ქალაქ ოზურგეთის კიტა მეგრელაძის ქუჩის მცხოვრებლები კონსტანტინე ჯუღელი, იური ხომერიკი, ნევრო სადრაძე, ბიძინა ხომერიკი ქალაქ ოზურგეთის საკრებულოს დეპუტატთან გოჩა ძიმისტარაშვილთან ერთად ოზურგეთის დემოკრატიული ჩართულობის ცენტრში შეიკრიბნენ და აღნიშნულ ქუჩაზე არსებული პრობლემების შესახებ ჟურნალისტებთან ისაუბრეს.
მეგრელაძის ქუჩის მცხოვრებლების განცხადებით, ე.წ."ზვანის" უბანში, მდინარე ნატანებზე მდებარე კარიერებთან დაკავშირებული არსებული დიდი სატვირთო მანქანები ახალდაგებულ ასფალტის საფარს აზიანებენ.
როგორც მოსახლეობა აცხადებს, მათ ქალაქის მერიას უკვე ერთი თვეა განცხადებით მიმართეს, თუმცა პასუხი ჯერ კიდევ არ მიუღიათ.
"ჩვენ სამი წელი ველოდებოდით ამ გზის გაკეთება. არჩევნებზე დაგვიგეს და ახლა ისევ ცუდ მდგომარეობაშია, უკვე დაზიანდა. 50 – 60 ტონიანი მანქანები რომ დღეში ასჯერ გაივლის ამ გზას, აბა როგორ იქნება? თუ არ მოვუფრთხილდით, კიდევ გაგვიკეთებს ვინმე? მოვითხოვთ ან გააკეთონ ალტერნატიული გზა, საიდანაც იქნება შესაძლებელი, რომ ამ მანქანებმა გაიტანონ ქვიშა, ან მივიღებთ უკიდურესს ზომებს.
ხელისუფლებას ძალიან ცუდად ახსოვს ჩვენი ქუჩის მცხოვრებლების აქციები, იძულებულები გავხდებით, რომ გადავკეტოთ ცენტრალური გზა. მოსახლეობის თხოვნები არ უნდა გაითვალისწინოს ხელისუფლებამ? ამ კარიერების გამო ჭები ყველგან დაშრა, მდინარეს შეეცვალა კალაპოტი. შეიძლება ცენტრალურ ხიდსაც მალე გამოეშალოს საძირველი, რატომ, რისთვის? გაგვცენ პასუხი ჩვენს წერილზე და დააკმაყოფილონ ჩვენი მოთხოვნები, წინააღმდეგ შემთხვევაში მოსახლეობა ქუჩაში გამოვა და არაცივილიზებული მეთოდებით ვიმოქმედებთ. "
ქალაქ ოზურგეთის მერიის პოზიცია აღნიშნულთან დაკავშირებით ასეთია:
"ქალაქ ოზურგეთის მუნიციპალიტეტის საკრებულოში კიტა მეგრალაძის ქუჩის მოსახლეობის ერთობლივი განცხადება შემოვიდა. ხსენებული ქუჩის მოსახლეობა კომპანია "ბლექ სი ჯგუფის" მიერ, ტოლაბაკურის ტერიტორიაზე მოპოვებული ქვიშა-ხრეშით დატვირთული სატვირთო მანქანების გადაადგილებასთან დაკავშირებით პრეტენზიას გამოთქვამს და ალტერნატიული გზის გაყვანას მოითხოვს.
ქალაქ ოზურგეთის მუნიციპალიტეტის მერიის ეკონომიკური განვითარების, ქონების მართვის, ინფრასტრუქტურის, ტრანსპორტის და კეთილმოწყობის სამსახურის უფროსის მერაბ წივწივაძის ინფორმაციით, ხსენებული ქუჩის მოსახლეობის მოთხოვნის საფუძველზე, 2012 წელს გზის საფარის კაპიტალური დაგება და წყლის სიტემის რეაბილიტაცია განხორციელდა. დღეის მდგომარეობით, მეგრელაძის ქუჩის მოსახლეობას წყალი 14 საათიანი გრაფიკით მიეწოდება. რაც შეეხება შემოვლითი გზის გაყვანას, როგორც წივწივაძემ განაცხადა, ამ მოთხოვნის შესრულება შეუძლებელია, რადგან არსებული კარიერის ირგვლივ კერძო საკუთრებაში არსებული მიწის ნაკვეთები მდებარეობს."
