თბილისის საქალაქო სასამართლოში თავდაცვის სამინისტროს თანამშრომლების საქმის განხილვა 18 მაისისთვის გადაიდო.
სასამართლოში "თავისუფალი დემოკრატების" ლიდერები იმყოფებოდნენ. დღეს გამართულ სხდომაზე პროკურატურამ ახალი მტკიცებულებები წარმოადგინა და დასაშვებად ცნობა მოითხოვა.
მოსამართლე დავით ჯუღელი პროკურატურის მტკიცებულებების დასაშვებობის საკითხზე გადაწყვეტილებას მომდევნო კვირაში მიიღებს.
მაია ფანჯიკიძის განცხადებით, ბრალდებულების დაკავება არის პოლიტიკური გადაწყვეტილება. მისი თქმით, ფაქტია, რომ არავითარი აუცილებლობა ბრალდებულების წინასწარ პატიმრობაში ყოფნის, არ არსებობს.
"პატიმრობის აუცილებლობა არ არსებობს, მითუმეტეს, ამდენი ხნის განმავლობაში. თუ რაიმე ჰქონდა გამოძიებას მათი საწინააღდეგო, ეს აქამდე გამოჩნდებოდა. იმედს გამოვთქვამ ეს ყველაფერი მალე დამთავრდება, სამართლიანობა აღდგება და ეს ხალხი გამოვა ციხიდან", _ განაცხადა მაია ფანჯიკიძემ.
ე.წ. კაბელების საქმესთან დაკავშირებით კომენტარი გააკეთა ზურაბ აბაშიძემაც. როგორც აბაშიძემ განაცხადა, ადვოკატების ხელთ არსებული დოკუმენტებით დასტურდება, რომ თავდაცვის სამინისტროს ყოფილი მაღალჩინოსნების დაკავების მოტივი არის პოლიტიკური და მათი დაკავება მოხდა ქვეყნის ხელმძღვანელობის მითითებით.
"მსოფლიოს არც ერთ ცივილიზებულ ქვეყანაში თუკი არსებობს ბუნებაში მსგავსი ტიპის დანაშაული, არ აპატიმრებენ. თუკი "ქართულ ოცნებას" პრეტენზია აქვს რომ ქვეყანას დემოკრატიულად მართავს, ასეთი ტიპის დანაშაულის გამო ციხეში არავინ სვამს ადამიანებს, თუკი რა თქმა უნდა, ეს დანაშაული საერთოდ არსებობს. სხვა ქვეყნებში ასეთი ტიპის დანაშაულში ბრალდებულები ყოველთვის არიან გარეთ და თანამშრომლობენ გამოძიებასთან, ქვეყნის სასამართლო კი საბოლოოდ იღებს გადაწყვეტილებას თუ რა სასჯელი მიუსაჯონ მათ. თუმცა ბრალდებულები, რომლებიც ამ საქმეზე არიან დაკავებულები, არიან ამ ხელისუფლების ფაქტობრივი მმართველის მძევლები, რომლებიც დააპატიმრა პროკურატურამ. ეს მალე დასრულდება და ყველას მოეთხოვება პასუხი ამ ადამიანების ციხეში ყოფნისთვის", _ აღნიშნა ზურაბ აბაშიძემ.
