უეფას სუპერთასის ბილეთების ინტერნეტით გაყიდვასთან დაკავშირებით საზოგადოებაში დიდი ვნებათღელვაა. ბილეთების შეძენის მსურველები უკმაყოფილებას გამოთქვამენ, იმის გამო, რომ საიტი biletebi.ge დაბლოკილია და ინტერნეტით ბილეთების ყიდვა შეუძლებელია.
საქართველოს ფეხბურთის ფედერაცია განცხადებას ავრცელებს ამ ფაქტთან დაკავშირებით და აფრთხილებს გულშემატკივრებს, არ შეიძინონ ბილეთები სხვა, ცრუ საიტებზე, რომ არ აღმოჩნდნენ მოტყუებულნი.
"საქართველოს ფეხბურთის ფედერაცია გაფრთხილებთ, რომ არ შეიძინოთ არც ერთ სხვა საიტზე ბილეთები გარდა საიტისა www.biletebi.ge.
მიუხედავად იმისა, რომ მომხმარებელთა სიმრავლის გამო აღნიშნული საიტი დროებით დაბლოკილია, გთხოვთ, ნუ გახდებით გადამყიდველთა და ცრუ საიტების მსხვერპლი და ნუ შეიძენთ არარსებულ ბილეთებს გაასმაგებულ ფასად.
www.biletebi.ge – ს ინფორმაციით საიტის ადმინისტრაცია ამ დროისათვის მუშაობს არსებული ხარვეზის გამოსასწორებლად და ბილეთების შეძენა უახლოეს საათებში შესაძლებელი გახდება."- ნათქვამია განცხადებაში.
