერი მცდელობაა იმისა, რომ, გადაფარონ ის ფაქტი რაც მერიაში მოხდა. ფაქტი, რომელიც ჩემი აზრით სისხლის სამართლის დანაშაულის ნიშნებს შეიცავს. მე არ ვამბობ, რომ მერი მატყუარაა, თუმცა ამ შემთხვევაში ასეა. გამოვიყენებ მისსავე სიტყვებს _ თუ ადამიანი იტყუება, ე.ი. მატყუარაა, მერია დაკავებულია "გურიის მოამბეს“ ლანძღვითა და გინებით, სანიმუშოდ ერთ ფაქტს გადმოგიგზავნით (მენაბდის მიერ გამოგზავნილი ე.წ. სკრინშოტი იხილეთ სტატიის ბოლოს), ასეთი კი სოციალურ ქსელში ასეულობითაა, აი ეს არის მერიის მორალი_ გვითხრა მენამბდემ.

აღსანიშნავია, რომ კახა კვაჭანტირაძემ და გათავისუფლებულმა ორმა თანამშრომელმა გურია ნიუსთან (იხილეთ მასალა) კატეგორიულად უარყო მერთან დაპირისპირების ფაქტი. ისინი აღნიშნავენ, რომ ზუსტად ერთ დღეში სამივე მათგან სამსახურიდან წასვლის სურვილი ერთდროულად გაუჩნდათ.

ვლადიმერ მენაბდე ამბობს, რომ მისი წყაროს ინფორმაციით, რომლის ჩანაწერიც გააჩნია, მერმა კახა კვაჭანტირაძეს სამსახურში აღდგენა დაპირდა.