მე-11 კლასის მოსწავლეების გამოსაშვები გამოცდები 17 ივნისს დაიწყება.
საქართველოს განათლებისა და მეცნიერების მინისტრი თამარ სანიკიძე და შეფასებისა და გამოცდების ეროვნული ცენტრის დირექტორი მაია მიმინოშვილი დღეს, თბილისის 55-ე საჯარო სკოლაში საატესტატო გამოცდების პრეტესტის მიმდინარეობის პროცესს გაეცნენ.
მე-11 კლასელებისათვის პრეტესტი 16 ივნისს, ხოლო გამოცდა 17 ივნისს ტარდება. სტიქიის შედეგად დაზარალებული "მომავლის სკოლის" მე-11 კლასელები პრეტესტს და გამოცდებს თბილისის 55-ე საჯარო სკოლაში აბარებენ.
სამინისტროს განცხადებით, 17 ივნისს გამოსაშვები გამოცდები 09:00 საათზე გეოგრაფიის გამოცდით საქართველოს 1600-მდე სკოლაში ერთდროულად დაიწყება. გამოცდებისათვის 41 ათასზე მეტი მოსწავლეა დარეგისტრირებული.
"მოსწავლეები გამოცდას 4 საგანში (გეოგრაფია, ფიზიკა, ბიოლოგია, ქიმია) ჩააბრებენ. ეს ის საგნებია, რომელთა სწავლაც მე-11 კლასში დასრულდა. გამოსაშვები გამოცდები ეროვნული სასწავლო გეგმით გათვალისწინებულ ყველა სავალდებულო საგანში ტარდება. იმ მოსწავლეებს, რომლებიც ვერ გადალახავენ ზღვარს რომელიმე საგანში (ან ვერ გამოცხადდებიან გამოცდაზე), შესაძლებლობა ექნებათ შესაბამისი საგანი მეთორმეტე კლასის ბოლოს ჩააბარონ დანარჩენ 4 გამოცდასთან (ქართული ენა და ლიტერატურა, უცხოური ენა, მათემატიკა, ისტორია) ერთად", _ აცხადებენ სამინისტროში.
სამინისტროს ინფორმაციით, გამოსაშვები გამოცდები კომპიუტერზე ადაპტირებული ტესტირების ქართული მოდელით (Gcat) ტარდება. მოსწავლის შესაძლებლობებზე მორგებული ტესტირების ქართული ვერსია – ალგორითმი და პროგრამული უზრუნველყოფა შეფასებისა და გამოცდების ეროვნულ ცენტრში შეიქმნა.
"სისტემის მაქსიმალური დაცულობისათვის ასევე მომზადდა და დაინერგა სპეციალური პროგრამა ე.წ. Gcat browser, რომელიც ტესტირების სრულ დაცულობას უზრუნველყოფს და კომპიუტერის სტანდარტულ შესაძლებლობებს ზღუდავს. სისტემა კონკრეტულ კითხვაზე გაცემული პასუხის მიხედვით ურჩევს მოსწავლეს მომდევნო კითხვას, სანამ მის ცოდნასა და შესაძლებლობებს არ დაადგენს", _ განმარტავენ სამინისტროში.
