საქართველოსა და ნატო-ს ურთიერთობების გაღრმავება კავკასიის რეგიონში ურთიერთობის დაძაბვას გამოიწვევს, რის გამოც მოსკოვი ორ სეპარატისტულ რეგიონში აფხაზეთსა და ოსეთში სამხედრო ძალას აძლიერებს. აღნიშნულ საკითხზე TELEGRAPH-ს რუსეთის ყოფილი გენერალი, ევგენი ბუჟინსკი ესაუბრა.
ევგენი ბუჟინსკის თქმით, რუსეთის სამხედრო დამგეგმავებს მიაჩნიათ, რომ ნატო-ში საქართველოს შესვლა ქართულ მხარეს მოსკოვის მიერ მხარდაჭერილი რეგიონების, სამხრეთ ოსეთისა და აფხაზეთის ძალით დასაბრუნებლად მწვანე შუქს აუნთებს,რაც სასიკვდილო კონფლიქტს გამოიწვევს.
"თუ საქართველო ნატო-ს შეუერთდება ხვალ, მეორე დღესვე აფხაზეთს თავს დაესხმება. ჩვენ აფხაზეთთან შეთანხმების გამო ვალდებული ვართ რეაგირება მოვახდინოთ. ნატო-მ უნდა გადაწყვიტოს, თუ რა უნდა გავაკეთოთ. იმედი მაქვს, რომ ამის შესახებ ვინმე ფიქრობს,"_ აცხადებს ბუჟინსკი.
თუ საქართველო თავის მიზანს მიაღწევს და ჩრდილო-ატლანტიკურ ალიანსში გაწევრიანდება, რუსეთი საპასუხოდ სეპარატისტული რესპუბლიკების ბაზებს გააძლიერებს.
გამოცემის ცნობით, საბჭოთა კავშირის დაშლის შემდეგ 1991-1993 წლებში, საქართველომ სამხრეთ ოსეთი და აფხაზეთი დათმო.
რუსეთმა ისინი 2008 წლის აგვისტოს ომის შემდეგ დამოუკიდებელ სახელმწიფოებად აღიარა, ხოლო საქართველოსა და დასავლეთის ქვეყნების მთავრობები ომის პროვოცირებაში დაადანაშაულა,რომ საქართველოს მიწები ხელში ჩაეგდო და მისთვის ნატო-ში გაწევრიანების იმედები გაექრო.
რუსეთი აცხადებს,რომ იძულებული გახდა რეაგირება მოეხდინა, მას შემდეგ, რაც საქართველოს მაშინდელი პრეზიდენტი, მიხეილ სააკაშვილი, მშვიდობიან მოახლეობასა და რუს სამშვიდობოებს სამხრეთ ოსეთში თავს დაესხა.
ბუჟინსკი,რომელიც ახლა მოსკოვის ანალიტიკურ ცენტრს ხელმძღვანელობს აცხადებს,რომ 2008 წელს ქართულმა მხარემ ომი იმიტომ დაიწყო,რომ შესაძლებელია ამერიკელებისგან წახალისებულებს მათი მხარდაჭერის იმედი ჰქონდათ.
"ომის დაწყებამდე ერთი საათით ადრე დაზვერვის სამსახურის მონაცემებით თავდასხმის შესახებ ინფორმაცია მივიღეთ და მე დავუკავშირდი ამერიკელ კოლეგას, რომელიც მხოლოდ თბილისს ეწვია. მითხრეს, რომ მათ ჰქონდათ მყარი გარანტიები იმისა, რომ ქართველებს ასეთი გეგმა არ გააჩნდათ და დაბომბვაც დაიწყო,"_აცხადებს ბუჟინსკი.
მისივე თქმით, ბუშის ადმინისტრაციაში არსებობენ ადამიანები, რომლებიც ქართველებს მხარს უჭერენ.
"ვფიქრობ, რომ სიმართლე მითხრა, მაგრამ ასევე ვფიქრობ, რომ ბუშის ადმინისტრაციაში იყვნენ ადამიანები, რომლებმაც მათ ხელი შეუწყვეს,"_აცხადებს ის.
გამოცემის ცნობით, პოსტ-საბჭოთა მეზობლებს შორის ურთიერთობა მცირედით მას შემდეგ გამოსწორდა, რაც 2013 წელს სააკაშვილმა თანამდებობა დატოვა, თუმცა საქართველოსა და სეპარატისტულ რესპუბლიკებს შორის დაძაბულობა მაინც დიდია. ბოლო პერიოდში თბილისი ხშირად ადანაშაულებს რუსეთს სამხედრო საავიაციო სივრცის დარღვევაში და მიწის საზღვრის ანექსიაში.
საქართველოს მთავრობის განცხადებით, ნატო-ში შესვლა რუსეთის სურვილისგან თავდაცვაა, რომ ყირიმის მსგავსი ანექსია საქართველოშიც არ განხორციელდეს.
რუსეთში, ნატო-ს გაფართოებას ყოფილ საბჭოთა კავშირის სივრცეში განიხილავენ, როგორც ყირიმის ანექსიისა და აღმოსავლეთ უკრაინაში სეპარატისტული ძალის მხარდაჭერის გამო ნატო-ს მტრული დამოკიდებულების პასუხს და შექმნილ სტრატეგიულ საფრთხეს.
