საქართველოს ფინანსთა მინისტრის ნოდარ ხადურის თქმით "უახლოეს პერიოდში და საშუალო ვადიან პერსპექტივაში ლარი შეინარჩუნებს სტაბილურობას“.
ამის შესახებ ხადურმა "გურია ნიუსთან“ საუბრისას განაცხადა. მისივე თქმით, "ეს მყისიერად არ ხდება, მაგრამ სერიოზული ნაბიჯები იდგმება“:
_ მთავრობას, ეკონომიკის სამინისტროს შემუშავებული აქვს სერიოზული გეგმები იმასთან დაკავშრებით თუ როგორ გაზარდოს ქვეყანაში უცხოური ვალუტის შემოდინება. ეს განსაკუთრებით ინვესტიციებს შეეხება. ის პროექტები, პროგრამები, რომელიც არის, ამას დამატებული ჩვენი ქვეყნის პრომოუშენი, მათ შორის ტურისტები მოზიდვის თვალსაზრისით, უცხოური ინვესტიციების თვალსაზრისით _ უპირველეს ყოფილსა ეს არის საექსპორტო ბაზრების დივესრიფიკაცია, ევროკავშირი, ჩინეთი, რუსეთი და ა.შ. არის იმის გარანტია, რომ უახლოეს პერიოდში და საშუალო ვადიან პერსპექტივაში ლარი შეინარჩუნებს სტაბილურობას.
_ ეს "უახლოესი დრო“ როდის დადგება?
_ ეს მყისიერად რათქმაუნდა არ ხდება _ დღეს საღამოს და ხვალ დილით, მაგრამ ძალიან სერიოზული ნაბიჯები იდგმება. მაგრამ კიდევ ერთხელ ვიმეორებ, რომ ეს უნდა იყოს არა მხოლოდ მთავრობის, არამედ ეროვნული ბანკის ქმედებები იმისთვის, რომ ეროვნული ვალუტა იყოს მყარი.
_ ეროვნული ბანკის პრეზიდენტი ევროპის საუკეთესო ბანკირად დაასახელეს, მისი მუშაობა კარგად შეაფასეს…
_ მერე?
_ როგორ აფასებთ ამას იმ ფონზე, როცა ეროვნული ბანკის ცუდ მუშაობაზე კეთდება აქცენტები…
_ მე არასდროს არ მითქვამს ეროვნული ბანკი კარგად არ მუშაობს თქო. ჩემი კომპეტენცია არ არის ეროვნული ბანკის საქმიანობა შევაფასო. მე ვამბობ, რომ ეროვნულმა ბანკმა, მთავრობამ, ყველამ თავისი საქმე უნდა აკეთოს, _ განაცხადა ხადურმა "გურია ნიუსთან“ საუბრისას.
