საქართველოს სპორტისა და ახალგაზრდობის საქმეთა მინისტრი ტარიელ ხეჩიკაშვილი, რომელიც თანამდებობაზე ლევან ყიფიანის გადადგომის შემდეგ 1 მაისს დაინიშნა, 21 შპს-ს პარტნიორია. ამის შესახებ ხეჩიკაშვილის ქონებრივ დეკლარაციაშია აღნიშნული, რომელიც მინისტრმა 1 ივლისს შეავსო.
უძრავი ქონება
დეკლარაციის მიხედვით, ხეჩიკაშვილების მრავალსულიანი ოჯახი ორ ბინას, ორ საცხოვრებელ სახლს, ორ მიწის ნაკვეთსა და ერთ ავტოფარეხს ფლობს. უძრავი ქონების მფლობელი, ავტოფარეხის გარდა, ხეჩიკაშვილის მეუღლე ეკატერინე ინასარიძეა.
კონკრეტულად, დეკლარაციის მიხედვით, ეკატერინე ინსარიძე ფლობს თბილისში, შავი ზღვის ქუჩაზე 63.21 კვ.მ-ის ფართობის ბინას, დიღმის სასწავლო საცდელი მეურნეობის ტერიტორიაზე, გრიგოლ რობაქიძის 7 ნომერში, 142.81 კვ.მის ფართობის ბინას; დიღმის სასწავლო საცდელი მეურნეობის ტერიტორიაზე, 1177.51 კვ.მ-ის ფართობის საცხოვრებელ სახლს; დიღმის სასწავლო საცდელი მეურნეობის ტერიტორიაზე, დაბა ფასანაურში, 300 არაგველის 29 ნომერში, 800.00 კვ.მ-ის ფართობის სახლს; მცხეთაში, სოფელი საგურამოში, 1200.00 კვ.მ.-ს ფართობის მიწის ნაკვეთს და თბილისში, დიღმის სასწავლო საცდელი მეურნეობის ტერიტორიაზე, 1000.00 კვ.მ-ის ფართობის მიწის ნაკვეთს;
დეკლარაციის მიხედვით, ტარიელ ხეჩიკაშვილი ერთადერთი უძრავი ქონების, თბილისში, რობაქიძის 7 ნომერში მდებარე 18.00 კვ.მ-ის ფართობის ავტოფარეხის მფლობელია.
ეკატერინე ინასარიძე ფლობს მსუბუქი ავტომანქანა volkswagen ტიგუანს, რომელიც 2011 წელს არის გამოშვებული.
ფასიანი ქაღალდები
დეკლარაციის მიხედვით, ტარიელ ხეჩიკაშვილი 358 269 ლარის ფასიან ქაღალდებსაც ფლობს (ს/ს ვივი, აქცია, რაოდენობა – 23340; ერთი აქციის ფასი 15.35 ლარი).
შემოსავლები
რაც შეეხება მინისტრის შემოსავლებს, რომელიც დეკლარაციის შევსებამდე წინა ერთი წლის განმავლობაში მიიღო, ასე გამოიყურება:
ტარიელ ხეჩიკაშვილმა "იბერია ბიზნეს ჯგუფის" პრეზიდენტის თანამდებობიდან 40 5011.73 ლარის შემოსავალი მიიღო, ხოლო "შპს ავტო ლიზინგ კომპანიდან", სადაც მას ბიზნეს კონსულტანტის თანამდებობა ეკავა 10 000.00 ლარი. რაც შეეხება მისი მეუღლის შემოსავლებს, დეკლარაციაში მითითებული არ არის.
საბანკო ანგარიშები
დეკლარაციის შევსების მომენტში, მინისტრის ოჯახს სამ ბანკში 22 ანგარიში ჰქონდა გახსნილი. აქედან, 14 ანგარიშზე თანხა არ ირიცხებოდა.
დეკლარაციაში აღნიშნულია, რომ ტარიელ ხეჩიკაშვილს "საქართველოს ბანკის" მიმდინარე საკრედიტო ანგარიშზე 8208.05 დოლარი და 5002.65 ლარი ჰქონდა;
ხოლო "ვი–თი–ბი ბანკის" მიმდინარე ანგარიშზე 31.49 ლარი; 486.00 ევრო; 60124.99 დოლარი ირიცხებოდა.
რაც შეეხება ეკატერინე ინასარიძის ანგარიშებს, დეკლარაციის შევსების მომენტში მას "ვი–თი–ბი ბანკში" ანაბარზე 20000.00 დოლარი; "რესპუბლიკა ბანკის" მიმდინარე ანგარიშზე 897.53 ლარი და 350.69 დოლარი ჰქონდა.
სასესხო ხელშეკრულებები
აღსანიშნავია, რომ ტარიელ ხეჩიკაშვილს რამდენიმე სასესხო ხელშეკრულებაც აქვს გაფორმებული. კონკრეტულად, 01/03/2009, 01/03/2009 – 19/02/2014 წლებში, შპს "სენა ავტოსთან" მან 150 000.00-ლარიანი ხელშეკრულება დადო. დეკლარაციაში გასავლის თანხად სწორედ 150 000.00 ლარია მითითებული.
შპს "კრეს ავტო ჰაუსთან” 800 000.00-ლარიანი სასესხო ხელშეკრულება 9 (ხელშეკრულების ვადა 09/02/2009, 09/02/2009 – 01/01/2018) აქვს დადებული, თუმცა დეკლარაციაში სესხის პროცენტის გადასახდელად გასავალი დაფიქსირებული არ არის;
შპს "იბერია ინვესტთან" 250 250.00-ლარიანი სასესხო ხელშეკრულება (02/02/2009, 11/02/2009 – 01/01/2018), გასავლის თანხა არც აქ არის დაფიქსირებული.
შპს "ავტოსტილთან" 600 000.00-ლარიანი ხელშეკრულება (ხელშეკრულების ვადა 01/03/2009, 01/03/2009 – 23/03/2015), გასავალი დაფიქსირებული არ არის;
მინისტრს 150 000.00-ლარიანი უვადო ხელშეკრულება აქვს დადებული შპს "სენა ავტოსთან" (ხელშეკრულების ვადა 19/07/2013, – უვადო), რომლის პროცენტის გადასახდელად ხეჩიკაშვილს 44961.00 ლარის გასავალი ჰქონდა.
450 000.00-ლარიანი სასესხო ხელშეკრულება აქვს გაფორმებული შპს "იბერმობილთან" (ხელშეკრულების ვადა 24/02/2009, 24/02/2009 – 14/05/2015), გასავალი დაფიქსირებული არ არის.
გარდა ამისა, ხეჩიკაშვილს "საქართველოს ბანკთან" 513000.00-დოლარიანი იპოთეკური სასესხო ხელშეკრულება (ვადა 18/02/2014, 18/02/2014 – 03/02/2023) აქვს დადებული, სესხის პროცენტის გადასახდელად კი მან ერთი წლის განმავლობაში 74610.78 დოლარი გასცა.
2014 წელს, ამავე ბანკთან აქვს სასესხო ხელშეკრულება (03/02/2014, 03/02/2014 – 18/02/2014) დადებული, რომლის თანხა 43000.00-დოლარია, მინისტრმა პროცენტის გადასახდელად 36170.69 დოლარი გასცა.
"საქართველოს ბანკიდან" ბანკიდან ხეჩიკაშვილს კიდევ ერთი სესხი (ხელშეკრულების ვადა 20/12/2011, 20/12/2011 – 18/02/2014) აქვს აღებული, რომლის თანხა 600 000.00 დოლარია; პროცენტის გადასახდელად მან 486 120.65 დოლარი გასცა;
რაც შეეხება ხეჩიკაშვილის მეუღლეს, ეკატერინე ინასარიძის სახელზე დეკლარაციის მიხედვით, ერთი სესხია. კერძოდ, ინასარიძეს ბანკი რესპუბლიკასთან 24000.00-დოლარიანი სესხი (ხელშეკრულების ვადა 21/01/2011, 21/01/2011 – 18/01/2021) აქვს გამოტანილი, რომლის პროცენტის გადასახდელადაც მას 4491.93 დოლარის გასავალი ჰქონდა.
მინდობილობის ხელშეკრულებები
დეკლარაციაში ასევე აღნიშნულია, რომ ტარიელ ხეჩიკაშვილს რამდენიმე მინდობილობის ხელშეკრულებაც აქვს გაფორმებული. კერძოდ, დეკლარაციის თანახმად, ხეჩიკაშვილს 2015 წლის 4 მაისს, საქართველოში რეგისტრირებული ნებისმიერი იურიდიული პირის კაპიტალში წილის მართვის შესახებ მინდობილობის ხელშეკრულება გაფორმებული აქვს. მინდობილი პირი ავთანდილ ხეჩიკაშვილია. ასევე, მეორე მინდობილობაც ავთანდილ ხეჩიკაშვილისთვის აქვს გაფორმებული 2015 წლის 21 მაისს.
ნასყიდობის ხელშეკრულებები
რაც შეეხება ოჯახის მიერ დადებულ ნასყიდობის ხელშეკრულებებს, დეკლარაციის მიხედვით ხეჩიკაშვილების ოჯახმა 4 ნასყიდობის ხელშეკრულება დადო.
2015 წლის 23 აპრილს, ხეჩიკაშვილის მეუღლემ ეკატერინე ინასარიძემ წილის ნასყიდობის 225 000.00-ლარიანი ხელშეკრულება აქვს გაფორმებული შპს "იბერმობილის კაპიტალთან". ამავე დღეს, ეკატერინე ინასარიძემ 374 775.04-ლარიანი ნასყიდობის ხელშეკრულება დადო შპს "ტექ ავტო მოტივის კაპიტალთან". ამავე დღეს, ტარიელ ხეჩიკაშვილს აქვს 450 000.00-ლარიანი ნასყიდობის ხელშეკრულება დადებული შპს "იბერია სერვისის კაპიტალთან".
მანამდე კი, 20 აპრილს ინასარიძემ 450000.00-ლარიანი ნასყიდობის ხელშეკრულება დადო შპს "იბერია სერვისი კაპიტალთან".
დეკლარაციაში ასევე აღნიშნულია, რომ ხეჩიკაშვილმა ერთი წლის განმავლობაში კაპიტალის გაზრდისთვის, ავტო სერვის კავკასიას 878 000.00 ლარი გადაუხადა.
ბიოგრაფია
შეგახსენებთ, რომ სპორტისა და ახალგაზრდულ საქმეთა მინისტრი 1970 წლის 13 თებერვალს დაიბადა.
მინისტრობამდე ის "იბერია ბიზნეს ჯგუფის" პრეზიდენტი იყო.
დამტავრებული აქვს თბილისის პოლიტექნიკური ინსტიტუტი.
მისი სპორტული კარიერა კი თბილისის "დინამოს" დუბლშემადგენლობაში 1987 წელს იწყება, ხოლო ბიზნეს-კარიერა 1990 წელს, როცა კომპანია "მერმისი" ჩამოაყალიბა.
1999 წელს "იბერკომპანის" კომერციული დირექტორი გახდა, 1999 წელს კი კომპანია "იბერმობილი" დააარსა. ამავე წელს ის "ბენდელას თასის" სპონსორი იყო, 2003 წლიდან კი გენერალური სპონსორი. 2000 წელს უკვე მერვე წელია სპორტულ ჟურნალისტთა ასოციაციის ტრადიციული გალა-საღამოს სპონსორია.
2001 წელს თანამოაზრეებთან ერთად, ჩამოაყალიბა კომპანია "იბერია ბიზნეს ჯგუფი", რომელშიც დღეისათვის ოცამდე ბრენდის წარმომადგენლობაა გაერთიანებული ("ფოლკსვაგენი", "აუდი", "მიცუბიში", "პეჟო", "კია", "ბანერი", "მობილი", "პირელი" და ა.შ.)
ტარიელ ხეშიკაშვილი სპორტის დეპარტამენტთან არსებული სპორტის მუზეუმის დამფუძნებელია.
2005 წლიდან საფეხბურთო სკოლა "საბურთალოს" მეპატრონე. 2006 წელს მისი ინიციატივით, "ფოლკსვაგენის" წარმომადგენლობა საქართველოს საფეხბურთო სუპერთასის გენერალური სპონსორია.
რაც შეეხება ოჯახურ მდგომარეობას ის დაოჯახებული – ჰყავს მეუღლე და შვიდი შვილი. ხეჩიკაშვილი პროფესიით სამართალმცოდნეა.
